Monday, November 16, 2009

إن جنتي في قلبي


دخلت النهاردة محل جمب بيتنا، محل معروف في المنطقة كلها ان دول احسن ناس يصلحوا احذية و ساعات و احزمة
ناس نضيفة في شغلها و محترمين في تعاملهم
و هيا دي سمعتهم عند كل الناس
و كنت بتعامل معاهم كتير قوى قبل كده، بس النهاردة فضلت قاعدة في المحل اطول شوية من كل مرة

اول مرة الاحظ حاجة
المحل كله على بعضه حوالي مترين في تلات امتار
غير مرتب تماما
حاجات مكعببة فوق بعضها
ادوات قديمة جدا عنده في المحل اللي بيستخدمها
الناس اللي بيشتغلوا نفسهم - هما اتنين - بس لبسهم مقطع و على قدهم اوى
قاعدين على كراسي متبهدلة و طالعة من نفسها
بيشتغلوا بايديهم وسط صمغ و لزق و ادوات غريبة جداا
عندهم رف كده صغير اوى فوق حاطين فيه كوبايات ازاز بيشربوا فيها الشاى
و عندهم برطمان كده بيستخدموه للسكر
عندهم رف تاني عليه حاجات متقطعة و متبهدلة، و غالباً لسه مش عارفين يتصرفوا فيهم ازاي
كان فيه صوت معلق ماتش شغال، و مش عارفة الصوت شغال منين
غالباً راديو من الراديوهات القديمة اوى اوى دي
و طبعاً مش محتاجة اقول ان التراب في المحل ممكن يعمل كذا كيس لو اتجموع مع بعض

بس من ساعة ما دخلت لحد ما خرجت
و اصلاً كل مرة اروحلهم
الاتنين دول قاعدين بيشتغلوا حاجة ورا التانية ورا التالتة
مركزين اوى في شغلهم
على طول مبتسمين
اسعارهم بسيطة اوى، و ساعات تانية بحسهم بيقللو في السعر لو حد هما عارفينه و بيعمل عندهم حاجات كتير
و زي ما قولتلكم في الاول، سمعتهم كويسة جدا جدا في المكان حوالينا، في الشغل و الاخلاق

ازاي ناس قادرة تشتغل في مكان زي ده و ظروف زي دي، و مع ذلك بتتعامل مع احسن حاجة عندها بأحسن حاجة هما يقدروا عليها

لو جيت تشوف ناس تانية قاعدة في مكاتب مكيفة و بيبقضو مبلغ و قدره كل شهر و بيشتغلوا مع حاجات - اعزكم الله- احسن من الجزم و الاحزمة
و مع ذلك تلاقيهم مش قادرين يتفانوا في شغلهم - عشان بيتحججوا- ان الظروف اللي حواليهم مش مُهيأة
او تلاقيهم مش قادرين يبتسموا في وشوش الناس
او بيشتكو من اقل حاجة تحصلهم

الحالات دي موجدة منها كتيير قوى قوى حوالينا
يعني بصوا حواليكم، ممكن تلاقو بواب فيلا مبسوط بحياته اكتر من صاحب الفيلا نفسه
ممكن تلاقو عامل نظافة في محل مبسوط اكتر من صاحب المحل

مش بتكلم عن الفرق بين اللى ربنا ابتلاهم بفلوس عن الناس اللي ربنا ابتلاهم بقلة الفلوس
بس بتكلم على الناس اللي تبصلهم تحس ان جنتهم جوا قلوبهم، مش من المكان اللي هما فيه
مش محتاجين سبب عشان يبتسموا، ولا سبب عشان يتفائلو
بيبصوا لكل نعمة عندهم على انها نعمة فعلاً، مش تحصيل حاصل
بيستغلوا كل حاجة عندهم سواء صغيرة او كبيرة


جربت في مرة تخلي جنتك جوا قلبك؟؟

Tuesday, August 18, 2009

حاجات اتعلمتها

كنت مسافرة مع والدى الكام يوم اللي فاتو بره مصر، و عاملة بيقولوا ان من فوايد السفر ان الواحد بيتعلم
و فعلاً طول مانا هناك حاسة ان فيه حاجات كتيرة زادت عندي، و فيه معلومات اكتر دخلت، و فيه وجهات نظر مختلفة عن اللي كانت عندي
قابلت ناس مصريين هناك و شفت تعاملهم
قابلت ناس مختلفين عن اللي بنشوفهم كل يوم
و شفت مواقف غيرت من طريقة تفكيري


حاجة فيهم كنت بفكر فعلأً اعملها موضوع لوحدها، بس حسيت انى احسنلي اكتب كل اللي اتعلمته في نقط، مش في مواضيع كاملة.

* فيه ناس فعلأً حياتهم بتبقى متخبطة جدا مهما حاولو
و بيكون كمان فيه ناس بتدوس عليهم اكتر و تضيق عليهم اكتر
بس ساعات دول بيبقى كفاية عليهم - و اصلاً بيبقى احسنلهم- انهم مايكونش عندهم حاجة غير الاحساس بالرضا
هما بيعملوا اللي يقدروا عليه، و عمرهم ما بيوقفوا ولا بيستسلمو
و بيلاقو في اي مكان يروحوه حب الناس و قربهم منهم

* فيه ناس بتبقى قمة في التأنق، و بيعرفوا دايماً يختارو كلامهم و تصرفاتهم
و تعرفهم من بعيد تقول عليهم مؤدبين جدا و محترمين
و ساعات تلاقى الدنيا فعلأً في ايديهم
بس تلاقيهم قمة في الخبث و الشغل من تحت لتحت
ناس عمرك ما تستريح لتعامل معاهم ، و بعد فترة ولا حتى لمجرد الحديث معاهم

* و ناس تانية، تحسهم تايهيم و ضايعين
تحسهم مش فاهمين حاجة و متخبطين
تبقى في الاول بتتجنب كلام معاهم او تعامل معاهم
لحد ما تكتشف فجأة ان ربنا مديهم موهبة، مش عند= اي حد تاني غيرهم
مع انهم بيبانو في الاول مالهمش في اي حاجة
بس تجيلك المفاجأة دي، عشان تفضل فاكر دايماً نعم ربنا علينا كلنا، و ان مافيش حد مخلوق عبثاً!
كل حد ليه فايدة و ليه ميزة ربنا خالقها فيه، احنا اللي شغلتنا ندور عليها و نجيبها و نستفيد بيها على قد ما نقدر..

* مع انى عارفة ان الاعلام بيقجملنا صور مش حقيقة لحاجات او اماكل معينة عشان يغيرلنا وجهة نظرنا
بس مع ذلك كنت متأثرة بشكل معين بيقدمه الاعلام،ة خاصة الغربي
انا كنت في روسيا، و مع انى عمرى ما اتعاملت مع حد روسي ولا اتكلمت مع حد مسافر روسيا
ولا عندي اي معلومات في البيطخ عن روسيا
و مع ذلك فيه في مخي فكرة عن الروسيين- من اللي بشوفوا في الافلام- انهم ناس ناشفيين
بارديين، مش بيهمهم غير مصلحتهم
اغلبهم مسلحين او بيشتغلوا مع الكي جي بي
(اخر سطرين دول مبالغة طبعاً :d )
بس فكرة انهم باردين و ناشفين دي في مخي جدا

لما رحت هناك و اتعاملت مع الناس في الشارغ، و في المحلات
بجد ناساغلبهم طيبين
وشهم هادى و ملامحهم مرحبة بالناس حواليهم، حتى سهل انك تتكلم معاهم و تبتدي معاهم حديث
(على اعتبار انكو تكونوا بتتكلموا نفس اللغة :))

* اتعملت ان مش معنى ان فيه حد انتا بتختلف معاه في الفكر، انكو ماينفعش تتعاملوا مع بعض
ده انتو حتى ممكن تكونوا اصحاب مقربين...
بس مش هيجصل غير في حالة ان مخكو يكون مخ بيتقبل الاختلاف من البداية!

* اتعلمت ان مش كل التضحيات اللي الناس بتعملها عشاننا بنكون عارفينها
ممكن يكونوا بيعملوا تضحيات فعلاً كبيرة، و احنا مانعرفش عنها اي حاجة غير بعد فترة طويلة
ده احنا حتى ممكن نكون في النص - و احنا لسه مش عارفين- نكون بنعاملهم بطريقة لا تليق بيهم و لا تليق بحجم تضحياتهم
و مع ذلك هما يفضلوا مكملين فيها و مثابرين عليها، لأنهم بيتمنولنا الخير دايماً...

كان فيه حاجات كتيرة تانية كمان، بس دول اللي عارفة اعبر عنهم بكلمات مكتوبة دلوقتي...
يا رب دول يكونوا فادو اي حد فيكم بحاجة :)

ـــــــ
كل سنة و انتو طيبين :)
رمضان كريم

Tuesday, July 28, 2009

نعم منسية

كتير من كتر كل الحاجات اللي بتحصل في الدنيا ... بننسى
بننسى احنا ليه مخلوقين
بننسى احنا كنا عايشين ليه
بننسى احنا بنحب ايه و و بنكره ايه
بننسى النعم اللي عندنا
بقينا - زي ما بيقولو- كأننا تروس شغالين في ماكينة كبيرة
نقعد نجرى كل يوم .... و بطلنا حتى نفتكر احنا بنجرى ليه ولا عاوزين نحقق ايه

كنت كل فترة في حياتي اياً كان ايه اللي بيحصلي، لازم اخد شوية وقت لوحدي
عشان ارجع اقيم افعالي و تفكيري
و اشوف انا فعلأً ماشية على الطريق اللي نفسي فيه ولا حودت عنه في وسط الزحمة اللي موجودة في الدنيا
بس بقاللي فترة كل مرة اقف مع نفسي الوقفة دي... مابقاش عارفة اوصل لحل زي ما كنت بوصل زمان
كنت ببقى حاسة ان فيه حاجة غلط، بس مش عارفة اوصل هيا ايه، بالتالي مش عارفة اصلحها
لحد ما بدأت افهم الغلط اللي انا ماشية فيه
بدأت احس بأهمية النعمة، اللي بقالي فترة بنساها، او بتناساها بمزاجي في اوقات!
نعمة اننا عندنا مشاعر و بنقدر نحس

كنت من كتر ما اتجرحت و اتوجعت من مواقف و من ناس قبل كده
بقيت بنسى بمزاجي ان عندي مشاعر تترجم المواقف اللي بتحصل لمشاعر جوايا
عشان ببقى دايماً خايفة تأثر فيا بالسلب
ف بنسى بمزاجي اني استخدم المشاعر دي
مع الوقت، و من معرفتي الناس بتتصرف ازاي و رد فعلها ازاي، بقت اغلب الحاجات بالنسبة لي مش بترجمها لمشاعر ليا
لدرجة انى ساعات ببقى خايفة انى اكون بمثل قدام الناس بحاجة، و انا اصلاً مش حاسة بيها!
بمثل انى بزعل ، مع انى عودت نفسي ماستناش حاجة من حد، بالتالي مابزعلش
بس ساعات بعمل نفسي زعلانة قدامهم، مش عارفة حتى وقتها ببقى عاوزة اشوف منهم ايه!

كل ده... عشان بخاف انى اتجرح
و بخاف انى بعد ما ارفع املي في حاجة معينة، ارجع اتوجع بعد ما ماتحصلش
و بخاف انى افضل كتير موجوعة، من ناس انا ببقى عارفة انهم مايستهلوش اتضايق عليهم!

بس قعدت كده لدرجة انى نسيت اهمية المشاعر دي
نسيت اهمية النعمة دي
بجد الحياة صعبة اوى من غير مانستغل كل نعمة ربنا انعم علينا بيها
اصلها لو مش مهمة لينا، ربنا ماكنش هيديهالنا من الاول
ف توصل في الاخر ان حياتك فيها نقص، لأنك مش مستغل كل نعمة قدامك

حاولوا تحافظوا على اي نعمة عندكم طالما هيا عندكم

يا رب فكرنا دايماً بنعمك علينا
يا رب يسَرلنا دايماً نستغل نعمك في اللي يرضيك
يا رب وفقنا اننا نشكرك على نعمك

يا رب... فكرنا دايماً احنا اد ايه محتاجينك.

Wednesday, July 15, 2009

شوية شخبطة

....

عايزة اتكلم مع حد..... و مش لاقية حد اتكلم معاه!


عايزة اقول شوية حاجات... بس مش عارفة اقولها ازاي!

فيه شوية حاجات بفكر فيها... بش مش قادرة احطها في كلمات مفهومة

عاوزة اعمل حاجة... و مش عارفة هيا ايه

عايزة اقوم اتمشى بالليل وسط الشارع و هوا فاضى - للأسف مابقاش بيفضى في الصيف خالص- بس اقعد اتمشى مش عارفة اروح لفين و لا قد ايه

انا بقالي كتير قوى مابطلعش اللي جوايا...لدرجة انى مابقتش بعرف لما ابقى عاوزة
نسيت ازاي
و نسيت ليه اطلع اصلاً

كنت بتكلم النهاردة مع اخويا ان فيه كتير قوى بيقولوا عليا باردة... عشان مش بتعصب ولا بنفعل ولا بتنرفز على الحاجات اللي بتحصل في الشغل مثلاً
و انا مقتنعة ان مش دي الحاجات اللي تستاهل الواحد يضيع عليها اعصابه ولا وقته ولا تفكيره
ف انا بسيب حاجات كتيرة... بس مقتنعة بيها

بس ساعات بخاف ابقى من كتر مانا كده.... انى افضل طول عمرى كده
"حد فاهم حاجة؟ :)"


اللي بيقرى الكلام ده... انا اسفة انى ضيعت شوية من وقتك

انا متضايقة و مش عارفة متضايقة ليه

لأ... انا فيه حاجة مضايقاني و عارفة هيا ايه.... الفكرة، ان الحاجة دي عندي من زمان قوى ومش عارفة اصلحها
ف بقيت بتاقلم معاها
بس المشكلة انها كل ما ترجع تاني...كل ما اتضايق تاني
مش عارفة انا اللي مكبرة الموضوع و عاملاها مشكلة - من الاول اصلاً.
ولا هيا فعلاً مشكلة
ولا انا اللي بكبر الموضوع دلوقتي
"حد فاهم حاجة بردو؟ :)"


انا عاوزة اتكلم و فعلاً مش عارفة اقول ايه
و عاوزة اعمل حاجة و مش عارفة اعملها ازاي...
مش عارفة اعمل ايه اصلاً :)
وسط مانا كده افتكرت ان ليا مكان ممكن اكتب فيه
اكتب فيه شوية شخبطة.... مش عارفة... ممكن تفيد

Tuesday, July 7, 2009

FlightPlan

فيلم بيحكي عن ارملة بتنقل جثمان جوزها من بلد للتاني عن طريق طيارة
بنتها عندها ست سنين، مشوشة و متوترة من اللي حصل لوالدها
الام كمان متوترة و مشوشة، نامت وسط الرحلة، و صحيت مالقتش بنتها جمبها
دورت عليها في الطيارة مالقتهاش، و مالقتش اي حاجة تثبت ان بنتها كانت معاها في الطيارة
لا تأشيرة السفر بتاعتها، ولا شنطتها، ولا اي حد من الطيارة شافها
ولا المضيفات فاكرين انهم شافوها، و فيه ورق بيثبت ان الكرسي اللي كان جمب الأم كان فاضى من اول الرحلة
و فيه ورق بيثبت ان ماكنش فيه اي حد بإسم البنت من اللي متسجلين في الرحلة

في البداية الناس كلها في الطيارة كانوا متعاطفين معاها لأنها فقدت بنتها، و كانوا بيدوروا معاها
و طاقم الطيارة كله كان بيدور معاها
مع الوقت و مع كل الأدلة اللي بتثبت عدم وجود البنت، و مع كل الأدلة اللي بتقول ان السيدة دي طلعت لوحدها الطيارة
الناس بطلوا يدوروا، و بقوا مقتنعين ان الام دي يا اما نسيت بنتها في المطار
او هيا بتهذى من كتر تأثرها من فقدان زوجها

بعد شوية جت ورقة للطيارة من جهة رسمية ان بنتها توفت مع زوجها، ف الناس تأكدوا انها من كتر التوتر بقت متخيلة ان بنتها مسافرة معاها
و جات واحدة من المسافرين دكتورة نفسية تتكلم معاها و تهديها
و بتحاول تقنعها على قد ما قدرت ان الناس و هما في صدمة بيتهيألهم حاجات
او هما بيألفوا حاجات عشان مش قادرين يتقبلوا الواقع

الفيلم من اوله لحد اخر لحظة فيه و الأم دي بتحاول بكل اللي تقدر عليه عشان تدور على بنتها
بطلت تحاول تثبت للناس ان بنتها فعلاً موجودة
بقت بتشتغل لوحدها
مابقتش طالبة منهم مساعدة، بس طالبة انهم يبعدوا عنها و يدوها الفرصة انها تدور عليها لوحدها
بقت بالنسبة ليهم واحدة مجنونة
بتعمل اي حاجة و خلاص
و لمعرفتها بكل حاجة في الطيارة - لأنها مهندسة بتصمم طيارات - ف عارفة كل خفايا الطيارة و عارفة كل مكان فيها
عشان تدي لنفسها فرصة بعيد عن الناس اللي مقتنعين انها مجنونة و ماسكينها في مكان واحد
تسببت في بعض الأعطال الفنية البسيطة في الطيارة عشان تشغل المسافرين و الطاقم عنها عشان تدي لنفسها فرصة اكتر تدور على بنتها في كل مكان
للدرجة اللي خلت المسافرين كلهم مش طايقنها و كارهينها و بيطلبو من السلطات الرسمية في الطيارة انهم يحبسوا الست دي لحد ما الطيارة توصل

في اخر الفيلم اتضح ان كان فيه مختطفين عاوزين يخطفو الطيارة و يطالبو بمبلغ من المال و استخدمو الست دي لتنفيذ مخططهم
استخدموا سلطتهم هما انهم يعملوا اوراق رسمية تثبت ان البنت مش موجودة
بل تثبت كمان ان البنت ماتت
و نقلوا لكابتن الطيارة ان الست دي عملت تمثيلية كبيرة عشان في الاخر يبعتولها فلوس و إلا هتفجر الطيارة
الخبر اللي خلى طاقم الطيارة يكرهوا الست دي اكتر

تتوالى أحداث الفيلم و في الاخر فعلأً تعثر على بنتها و تكشف المخطط و و و

عامة ..انا مش جاية أقصد احكي أحداث الفيلم
اكتر حاجة هزتني هيا ان كل حاجة ضدها و بتؤكد انها مجنونة و بيتهيألها
و مع ذلك هيا استمرت أنها مقتنعة باللي هيا فيه

المسافرين معاها في الطيارة اتحولوا من متعاطفين و مساعدين، لكارهين و مثبطين في لحظات بسيطة
لدرجة انهم كانو بيسقفوا لظابط الشرطة في الطيارة لما مسكها بعد اخر محاولة ليها انها تدور على بنتها

و لما هيا لقت بنتها في الاخر كلهم كانوا بيبصولها و هما مكسوفين و محرجين ، انهم لا صدقوها ولا ساعدوها

ــــــــــــــــــــــــــــــ
انا مش فاكرة امتى اخر مرة كنت بحارب فيها كده عشان اجيب حاجة انها عاوزاها
مش فاكرة امتى كنت بحارب عشان حاجة بنفس القوة و اليقين اللي كانت فيه السيدة دي
القوة من كتر حبها لبنتها و خوفها عليها
و يقين انها متأكده انها موجودة و مش مفقودة في الطيارة ولا ميتة زي ما حاولوا يوهموها

امتى اخر مرة كنت بدافع عن حق ليا بالقوة دي؟؟؟
ولا حتى قوة اقل منها
امتى اخر مرة طلعت صوتي عشان ادافع عن حاجة بتاعتي

امتى اخر مرة فضلت مكملة في حاجة مع ان كل اللي حواليا شايفني مش هعرف اعمله و مش هعرف اكمل!!
امتى اخر مرة حاولت اكمل في حاجة و كل اللي حواليا بيتريقو عليا!!

امتى كان عندى القوة دي؟
او امتى كان عندي اليقين دي!

هوا انا بشتغل لاحلامى بنفس القوة دي؟؟
ولا بشتغل للي نفسي فيه بنفس اليقين ده!

و اكتر من ده كله....
انا بشتغل للجنة كده؟؟؟

Sunday, June 28, 2009

عودة

السلام عليكم و رحمة الله
:)
كل شوية ارجع و اقول هكتب، و بعدين اختفي بعد ما اكون لاقيت شوية ناس من يقرو كلامي تاني
و حالتي في تخبط كل شوية

المهم انى بقالي فترة كل شوية تيجي حاجة في مخي، و اقعد اقول يا ريتني بكتب في المدونة دلوقتي ولا على اي منتدى عشان اترجم الافكار اللي في مخي لكلام و ناس تدخل تعلق
انا فعلاً محتاجة انى اكتب اللي جوايا
محتاجة انى اطلع اللي جوايا، سواء في حد هيقرى او مش هيقرى
انا مفتدقه حد يسمع كلامي و يديني نصايح وقت ما اكون محتاجة
او حد يسمع و خلاص، و هوا مهتم

ف ان شاء الله - ان شاء الله تاني- انا هرجع اكتب تاني
سواء حد لسه عايش معايا بيقرى اللي بيكتب او لأ
انا هكتب عشان نفسي اطلع اللي جوا و خلاص

لو حد بيقرى... منورين المدونة :)

ــــــــــــــــــــــــــــــــــــــ
هكتب عن اخر موقف في مخي دلوقتي
و كنت لسه بتكلم فيه الصبح مع صحابي من ايام المدرسة

مع اننا كنا اصحاب اوى ايام المدرسة، كنا مع بعض كل يوم
و كل يوم بنبقى مع بعض اغلب اليوم
كنت فعلأً بشوفهم اكتر من اهلى اللي معايا في نفس البيت
و بعدين افترقنا كل حد فينا راح لكلية
و كل حد طلع من الكلية و اشتغل في مكان واخد وقته و جهده
مع الوقت بقينا قليل اوى اما بنشوف بعض
و بنسأل على بعض مرة كل شهر، كل شهرين
فيه ناس منهم بعرف اخبارهم بالسنة
بس انا لسه بحبهم كلهم
و عارفه صدق نيتهم
ان فعلاً فيه حاجات كتيرة لو كانت في ايديهم كانوا هيغيروها

غير كده، بحبهم عشان بيقبلوني زي مانا
من غير ما يحاولوا يغيروا فيا او ينتقدوا او يعملوا اي حاجة لأي حد فينا تغير من حياته
كل حد فينا ليه توجه، و ليه اسلوب حياة، و ليه طريقة
فعلأً مختلفين عن بعض تماما
و مع ذلك، بنتقبل كلنا بعض من غير اي انتقاد او اي محاولة تغيير عشان يمشو معانا

كننا بنتكلم النهاردة عن ازاي فيه ناس نعرفهم في حياتنا، و هما بُعاد عننا، و مانعرفش عنهم اي حاجة
يهم صنفين، ناس فيهم مهتمة و فعلاً صادقة
و ناس بتدى اعذار مالهاش لازمة و شكل الموضوع مش فارق معاها

و هحكلكلم على الصنفين دول في حياتي، لموقف حصل قريب اوى اوى، انا لسه في الموقف ده حتى


من يومين و انا نازلة على السلم وقعت و جالي تمزق في الاربطة و رجلي اتجبست
و هفضل في الجبس اسبوعين تلاتة و الدكتور موصيني انى على الاقل في الاول ماتحركش كتير، بعد كده ممكن اتحرك بس طبعاً مش بالدرجة و واخدة اجازة من الشغل

صحابي بتوع المدرسة فيهم واحدة لسه راجعة من السفر قريب و لسه ماشفتهاش
اول ما عرفت على اللي حصللي كلمت اتنين كمان و جولي في البيت على طول عشان يطمنوا عليا
ناس ماشفتهمش بقالي سنة - عشان ظروف كل حد فينا- بس اول ما عرفوا على اخبارى ماترددوش لحظة واحدة و لو في حاجة بسيطة
واحدة تانية من المدرسة اول ما عرفت جاتلي في لحظتها على البيت


واحدة تانية، كنت متفقة معاها على معاد من اسبوعين
صاحبتي بقالها بتاع خمس سنين مثلاً، و فعلأً كانت في الاول من اكتر الناس اللي وقفت جمبي في مشكلة كانت عندي في حياتي
و كنت ساعتها بدعيلها تقريباً كل يوم
و بجد وقفت جمبي اوى ربنا يباركلها بجد
و بعدين حصلي موقف تاني و كنت محتاجاها، و هيا ساعتها كانت مشغولة في حياتها
و والله مع انى كنت متضايقة لعدم وجودها إلا انى فعلأً سامحتها و قدرت انها عندها حياتها
و بقالنا كتير اوى مش بنتكلم غير كل كام شهر مرة
نتطمن على بعض و خلاص
و والله مش فاكرالها غير كل خير
و بعدين اتفقنا على معاد من فترة اننا نتقابل فيه
بعتلها قلتلها على رجلي و انى ماينفعش اخرج من البيت دلوقتي
بعتتلي رد حسستني فيه انها مش مصدقة كلامي و انى بطلع اي عذر و خلاص
و انها ماعندهاش تعليق على اللي بيحصل

فكرت جدياً وقتها انى ابعتلها صورة ليا و انا بالجبس.... و بعدين صعبت عليا نفسي
مش صعبت عليا عشان شكلى بالجبس... بفضل الله الموضوع كله مش مأثر معايا بأي درجة
بس صعبت عليا نفسي انى اكون بقولها حاجة و هيا مش مصدقاني

حسيت ان الموضوع فعلأً مش مستاهل....


لما جُم صحابي النهاردة بتوع المدرسة افتكرت البنت دي اوى
افتكرت اد ايه انا اصلاً بطلت استني اي حاجة من اي حد... لا حاجة كويسة ولا حاجة وحشة
افتكرت انى بقدر حياة كل واحد و انشغاله، حتى لو كنت محتاجة حد جمبي و مالقيتوش
انا مقتنعة ان اللي انا محتاجاه لحياتي ربناي هيبعتهولي
لو موقف معين و ربنا عارف انى مش هقدر اكمله لوحدي هيبعتلي انسب و اجرد حد يقف جمبي فيه
حتى لو انسب حد ده مش حد انا متوقعاه
عشان كده بطلت ازعل من الناس لو مالقتهمش جمبي
بقدر ظروفهم و موقفهم و ببقى متأكده ان ده الخير ليا و ربنا هوا اللي يّسره

بس لو هتوصل لدرجة ان حد فعلاً مايبقا فارق معاه اي موضوع
و كمان يكون بيكدّب كلامي.... فعلاً الموضوع مش مستاهل

الحمد لله .....


انا عارفة ان كل كلامي ملخبط و كل افكارى ملخبطة
عشان كده عاوزة افكر اي حد بيقرى ان ده سبب انا ليه رجعت اكتب تاني :d
انا بقالي كتير مش بعرف اوضب افكارى ولا اوضب اللي عاوزة اقوله، و بقالي كتير مش بطلع اي حاجة انا بحس بيها بره
ف طبيعي ان اول مرة من زمن ارجع اكتب تاني او اتكلم يكون الكلام مكعبر :)

جزاكم الله خيراً اللي لسه بيقرى المدونة
و يا رب تكونوا بخير :)