عاوزة ابقى كويسة

مممم
ما طبيعي جداً كلنا عاوزين نبقى كويسين
:)

بس احساس وحش اوى... انك في يوم كنت كويس اوى.. او تحسب نفسك كنت كويس
و دلوقتي مش لاقي نفسك ولا لاقي قلبك في اي حاجة...

كنت بدعي ربنا الفترة الي فاتت ان ربنا يفتت لي قلبي..
أصبح كالحجر... بل أقسى منه

بقالي كتير مابكتش من خشية الله
بقالي كتير ماتعرضتش لأي ابتلاء

و يبتلي المرء على قدر دينه

للدرجة دي انا ماعنديش حتى اي قدر من الدين !!!
للدرجة دي ربنا مش عاوزني دلوقتي!!

مُنعت من طاعات كتيرة قوى.... اما بسبب ذنوب.. او بسبب تقصير مني انى احافظ على الطاعات دي



من كام يوم في برنامج رياض الجنة للدكتور عمر عبد الكاافي و الشيخ وجدي غنيم و الشيخ صلاح سلطان
حكو قصة ان سيدنا محمد عليه الصلاة و السلام في يوم كان يصلي جماعة ببعض الصحابة.. و غلط في اية
و ماحدش من الصحابة غيرهاله

خلصت الصلاة و الرسول بيقولهم ليه ماحدش صححلي الاية
قالوله انهم افتكروها نسخة تانية للاية... ماحدش متوقع ان الرسول عليه الصلاة و السلام ممكن يخطأ في اية

قالهم انه أخطأ فيها... لأن فيه ذنب فعله احد المصليين ورائه .. حد من الصحابة في عمل غلطة... الغلطة دي منعت الرسول من التركيز..

يااه
امال انا يا حتة بتاعة و قاعدة طول اليوم في اماكن موبوءة بالمعاصى غصباً عني لحال الكلية او حال الشارع...

حسيت بالاحساس ده اوى امبارح وقت ندوة معينة و كدت ابكى لأول مرة من عشرتاشر سنة من خشية الله.. بس جت في وقتها بنت غير محجبة و لبسها ضيق...

و لم ابكى...


ممكن اكون بيتهيألي
و اكيد انا بدورلي على اعذار...





سمعت قريباً قصة لسيدنا عمر بن الخطاب
انه كان بيصلي عند الكعبة و رأي احد الرجال راح يصلي ركعتين
صلي ركعتين خفاف جدا
بعد ما فرغ من الصلاة رفع يده للدعاء
و قال: اللهم ارزقني الدرجات العلى من الجنة
اللهم ارزقني الحور العين

ف سيدنا عمر رضى الله عنه ضربه بالدرة بتاعته
و قاله فيما معناه... انتا مادفعتش حتى مهر كويس لطلبك ده...




كانت واحدة صاحبتي تقعد تقولي انها كانت بتقعد تدعي كتير قوى.. اللهم ارقزني الزوج الصالح
و تقعد تعدد صفاته و حسناته
و تزيد فيها بالدعاء


لحد ما في يوم قعدت مع نفسها تفكر... انا بدعي ربنا بالزوج الصالح... و يكون كويس اد ايه و ناجح اد ايه

طيب و انا فين!!!
هوا هيجي زوج صالح! بس انا مش زوجة صالحة ليه


ف بقت بتدعلها هيا كمان بعديها ان ربنا يصلح حالها و يجعلها كما يحب...



مممم
طرطشة افكار و كل فكرة بعيدة عن التانية :)

اسألكم الدعاء انى ارجع تاني كويسة :)

احنا مين فيهم!!

السلام عليكم و رحمة الله

فكرة شتغل مخي بقالها فترة طويلة اوى...

كنت بتكلم مع اصحابي على فروق كانت بين الصحابة و بيننا..

كان فيه منهم فرق مهم اوى...
انا فاكرة نفس الجملة الي استخدمتها وقتها...
انهم ناس نضفو نفسهم من جوا و من بره... عشان كده كانوا يستحقو الارض تتذلل ليهم و بين ايديهم

و شغلني الموضوع اكتر... و قعدت لفكر فيا و في حالي
و في حال كتير قوى اعرفهم


هوا احنا فعلأً زيهم؟؟

اعرف كتير قوى منضفين نفسهم شكلاً بس.... منظرهم قدام الناس
شكلهم يدي على متدينين
شكلهم يدي مثقفين
شكلهم يدي محترمين
شكلهم بيقول انهم ولاد ناس
شكلهم يقول انهم شباب ليهم هدف و ماشين عشانه

شكلهم بيقول حاجات كتيرة قوى.... تلاقيهم في النص بيعملوا حاجات ماتمتش بأي صلة لأي حاجة كويسة
تلاقيهم للاسف بعد فترة.... الي بره ده مجرد قشرة..
بس الي جوا فراغ...
او الي جوا فيه حاجة...
بس مجرد كلاكيع.. و حاجات بايظة
بيبوظوا نفسهم و الناس الي حواليهم


و لاقيت تانيين...
من جوا فيهم كويس اوى
بس مش مديين الانطباع ده للناس
ولا مهتمين الناس تقول عليهم ايه
ولا مهتمين بشكل و مظهر
مش مهتمين لما يكون يتقال عليهم مش متفوقين... لأنهم فعلأً مش متفوقين.. بس يقولوا الاسلام من جوا و صلاة و صوم و خلاص
مش مهتمين يكون شكلهم و لبسهم منسق ولا لأ...


شغلني الموضوع و كنت بفكر فيه كتير قوى قوى...
و قعدت بحاول اشوف انا مين فيهم؟؟


بتكلم انا و صاحبتي كتير عن الرياء و الاخلاص.. و احنا بنعمل اي حاجة بنعملها عشان خاطر ايه!

لاقتنا بنعمل حاجات بشكل تلقائى.. من غير اي تفكير مننا.... بس حاجات انا شخصياً مش لاقيالها اي تفسير
غير ان الي جوا مابقناش مهتمين بيه زي من بره
...


كان لسه من قريب اوى الشيخ صالح سلطان على قناة البحرين بيقول توصية..... لكل ربةو منزل
فيما معناها
قبل ما تيجي تنضفي شكل البيت من بره
اتأكدي انك بتهتمي انك تنضفي كمان الي جوا قلبك.. لأنه هوا ده الاهم
...

و هيا السبب في الصورة المفتكسة الي فوق دي
:d

...

احنا فين من دول؟؟
احنا بنعمل اي حاجة بنعملها عشان ايه؟؟

احنا من الناس الي بتهتم بالشكل بس؟ ولا الي بيهمنا اكتر ايه بالظبط؟؟


و الحياة اثبتتلي بجد... اي حد بيهتم بالشكل من بره... بيبقى اول حد بيقع
و بعد شوية.... الناس بتعرفه و تفهمه
ماحدش هيتخدع بيه بعد كده... لأنهم عرفوا بعد فترة و فهموه..


...
طيب تساؤل بجد..

الي بينضف الي جوا و يسيب اللي بره ... ده كويس؟ ولا لسه بردوا موصلش؟؟

و سؤال كمان... اسأل نفسك... انتا مين فيهم!!


كلامي ملخبط ؟؟ :)
ده غلطكم انتو بقى لازم تستحملوا التدوينة دي:d

البداية الطبيعية لكل مدونة

السلام عليكم و رحمة الله
المفروض انى اكون عارفة ابتدي كلامي منين و كده
:)
بس انا مش عارفة اي حاجة :d

و المفروض اقعد اتكلم عن سبب التدوينة دي.. و ليه الاسم ده.. و ليه الاسم بتاعي ده .. للناس اللي هتدخل البلوج و لس تعرفني لأول مرة :)

بداية الاسم بتاعي.. المجاهدة..
اسم بقالي بيه على النت حوالي سنتين... بقيت مرتبطة جدا بالاسم بشكل انا نفسي ماكنتش متخيلاه وقتها...
لما حد من الي عارفني و يناديني باسم مجاهدة بتبسط جدا بيه :)

اسم اخترته لأن في حياتي كان كذا حاجة كنت عاوزاها اوى.. و ماجتليش غير بعد فترة طويلة من الحرب القوية عشان اعرف اوصل للي انا عاوزاه:)

اسم بيخليني وقت ما اقع و ابقى مش ليا نفس اعمل اي حاجة.. يخليني افتكر انى اسم المجاهدة و المفروض اكون اقوى من كده.. ف بيساعدني اكون احسن ..
و بقيت بحبه اوى الاسم و مش عاوزة اغيره :)


سبب البلوج ده اصلأً... انى عاوزة ابعد عن كذا سلبية شفتهم فيا او في الاماكن الي كنت فيها... مش هنتكلم عن السلبيات دلوقتي :)
انى عاوزة يكون عندي القدرة انى اتكلم و اقول حاجات بفكر فيها كتير... بس البلوج ده هيساعدني اوى انظم افكارى...
هدخل مجتمع جديد ماجربتوش قبل كده :) و ادعو الله بشدة يكون الي انا مقبلة عليه ده فيه خير فعلأً ليا و اقدر اعمل فيه و من خلاله خير...

من كذا تدوينة لاخوة و اخوات افاضل... منهم الي قال اننا فات علينا اوقات كتيرة من غير ما ندونها.. ف ماحدش عارف اي حاجة ولا التاريخ عارف اي حاجة (الكلام ماكنش كده بالظبط بس ده المعنى العام :))
و منها زي ما قلت فوق انى فيه افكار كتيرة بتبقى في مخي.. ببقى عاوزة اطلعها و اتكلم عنها و اسمع رأي الناس فيها..



الاسم بتاع البلوج نفسه.. جسر التواصل
:d
انا قارفة كذا حد بقالي فترة في حكاية تسمية
my blog to be :D
و كذا اسم يتقاللي و انا افتكس كل شوية اسم

لحد ما ربنا يكرمها مها عزيزتي و من صديقاتي الصدوقين جداا:) قعدت معايا دلوقتي
طلعت عينها كتير انا عارفة:d
ظبطنا البلوج و طلع للنور اهو :)

و هيا صاحبة اقتراح جسر التواصل... و عجبني اوى :)

قبل ما يكون جسر للتواصل بيني و بين الناس

هيبقى جسر للتواصل مع نفسي.. عشان افهمني و اعرف ايه الي بيحصل جوايا :) و احاول ابقى احسن


الصورة... :d
كنت بضحك جدا على نفسى و انا بدور على صورة :d
مش لاقية اي صورة معبرة :d
بس دي عجبتني اوى....

انا إلى حد كبير بالذات الفترة دي... حاساني جوا مكان مضلم..
و عارفة ان النور بره و عارفة شكل النور و ألفته جدا... بس انا لسه جوا

ف الصورة لاقتها بتعبر عن نفسها بنفسها :)
ادعولي اعرف اطلع بره للنور تاني قريب
:)


بس كده... كفاية رغي :d