Saturday, April 19, 2008

حين يصبح المهم اقل اهمية




امبارح حضرت مناقشة بين تلات سيدات، ماحبتش اتدخل فيها بأي طريقة غير انى اكون مستمعة لاسباب كتيرة ممكن ابقى اذكرها اخر التدوينة
كل واحدة فيهم متطرفة في ناحية ليها اوى
منهم دكتورة سافرت فرنسا فترة طويلة من حياتها و شافت الاحداث هناك من مسلمين و علمانيين و فرنسيين
و راجعة بفكرة في مخها و مصممة عليها بشدة
منهم طالبة بتحب تقرى كتير و تثقف نفسها كتير، من خلال تعاملها مع الناس و من خلال نشاطتها المختلفة كونت وجهة نظر و مصممة عليها بشدة
منهم طالبة في كلية تانية، بردو قرائتها كتيرة بس في مجالات تانية و من خلال تعاملها و احتكاكها مع الناس كونت وجهة نظر و بردو مصممة عليها بشدة

و كان النقاش بينهم محتدم جدا
ابتدى بتوافقهم في حاجات معينة، و بعديها بدأت نقاط الاختلاف القوى و التعصب للرأي لكل منهم يظهر

بس بصراحة كان نقاش محترم أعجبت بطريقته فعلاً، مافيش حد فيهم كان بيحاول يجبر الاخر على انه يعتنق نفس تفكيره
و لكنهم كل حد فيهم بيدافع عن تفكيره بشدة، بطريقة تدعو للاحترام الحقيقة

كان اغلب نقاشهم بيتمركز عن الدين بطريقة او بأخرى، طريقة المسلمين في التعبير و لأي مدى هم احرار في طرقهم و تعبيرهم
الدكتورة من واقع معايشتها في فرنسا و رؤيتها لحاجات متطرفة في الدين
الطالبتين الجامعيتين من واقع محاكتهم للطلبة في الجامعة او من خلال انشطتهم

هما للاسف كانوا شافو نماذج سيئة للمسلمين، و للاسف ربطوا ده انه قصور في امكانية التطبيق و اماكانية التعامل في ظل وجود الدين

الدنيا للاسف ملغبطة جدا بالنسبة ليهم، او على الاكثر بالنسبة لاتنين فيهم
بس حسيت انى عذراهم إلى حد ما في طريقة تفكيرهم بسبب اللي شافوه

لما اتحول الجميع فجأة إلى متدينين، النوع ده من التدين الجديد اللي طغى على ناس كتيرة قوى فجأة
التدين اللي بياخد من الدين قشور بسيطة
مع الدين عبارة عن دايرة كبيرة، عشان تتقنها لازم تبقى فيها كاملة و تعمل بكل شئ فيها

بس لما اتحول الناس لعابد بس
بيصلي حلو اوى و كتير قوى و بيصوم كل النوافل و حافظ للقرأن
بس بلا معلومات عن الدنيا و بلا اخلاق و بلا حسن تعامل ولا حسن تفكير مع الناس
يصبح اللي معاه كله اقل اهمية

لما يكون التدين عبارة عن قطعة من القماش فوق الرأس على اساس انه حجاب و قرب إلى الله
بس بلا حياء و بلا عفة و بلا معلومات و بلا تربية
يصبح اقل اهمية

لما يكون السمت الاسلامي واضح على شخص، من لحية و تقصير للبنطال و لبس محتشم واسع للمرأة مع لبس امهات المؤمنين بتغطية الرأس و الكف
بس بلا نظافة و بلا ترتيب و بلا نظام
يصبح اقل اهمية
و بيعطي فرصة للجاهل انه يقول ان التدين رجعية، او انه عودة لحياة البدو

لما يكون التدين عبارة عن اخلاق جميلة و معلومات رائعة و ثقافة هائلة
بس بلا مسانده بالعبادات و لو حتى الفروض
تصبح الاخلاق دي كلها اقل اهمية

لما يكون التدين عبارة عن علم و ثقافة
بس بتكبر و استعلاء
يصبح كل شئ اقل اهمية

لما التدين يكون عبارة عن عبادة رائعة و اخلاق متكاملة و تعامل مع الناس بشكل جميل و انساني جدا
بس بفشل في العمل و فشل في تحصيل حاجة ذى اهمية
يصبح اقل اهمية
انا لما بشوف ناس بتتكلم بطريقة وحشة عن المسلمين او المتدنين، بصراحة من جوايا ساعات بكون عاذراهم
الدين بتاعنا رائع لا شك في كده
بس فيه عيوب من المسلمين اليومين دول"مش كلهم طبعاً" في فهم و تطبيق الدين

أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ

الدين كامل متكامل
و اذا تم تطبيقه صح هنوصل لحاجة كبيرة قوى
زي زمن الصحابة
كانوا واخدين الدين كله على بعضه
مش سايبين منه حتة
بالتالي كان كل شئ ليه اهميته
و بالتالي هما كمان كان ليهم اهميتهم في الاسلام
و ليهم اهميتهم على مدى التاريخ

لو عاوزين نبقى مؤثرين في الدين، او مؤثرين في الناس اللي معانا بطريقة ربنا يرضى بيها عنا
ميانفعش نفضل ناخد من القشور و نسكت
لأنها لوحدها مش هتبقى ليها اهمية كبيرة...

5 comments:

محمد عبد الغفار said...

كلامك جميل كله ومنطقى

بس متقوليش قشور

قولى جزء قولى بعض انما قشور لأ

المجاهدة said...

هيا ممكن تكون قشور فعلأً كلمة بتخليهم اقل فعلاً
و ممكن يكون سوء استخدام مني في اللفظ اعتذر عليه

جزاك الله خيراً على مرورك و تعقيبك و تنبيهك :):)

ma 3lina said...

السلام عليكم
كيف حالك أختنا المجاهدة
يارب تكوني بخير حال

اسمحي لي اقول رأيي واحاول اوضح فكرتي

كون هناك عابد يأتي ببعض القشور كما أسماه الناس ولكنه يقصر في جوانب أخرى كالمعاملة أو العمل أو العلم .. فدا فعلا معناه إن فيه قصور

والقصور مش عنده هو بس

القصور عند من يظن أن ما اتى به صاحبنا دا اقل أهمية ..

لأن الإنسان بطبعه عنده جوانب بيبرع فيها وجوانب مقصر فيها .. ومين اللي له الحق ان يحرم انسان من حسنة صغيرة تخفف عنه عذاب يوم القيامة أو ترفع درجته في الجنة لمجرد إنه شايف انها اقل اهمية من وجهة نظره من حاجات تانية

وإذكرهم بألا يحقرن أحدهم من المعروف شيئا ولو أن يلقى أخاه بوجه طلق ..

رب أشعث أغبر ذي طمرين لا يؤبه له لو أقسم على الله لأبره ..

تقسيم الدين لقشور ولباب اختراع مرفوض جدا ويكفي ما فيه من التلميح بأن بعض ما جاء به النبي غير هام وهو عين تقسيم الدين والأخذ ببعضه والكفر ببعضه

أما لأن الشريعة كاملة فمطالبة الناس بالكمال والأخذ بجميع جوانبها فشيء كويس لكن الغلط إنهم لما لا يأخذوا بأعلى ما فيها نعيب عليهم ونعيرهم بأخذهم بالقليل .. ونحقر قليلهم ونزعم أنه لا ينفعهم .. فدا اظنه نوع من التشدد والتطرف كما ذكرت والأولى الإرشاد بالتمسك بما في يديهم من قليل العمل وحثهم ودفعهم للمزيد من العمل

اعتذر عن الإطالة وأرجو ان اكون وضحت وجهة نظري

المجاهدة said...

جزاك الله خيراً اولاً على اهتمامك و وقتك للتوضيح
و انا متفقة مع حضرتك
و اعتقد العيب مني في ايصال اللي كنت عاوزة اقوله او اقصده

انا مش بتكلم على اللي بيحاول
و لا بتكلم علي اللي بيجاهد نفسه

انا بتكلم عن اللي مشى في منطقة معينة و قصر الدين عليها
بتكلم على اللي افتكر ان الاسلام عبارة عن صلاة في الجامع فقط
بس بتسيب كبير اوى في باقى مجالات الحياة
مما يسبب نفور من باقى الناس للي بيصلي في الجامع
مع اخذ في الاعتبار مدى اهمية الصلاة في الجامع


مممم
من النماذج اللي سمعتها من مناقشتهم انهم ذكروا ان ممكن حد يعمل جريمة و يمشى تاني يوم بالنقاب و يختفي تماما و الحكومة عمرها ما هتعرف تمسكه او تقرب منه

مع ان النقاب برئ من هؤلاء، و النقاب اصلاً مش جاي كده
بس حصل كده للاسف لأن على مدار الزمن كان فيه قلة بيتخذو من شعائر الاسلام وسيلة لاغراضهم الشخصية
و للاسف وجود ضعاف القلوب و وجود منافقين و وجود ناس ذمتهم ضعيفة، خلى الموضوع ده ممكن يكون منتشر

عشان كده اقصد اقول الحل اننا ماينفعش ناخد بعض الدين و نسيب البقية
اللبس يمشى مع الحشمة يمشى مع العبادة يمشى مع الاخلاص يمشى مع التعامل مع مع مع



انا مش بقول اقل اهمية انه مالهوش اهمية
انا اقصد انه اهميته بتقل عن اهميته الحقيقية


ممم
هوا انا بقالي كتير مابعبرش عن رايي او الاغلب مش بفكر في اراء ف ممكن عندي قصور في توصيل اللي اقصده دلوقتي
لو المعنى ماوصلش لحضرتك بردوا يا ريت حضرتك تنبهني، لان المعنى اللي حضرتك قلته بعيد عن اللي اقصده
:)
جزاك الله خيرا عامة ربنا يكرمك:)

و عليكم السلام و رحمة الله
:)

ma 3lina said...

جزانا الله وإياكم

وكلامك واضح ما شاء الله

ربنا يبارك فيك ويرزقك الثبات