Tuesday, November 27, 2007

لنا عودة :)

عودة للكتابة ان شاء الله مرة تانية
:)

بجد مفتقداكم اوى اوى :)

ده مش موضوع ولا حاجة
انا بس شبه بحجز مكان :d

عندي تلات تاجات اتنين منهم مخللين

تاج من بنت ابيها... عذراً للتأخير ده كله:)
تاج او اتنين او تلاتة :( من مها.. معلش يا لاوتس على التأخير انتى عارفة الدنيا عاملة ازاي :)
تاج من اخ وضاح :)


ربنا يعلم اد ايه مفتقداكم بجد :)
و اد ايه مفتقدة الكتابة

ربنا يبارك فيكم و يكرمكم يا رب

Tuesday, October 23, 2007

كلنا هذا الرجل

كتير مننا لما بتصيبه ازمة او مشكلة في حياته بيبقى متخيل انه الوحيد اللي حصله كده
و بيتخيل انه اكتر حد في الدنيا تعب او اتظلم او اتعرض لابتلاء

مع انه لو دوّر حواليه شوية هيلاقى انه فيه كتير غيره في نفس الموقف اللي هوا فيه

ده ممكن يلاقى حتى ناس اكتر منه في الابتلاء
و ممكن يلاقى بعضهم حتى اكبر منهم في صبرهم على الابتلاء


ساعات لما الواحد بيفضل قاعد مع نفسه من غير اي مشاركة بيبقى متخيل ان هموم الدنيا كلها عليه

و لو فكر في يوم انه يشارك همومه مع شخص بيحس بارتياح اكبر و اشد
و ارتياحه ده بيزيد اكتر لو سمع قصه مشابه لقصته
لناس مرو بنفس الموقف و عدو منه بسلام

بيستفيد من تجربتهم و يتسفيد من قصتهم

بيستفيد انه وزع الهم اللي عنده عليه و علي حد كمان يقدر يستوعبه و يقدر يشيل همومه


انا كان عندي حاجة مضايقاني قوى بقالي فترة
ابلتلاء بحسه من الابتلائات الدائمة
اللي مش بتخلص بعد اسبوع او اسبوعين
ولا حتى شهر ولا شهرين

عندي مشكلتين بقالهم معايا سنين
مشاكل كتيرة بتيجي و تخلص و دول معايا
ف كنت عايشة في تعب قوى اوى

لحد ما في يوم كنت بتكلم مع صاحبتي و بفضفض معاها
لاقتها عندها مشكلة شبيهة لمشكلتي

من يومين بكلم واحدة تانية لاقيتها بتقولي انا عندي مشكلة كذا و كذا
نفس مشكلتى

و امبارح واحدة كمان قالتلي انها عندها مشكلة كده

بصراحة انا لما عرفت انى مش الوحيدة فى الدنيا ارتحت

لأنى عرفت ان فى غيري بيعانو من نفس المشكلة

دى مش مشكلة اول مرة تحصل في تاريخ البشرية
لأ دي مشكلة و ليها حل اكيد
و زي ما هيا مشكلة اكيد ربنا بيبعت معاها رحمات من عنده عشان تصبر الواحد لحد ما يجتازها

علمى ان ربنا مطلع على كل الناس بيخليني استريح ان حقى عمره ما هيضيع
إن كان ربنا فضلني بشئ على اي من عباده ف دي لحكمة عنده
و ان كان ربنا منع عني اي شئ و اداه لبقية عباده... بردو حكمة منه
لعلى استفيد باللي عندي و استفيد من اللي مش عندي بردو



ممكن البوست مافرقش مع كتير منكم في حاجة
بس انا استريحت بكتابته
:)


Monday, October 15, 2007

عيدكم مبارك :)

السلام عليكم و رحمة الله

:)

فعلاً مفتقداكم اوى
و مفتقدة الكتابة اوى
و مفتقدة التفكير عشان اكتب و التحضير ليه و لو بشئ بسيط... مفتقداه جدا جدا جدا بجد


كل سنة و انتو طيبين :9
ربنا يتقبل منكم رمضان
عساه يكون فتحة خير عليكم للسنة دي و لبقية حياتكم ان شاء الله :9


كل سنة و انتو طيبين عشان العيد



تقريباً اكتر لحظة بتضايق منها في حياتي
هيا بعد اخر مغرب في رمضان
اما يبقى خلاص مافيش تاني يوم رمضان تاني

زي ما بحس اول يوم ان الشيطان بتصفد و تسلسل
و ان ابواب الجنة بتتفتح و ابواب جهنم بتغلق

بحس اخر يوم ان الشيطاين راجعة تاني بقوة و ان ابواب جهنم بتفتح على مصراعيها

احساس وحش جدا جدا و احساس بالغربة قوىاوى

الحاجة الوحيدة اللي بتهون عليا الافكار دي ان تاني يوم بنروح نصلي صلاة العيد

المشاعر وقتها اللي بتنتابني كل سنة و رؤية الناس كلهم بيكبروا مع بعض و يلصوا مع بعض و الجوامع مليانة
اطفال و كبار و شيوخ

كلهم جايين عشان صلاة العيد
دي الوحيدة اللي بتهون عليا انقضاء رمضان

ربنا يرحمنا جميعاً و يتقبل منا احسن اعمالنا


نفسى ارجع تاني اكتب و كده
بس لا حالتي النفسية ولا الفكرية تسمح بأي حاجة دلوقتي
و اول حاجة بدأت اكتبها بعد رمضان طلعت بشكل مش قوى و حاجات كتيرة واقعة


احمد لله على خير حال

لا تنسوني من صالح دعائكم :)

و انا بتذكركم من دعواتي بالخير و جميع المسلمين


جزاكم الله خيراً كثيرأً
:)


Monday, September 10, 2007

المهم الهدف

ماكنش ليا نفس الحقيقة انزل اي بوست تاني بعد بوست رمضان... و ابقى اكمل بعد رمضان
بس الحقيقة نقطة وقفت عندها امبارح كتير
غيرت كتير اوى من تفكيري اللي فضلت عليه فترة طويلة

كتير اعرفهم وصلوا انهم يحققوا الهدف بتاعهم
على مدار سنتين او تلاتة او ممكن اكتر.... المهم انهم وصلوا دلوقتي للهدف بتاعهم
قعدوا يشتغلوا عليه و يتبعوا لحد ما وصلوله

صحيح مع اختلافى معاهم في اهمية الهدف ده من ناحية دينية... بس هما عايشين عشان هدف و حققوه
قلة فهم منهم في الاولويات و الدين... خلاهم ماعرفوش يظبطوا الهدف صح
بس وصلوله في الاخر اللي هما محددين عليه من زمان اوى

كنت مبسوطة ليهم اوى انهم حققوه
في نفس الوقت متضايقة ليهم انهم ماعرفوش يختارو هدف يكسبوا بيه دنيا و اخرة

النقطة دي نقلتني لنقطة تانية في تعاملاتي مع الناس
حاجة وصلتلها امبارح و بدعي ربنا يثبتني عليها

اننا لما نكلم انسان شايفينه بيعمل حاجة غلط
مش حاسة ان الوصف الانسب في مخنا ليه انه عاصى
هوا مجرد انسان... بيعمل الصح و بيعمل الغلط... الغلط عنده اكتر شوية
بس ربنا يهديهم يعرفوا يوصلوا لأحسن من كده

كنت لما بقعد مع ناس معينة قبل كده القعدة كلها ابقى زهقانة لأني شايفاهم على بعضهم غلط

امبارح لما فكرت اقعد معاهم انهم بشر الاول
لاقتني بتقبل كتير اوى بيعملوه و شايفه الكويس اللي هما بيعملوه
وقت الغلط بمشى و اسيبهم

بس لما ابصلهم انهم بشر.. انسان...
بيعمل الكويس و بيعمل الوحش
ده مخليني اتقبل منهم الكويس اكتر
و مخليني عندي القدرة اكتر انى اصبر عليهم و اتحملهم حتى لو فيه عندهم غلط بيعملوه

بابايا كان بيقول للمدمنين اللي بيحاولو يتلقو علاج في وسيلة لتحسين العلاج
انتا مش مدمن
انتا شخص بتتعالج من الادمان

زي ما تيجي تتكلم عن شخص عنده مرض نفسي
ماتقولوش انك مجنون او انك مخك بايظ
قوله انتا شخص بتتعالج من مرض كذا

يفهم انه ده مرض عنده مش المرض تملك عليه


نفس النقطة انا شايفاها بالنسبة للناس دي

انى اقول في مخي ده عاصى
بيخليني ابعد عنه لمجرد التفكير انه عاصى
اما افكر فيه انه انسان بيعمل الصح و بيعمل الغلط
بيديني فرصة اكتر اقرب من الصح عشان افهم مداخله... بعديها اعرف انصحه يبعد عن الغلط



بصراحة اما وصلت للنقطة دي استريحت اوى و حسيت انى مبسوطة
لأني من زمان ببعد اوى اوى عن ناس و مش عارفة اشوف فيهم النقطة الكويسة
اول ما ابتدي افكر ان فيهم نقطة كويسة بعرف اتقبلهم و بالتالي اعرف مداخلهم و بالتالي تسهل طريق الدعوة بحد كبير

المهم الهدف من قعدتي معاهم هيا ايه :)
و المهم انهم مايأثروش عليا سلباً بعد كده...
و المهم انى قبليها اكون فاهمة كويس الصح ايه و الغلط ايه

و المهم بردو انى اعرف انى كان زماني بقيت زيهم لولا فضل الله عليا و انه من عليا بالاسلام
و لعل الله يحدث سببا عشان ياخدهم هما للهداية
و لعلي اكون انا السبب ده ... ف لازم اعرف افتح قلبي كويس عشان اتقبلهم إذا كنت اريد ان احدث فرقاً


بس كده :)
اسرع بوست في حياتي تقريباً :D

ناقصلي تاجين ان شاء الله بعد رمضان :)
كل سنة و انتو طيبين
ربنا يبلغنا جميعاً رمضان و ييسرلنا العبادة و يتقبلنا من عباده الصالحين


Wednesday, September 5, 2007

عن رمضان

ممم
بصراحة فيه فكرة كذا بوست في مخي... بس حستني اكتر محتاجة اكتب ده دلوقتي
ليا و ليكم ان شاء الله....

كتير اتكلموا عن رمضان و لعل كلامي مش هيضيف اضافات قوية عند البعض
بس كلام سمعته من شيوخ مختلفين اول مرة ابصله من الناحية دي
البوست ده مجرد تذكرة ببعض النقاط في رمضان ان شاء الله...

ـــــــــــــــــــــــــــــــــ
تذكرة من الدكتور راغب السرجاني
مؤخوذ من حديث الرسول عليه الصلاة و السلام

من حفظ ما بين لحييه و فخذيه دخل الجنة
و اللحيان هما عظام الحنك

ف من حفظ لسانه عن ايذاء الناس و عن الغيبة و عن النميمة و عن قول الزور و قول ما يغضب الله

و من حفظ نفسه و وقاها عن اي شئ إلا عن الحلال
ضمن له رسول الله عليه الصلاة و السلام الجنة

سبحان الله لما تبص للحديث ده تلاقى ان في رمضانوقت تدريبي و وقاية من عند الله عشان نحفظ و نضمن ما بين اللحيين و الفخذين بما يرضى الله

إذا كان من يعمل كده بره رمضان ف له ثواب عند الله بالجنة
ف ما بالك باللي يعمل كده في رمضان و بعد رمضان دوماً و رمضان شهر الرحمة و المغفرة!!!


ـــــــــــــــــــــــــــــــــــــــــ

تذكرة من الشيخ محمود المصرى و الدكتور راغب السرجاني
اننا في رمضان بنصوم من الفجر للمغرب عن الطعام و الشراب
و هيا امور في اصلها حلال
و نمسك عنهم طاعة لله عز و جل و اقتداء باوامره

ف ان كنا نمتنع عن الحلال
ف مابالك بالحرام؟؟

ينفع حد يسيب الحلال عشان يقرب من ربنا
و في نفس الوقت يبتعد عنه بذنوب و معاصى مش قادر يبتعد عنها؟؟

ينفع حد يمسك نفسه عن الشهوة الحلال في المأكل و المشرب
و يجاهد نفسه للصبر على الطاعة
و لا يجاهد نفسه للبعد عن المعصية في نفس الوقت؟؟؟؟


ـــــــــــــــــــــــــــــــــــــــــــ
تذكرة من الدكتور راغب السرجاني
ان رمضان بيربي فينا كثير من التقوى
و كانت دي من الاسباب اللي ربنا بينهالنا في الصوم
يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَِّكُمْ تَتَّقُونَ

التقوى من الاسباب اللي ربنا بينهالنا بنستفيد منتها بالصوم
و بنلاقى فعلأً ده فينا
اما واحدة تفضل في المبطخ مافيش غيرها في المطبخ و ماحدش شايفها
و هيا جعانه و تعبانة و مجهدة من الصيام و من التحضير
و مع ذلك عمرها ما تقول هحط الاكل في بقي ماحدش شايفني
لأنها حاسة بمراقبة الله عز و جل لها، و ان انقطعت عنها اي مراقبة اخرى

و لعلها حدثتها نفسها انها تذوق الاكل حتى عشان توشفه ايه نظامه و لكنها تأبي
عشان هيا مستشعرة بمراقبة الله عز و جل


و اي حد فينا وقت الوضوء، اخشى ما يخشاه انه يبلع بعض المياة من الوضوء و هو يمضمض فمه
مع ان مافيش حد شايفه و مافيش حد مطلع عليه
و لكنه يشتعشر مراقبة الله عز و جل

الحاجات دي بتحصلنا كلنا، و بتحصل لأي شخص سواء ملتزم او غيره
فعلاً الصيام بيربي تقوى و بيربي بشده استشعار الشخص بمراقبة الله عز و جل له

ف ما بالك ب 30 يوم كاملة تستشعر فيها هذا المراقبة و تنميها فيك
ان شاء الله تيجي اثاراها و تشوفها بنفسك في بقية ايام السنة
و بقية سنين عمرك ان شاء الله

ـــــــــــــــــــــــــــــــــ
تذكرة من الشيخ محمود المصرى
كان بيقول ان فيه اصلأً اوقات تستحب فيها العبادة
مثلاً الثلث الاخير من الليل في كل ليلة
حين يتنزل الله عز و جل و يقول هل من داعٍ فاستجب له؟ هل من مستغفر فاغفر له؟ و هكذا إلى طلوع الصباح

ف ما بالك بالثلث الاخير من اليل في رمضان؟؟؟
اي رحمة و اي بركة في العبادة و القيام و الصلاة و الذكر و الخشوع هتحص بيها في الثلث الاخير من ليل رمضان؟؟؟



الدعاء ما بين الاذان و الاقامة مستجاب كما اخبرنا النبي عليه الصلاة و السلام
ف ما بالك بالدعاء بين الاذان و الاقامة في رمضان؟؟ و هو شهر لزيادة الحسنات!!!

الجمعة إلى الجمعة كفارة لما بينهم كما اخبرنا النبي عليه الصلاة و السلام
ف ما بالك بالجمعة إلى الجمعة في شهر رمضان؟؟؟


رمضان فعلأً شهر العبادة
اغتنمو اي فرصة و اي ثانية حتى
احنا ممكن يقف دخولنا الجنة على حسنة واحدة
ف بلاش تستقلوا بأي حسنة مهما حستوها صغيرة
او مهما كنتو تعبانين!!


ــــــــــــــــــــــــــــــــــــ
تذكرة قديمة شوية مالهاش علاقة برمضان دلوقتي ف احب انى اذكرها دلوقتي لي قبل ما تكون ليكم

الصبر ثلاث انواع
صبر على الطاعة
و صبر عن المعصية
و صبر على المقدور

الصبر على الطاعة اعلي انواع الصبر
رَبُّ السَّمَاوَاتِ وَالأَرْضِ وَمَا بَيْنَهُمَا فَاعْبُدْهُ وَاصْطَبِرْ لِعِبَادَتِهِ هَلْ تَعْلَمُ لَهُ سَمِيّاً

اصبروا على الطاعة و جاهدوا نفسكم عليها
كل لحظة بتفرق و كل لحظة تزود جواك خشوع اكتر و تربي في قلبك اكتر قرب من الله

اصطبر عليها
اصطبر عليها
اصطبر عليها


ــــــــــــــــــــــــــــــــــــــــــــــــــــ
تذكرة من الدكتور راغب السرجاني
على فضل رمضان و اهميته و حكمته

فيه كتير قوى من العبادات و الاموار اللي ربنا امرنا بيها مانعرفش ليها حكمتها
يعني رمضان الناس بتقول ان الحكمة منه انك تحس بالفقراء

طيب مانتا ممكن تكون حاسس بالفقراء اصلاً من غير ما تصوم
يعني مش محتاج شهر رمضان عشان تحس بالفقير

بل ممكن تكون اصلأً فقير!
ف اشمعني رمضان صيام؟؟

مش فاهمين ايه الحكمة من كونه في رمضان نفسه
ليه مايكونش من الاشهر الحرم؟؟
ليه مايكونش في رجب او شوال؟
اشمعني رمضان؟

مش فاهمين الحكمة من كونه الصيام من الفجر للمغرب
ليه مايكونش للعشاء؟
و ليه مايكونش للعصر؟؟


و قد تكون الحكمة من رمضان انك تستشعر نعم ربنا عليك
ممكن حد يكون مستشعر نعم ربنا اصلاً مش محتاج يصوم عشان يشكر ربنا على نعمه و يحس بيها



اوامر ربنا ليها حكم كثيرة جدا
هو رب السموات و الارض
هو اللي خلقنا و خلق الكون كله
يعلم السر و يعلم العلانية

بيبقى ليه حكم.. قد نعرف بعضها و قد نجهل عن الاخر

الاهم اننا نطيع اوامره حتى لو مش فاهمين حكمتها

قد تتبين لنا جزء من الجكمة، و لكن ليس الحكمة كلها
يعني من الاسباب اللي ذكرتها فوق قد تكون فعلأً جزء من الحكمة
و لكنها ليست الحكمة كلها

بدليل اننا من الف و ربوعميت سنة كمية العلماء و الشيوغ و الدعاة، كل شخص بيجي يضيف جديد
كلها جزء من حكمة ربنا، و ليست الحكمة كلها

انما احنا بس بيوصلنا الجزء الكفيل لينا انه يحركنا
اما نعرف اننا لما نعمل كذا و ده امر من اوامر ربنا هيبقى سبب لدخول الجنة
ف ده هيحركنا نعمل اللي نقدر عليه عشان ندخل الجنة
و في الطريق قد تتبين لنا حكم اخرى
و قد تتبين يوم القيامة بقية الحكم
المهم الانقياد التام وراء اوامر الله عز و جل


ـــــــــــــــــــــــــــــــــ
النقطة دي حبيتها اوى اما سمعتها :)
من الدكتور راغب السرجاني

كان بيقول اننا في العشر الاواخر بندعي دعاء واحد
اللهم انك عفو تحب العفو فاعفو عنا

العفو دي تحسسك بالذنوب كلها على بعضها و بتطلب من ربنا مش بس يغفرهالك.... لأ كمان يعفو عنها
تتمسح باستيكة على راي الاستاذ عمرو خالد


طيب حد من اول رمضان بيتعبد و بيقوم الليل و يجتهد في الصلاة و الذكر و الصيام
و وصل لدرجة انه في العشر الاواخر بيتخير ليلة القدر
يعني مكسر الدنيا فعلأً في العبادة

يبقى كان ممكن مخنا يقولنا اننا ندعي بقى ربنا يتقبل مننا العبادة و يرضى عنا!!


في رمضان الانسان بيكون ما بين خوف و رجاء، تذكرة من اختي في الله،
بتبقى خايف ان الللي عملته يكون قليل، ف تبقى عاوز تزود عليه اكتر
و تبقى حاسس انه لسه مش كافي و لازم تزود
و رجاء انك ربنا يتقبل منك
وَالَّذِينَ يُؤْتُونَ مَا آتَوْا وَقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ


ف اننا ندعي في رمضان في العشر الاواخر ربنا يتقبل منا و يرضى عننا
ممكن تورث في القلب احساس انك كويس اوى و عملت كل اللي تقدر عليه خلاص و يا رب ارضى عني و كفاية كده

بس الاصل انك لسه حاسس بالتقصير و تحس اكتر بالتذلل بين يدي الله
و ان اللي عملته مش كافي

مافيش استكبار على ربنا حتى في الدعاء انك بتقوله مهما كنت عبدت، و عبادتك بسيطة، لسه يا رب عاوز رحمتك و مغفرتك و عفوك عني
و تدعي كل ليلة من اول رمضان لحد اخره ان ربنا يعتقك من النار

تورث في القلب ذلة اكثر و انكسار اكثر بين يدي الله عز و جل

ـــــــــــــــــــــــــــــــ
تذكرة من الدكتور محمد اسماعيل المقدم
فيه ناس بتزود في الدعاء ده اكتر من كده شوية
يقولوا اللهم انك عفو كريم تحب العفو فاعفو عنا
او يزودوا بأي صيغة تانية

عجبني اوى كلامه في النقطة دي
ان الدعاء ده جايلنا عن الرسول عليه الصلاة و السلام
و الرسول عليه الصلاة و السلام اُتي جوامع الكلم
و هو اكيد اعلم مننا بكيفية الدعاء و المناجاه الصحيحة السليمة لله عز و جل في الموقف ده

ف ان كان يعلمه خيراً لنا او اننا محتاجين فعلاً نزود اي صيغة تانية غير العفو في مناجتنا لله في العشر الاواخر
كان قالنا عليها عشان نقتدي بيه و نقولها و نرب لله اكتر و اكتر

و لكنه قال اللهم انك عفو تحب العفو فاعفو عنا
و هيا كافية
في هذا الموقف
و جامع لكل اللي ممكن يفيدنا

و منها بردو اتباع سنة النبي عليه الصلاة و السلام خطوة بخطوة :)


ـــــــــــــــــــــــــــــــــــــ
النوايا في رمضان :)
اذكر نفسي و ايكام بكل نية في اي عمل صغير كان او كبير

انوو وقت النوم انه يكون عون لكم على الطاعة
و انوو وقت الاكل بردو يكون عون لكم على الطاعة

فيه نوايا كتير قوى للاكل و النوم غيرها كشكر الله على نعمه
و اتباع سنة الله في كونه
و حاجات تانية كتير قوى غيرهم كل حد يبقى يزود نوايا من عنده :)

و زودوا النوايا فعلاً في كل عمل مش نية واحدة
عشان ربنا يثبينا على كل عمل فيهم :)

ـــــــــــــــــــــــــــــــــ
:) اخر تذكرة خالص
وقت الفطار
السنة عند النبي عليه الصلاة و السلام انه كان بيأكل تمرة او تلات تمرات يفطر عليه
و يروح يصلي المغرب
و بعدين يجي يأكل اكلة خفيفة ما تكفي انها تعينه على الطاعة
و بعديها يصلي الترواح و هكذا


الاكل يستحب انه يكون خفيف مش كتير قوى
عشان الواحد يحس انه خفيف وقت القيام مش مثقل و عاوز ينام و تعبان :)




بس كده :)
هيا نقاط سريعة كده معلش.. عسى تكونوا استفدتو منها في شئ
تقبل الله منا و منكم
و لا تنسونا جميعاً من صالح الدعاء
و ادعو للمسلمين جميعاً

عسى ربنا بطاعة شخص منكم و بعبادته يرفع عن المسلمين ما بهم من بلاء

جزاكم الله خيراً :)


Sunday, September 2, 2007

ربِ ارضني بما قسمت لي



معلش انهم بوستين ورا بعض كده على طول
بس الحقيقة انى مبسوطة اوى من اول اليوم و مزأططة انى انزل البوست ده دلوقتي :d

كنت بدأت اكتبه امبارح بس ماقدرتش اكمله

كان بقالي يومين متضايقة اوى من حاجة و مصدعة اغلب اليوم من كتر الضيق اللي جوايا

كانت حاجة و انا نفسي انها تمشى في طريق محدد
استخرت ربنا في الموضوع ده و كنت بدعي ربنا كتير ييسرلي الخير اياً كان هوا فين
بس كان نفسي يمشى في الطريق الاول اللي نفسي فيه

بس الظروف قفلت انى امشى في الطريق الاول
و راحت للطريق التاني


بس احلي حاجة انى من يومين تلاتة مش بدعي غير ان ربنا يرضيني بالقرار اياً كان هوا ايه... المهم يكون الخير

و النهاردة الصبح صحيت على تليفون ريح قلبي و طمني ان الامور ماشية في الخير فعلاً


دعاء الاستخارة ده فعلأً عظيم

خاصة اخر جملة منه
ان ربنا يرضيني بيه

مع انه هوا الخير
و ربنا مش هييسرلي إلا الخير

بس جميل اوى انك توصل في الاخر تقول لربنا ارضني بقضائك
و ارضني بما قسمت لي

لأنه هوا ده الخير و ان كنت مش فاهمة الحكمة دلوقتي
مهما كان الامر كبير او صغير
جميلة اوزى انك تروح لربنا تسأله انه يعينك تختار انسب طريق!

الحمد لله

اللَّهُمَّ إنِّي أَسْتَخِيرُكَ بِعِلْمِكَ , وَأَسْتَقْدِرُكَ بِقُدْرَتِكَ , وَأَسْأَلُكَ مِنْ فَضْلِكَ الْعَظِيمِ فَإِنَّكَ تَقْدِرُ وَلا أَقْدِرُ , وَتَعْلَمُ وَلا أَعْلَمُ , وَأَنْتَ عَلامُ الْغُيُوبِ , اللَّهُمَّ إنْ كُنْتَ تَعْلَمُ أَنَّ هَذَا الأَمْرَ (هنا تسمي حاجتك ) خَيْرٌ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ , اللَّهُمَّ وَإِنْ كُنْتَ تَعْلَمُ أَنَّ هَذَا الأَمْرَ (هنا تسمي حاجتك ) شَرٌّ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الْخَيْرَ حَيْثُ كَانَ ثُمَّ ارْضِنِي بِهِ . وَيُسَمِّي حَاجَتَهُ


رب ارضني بقضائك و يسرلي الخير حيث كان
رب خِر لي الخير و يسره لي
آمين

Saturday, September 1, 2007

قصة صغيرة


برعي و عباس
اتنين اصحاب من زمان اوى! ساكنين جمب بعض
و بيروحوا مع بعض لنفس المدرسة
و راحو مع بعض حتى لنفس الكلية!

برعي بعد التخرج اتعين في الكلية
و نقل السكن بتاعه لشقة تانية

عباس ماتعينش وقتها في الكلية و كان نفسه حتى يروح يكسن في نفس عمارة برعي... بس مرتبه ماكنش يكفي الفلوس ايجار الشقة
و قرر بعديها يسافر بره مصر يشوف مستقبله و شغله هناك
و فعلاً سافر لبلد في اوروبا و استقر هناك... و منها سافر لبلد من بلاد الخليج

و انقطع الاتصال بينهم تماما لمدة تزيد عن عشرين تلاتين سنة

عباس كان كل مرة ينزل فيها مصر... يروح يلف في مكان الشقة اللي برعي اتنقل فيها
بس مصر اتغيرت قوى عن زمان!
هوا كان بيجي يدور على فيلا دورين و حواليها مكان فاضى

دلوقتي الفيلا الدورين دي بقت عمارة و في مكان مزدحم جدا من شوارع القاهرة
ف كان لما بينزل مصر يقعد يلف شوية بيحاول يلاقى المكان عشان ياقبل برعي تاني صديق الدرب
بس مش بيلاقيه و مش بيعرف المكان و بيمشى زي ماهوا تاني




برعي بقى من بعد التعيين كمل في مصر
و اتجوز و خلف و اترقى في شغله
و بقى بيسافر كل فترة و التانية لبلد بره يشوف اخر اللتطورات يعملها و يباشرها

لحد ما في مرة كان مسافر لدولة من دول الخليج تبع شغله هناك
و بالصدفة البحتة لقى عباس هناك :)
صديق الطفولة و صديق الدرب

لقو بعض هناك بعد انقطاع دام من عشرين لتلاتين سنة

و بعد ما كل حد فيهم كان بيحاول يدور على التاني في مصر او اي مكان قريب :)
مالقوش بعض غير هناك في الخليج


قعدوا يتكلموا مع بعض و كل حد فيهم حكى سريعاً ايه اخباره في الحياة
الاتنين اتجوزوا و خلفو
ولادهم في نفس السن تقريباً
و رجعو مصر الاتنين و عرفوا ولادهم على بعض :)


دي حكاية بابتي و صاحبه من زمان اوى :)
باستثناء ان لا بابا اسمه برعي :d
ولا انكل اسمه عباس
:d


الاسبوعين اللي فاتو دول كنت تقريباً كل يوم بشوف عمو عباس و بنته
:d

نفس السن و لينا اهتمامات إلى حد ما قريبة

و كان كل يوم عمو عباس يكلم بابايا الحاج برعي
:d



القصة اكيد مالهاش اهمية ليكم
بس اللي كنت عاوزة اقوله بس قصة انهم ازاي اصحاب من زمان كده و مع ان انقطعت الاتصالتت بينهم و انقطعت الاسباب حتى انهم يلاقو بعض
ربنا ييسر مكان و زمان معين ليهم تاني عشان يتقابلو و يتجمعو

كنت كل ما احكي القصة دي لحد يستعجب اوى
خاصة ان الناس كانوا فاكريني انا و البنت اصحاب من زمان اوى
و لما يشوفوا انكل و بابا يسحهم بقالهم كتير قوى مع بعض

مع انه فراق طويل اوى لظروف غصباً عنهم
و مع انى بردو اول مرة اعرفها
:)



Saturday, August 25, 2007

و لو بعد حين

بتمرن في شركة كده بقالي فترة.... ف من يومين طلب مني استاذ في الشغل انى اكتب حاجات على الكمبيوتر محتاجها بنظام معين عشان يكمل بيها شغله بشكل افضل
و طلب مني اكتبها على
Excel

اتبسطت جدااا بصراحة.... لأنى ماشتغلتش على اكسيل خالص
اتعلمته من تلات سنين تقريباً بس ماستفدتش بيه في اي حاجة! لأني مافيش اي شغل كنت بعمله محتاج شغل الاكسيل
ف كنت مبسوطة اوى انه العلم ده جه بفايدة الحمد لله في حاجة :)


طول مانا بكتب الحاجات عمال يجي في مخي شوية افكار!
ابتدت انى اتعلمته من فترة طويلة...
و الفترة اللي قعدت فيها عشان اتعلم اكسيل كانت كام شهر بشكل متقطع.... و كان فيه امتحانات و تقديمات مشاريع عليها عشان اللي علمني يتأكد انه بقيت اتقنه فعلأً
كانت لفة يعني :)

اللفة دي كلها عشان هيجيلي يوم يتطلب مني انى اكتب حاجة عليه تاخد مثلاً نص ساعة! او ساعة بالكتير اوى

بس المدة اللي بنتعلم فيها كتير دي ببقى افيد لينا لو اتقناها صح...و هتقدم احسن النتايج في الوقت اليسير اللي نطلع فيه النتايج دي


عاملة زي مشروع التخرج مثلاً :) ، ليا اصحاب كتير اتخرجو السنة دي من كليات مختلفة.. و شفت معاهم معاناتهم في المشروع
الشغل بيبتدي من تسع شهور مثلاً... و يقعد وقت كتير قوى و كل شوية بيزيد
عشان في الاخر بريزنتيشن ربع ساعة او نص ساعة
يقدموا فيها كل شغلهم
كل اللي عمله و كل اللي حققوه

و اللي تعب كويس في الاول
نتيجته هتكون احسن و احسن في الاخر


زي اللي يقعد يتعلم لغة كذا شهر و ممكن كذا سنة في حياته عشان يتقنها
عشان في الاخر ممكن يمر بموقف صغير اوى مايخدش خمس دقايق في بلده يساعد سايح بيتكلم نفس اللغة دي و يقدم له مساعده


زي لما حد يقعد يتعلم سباحة كذا شهر ورا بعضه
عشان في الاخر لو نزل مية في اي مكان يلحق نفسه مايغرقش ويقع


كان فيه احد الصالحين - للاسف مش فاكرة اسمه ولا فاكرة الكلام بالنص
بس كان بيقول فيما معناه انه فضل عشرين سنة من حياته بيجاهد و يكابد العناء عشان الصلاة
بيحاول يوصل لاعلي درجة من الخشوع و يجاهد نفسه انه الصلاة تبقى في افضل شكل و افضل صورة
عشرين سنة كاملة مش مجرد مرة او اتنين
ولا كانوا يوم ولا حتى شهر
عشرين سنة!

ف قعد بعد كده مكافئته و مكافئة لتعبه و جهده... عشرين سنة كاملة و الصلاة متيسره ليه جدا بالخشوع بكل معاني الصلاة



نقطة غيرها

انا فاكرة في مرة فيه اخت ربنا يكرمها كانت بتقولنا على السيرة النبوية
ف بتحكلنا ان الرسول عليه الصلاة و السلام نزل إليه الوحي و بُلغ بالرسالة و هوا عنده اربعين سنة
الرسول عليه الصلاة و السلام توفي و هوا عنده تلاتة و ستين سنة

يعني مدة الرسالة كلها كانت تلاتة و عشرين سنة

و اخد اربعين سنة من الاعداد المتواصل قبليها

ف عمالة تقولنا... شايفين اربعين سنة دي كتير ؟؟؟ يعني دول بس اربعين قدام تلاتة و عشرين!
ليه اربعين؟؟؟


بعديها وصلت في الاخر انهم اربعين سنة كانوا كافيين و كويسين جدا
و مش كتير ولا حاجة

بالعكس... طول الاربعين سنة ربنا بيعده و يجهزه و يعلمه و يفهمه
و يعرف الناس عليه و يضيف إليه خلق جديد و يضيف إليه تجربة جديدة


كلهم تجمعوا في التلاتة و عشرين سنة دول اللي عاشهم في فترة الرسالة

و اللي وصلوا بعديها انهم يوصلوا للمسلمين بل للعالمين حتى يوم القيامة


يبقى اربعين سنة بقى كانت كتيرة ولا كويسة؟:)

ـــــــــــــــــــــــــــــــ
طريق العلم طويل مش بسيط
اي علم مش بس علم شرعي!
و لو حد عاوز يتميز - عند الله اهم حاجة- لازم يبذل فعلاً في الجهد قبل كده
الحهد في التعلم و الجهد في البذل من بعديها
عشان لما يجي يقدم يقدم حاجة محترمة :)

و اللي اتعلمناه اكيد ان شاء الله لازم نستفيد منه...
و ان طال الوقت على اللي اتعلمناه
بس ندعي دوماً
اللهم إني اسالك علما نافعاً
و ندعي دوماً
اللهم علمني ما ينفعني و إنفعني بما علمتني
و ندعي دوماً
اللهم انى اعوذ بك من علم لا ينفع

Wednesday, August 22, 2007

فعلاً المظاهر خدّاعة



العنوان غريب شوية انا عارفة:) بس كانت هيا دي الكلمة اللي على لسانى يوميها

من اسبوع و شوية رحت مع بابا مكان شغله... قعدنا مع ناس عندهم مشكلة معينة في حياتهم و رايحين كلهم عاوزين يتعالجو منها
و بابا مع مساعدة خبراء في المجال ده بيحاولوا يوفرولهم افضل سبل للمساعدة و العلاج
كنت رايحة بهدف اساسي انى اتعلم و اشوف الناس عاملين ايه و اسمع منهم عسى استفيد منهم بحاجة

كان في القعدة دي ناس مختلفين في كل حاجة
منهم كان فيه اتنين رجالة كبار في السن
و كان فيه منهم لسه شباب اقل من 25 سنة
و اغلبهم بين 25 ل 35...
معادا الاتنين الكبار!

منهم اللي سافر من اماكن بعيده بس عشان يطلب المساعدة في مشكلته دي
و منهم اللي جه المكان ده و غيره كذا مرة عشان يوصل لحل لمشكلته و لسه مش عارفين يوصلوا
كان فيه منهم اللي جايين بمزاجهم و ارادتهم... و فعلأً نفسهم يخلصو من الحياة اللي فيها مشاكل و يشوفوا الصح فين يعملوه و
منهم اللي جاي غصباً عنه اهله اللي زاقينه عشان يلاقى حل
و منهم اللي مش مقتنع باللي بيحصل
و منهم اللي شكله هربان من اللي بيحصل بره ف قاعد في المكان ده شوية لحد ما اللي بره يخلص - اياً كان هوا ايه

كان فيه منهم ابن صاحب مصانع كبيرة و معروفة في محافظته
و منهم اللي شكلهم ناس على قد حالهم من الناحية المادية
و منهم اللي بين البنين


كان فيهم واحد حسيته من بتوع بابي و مامى و الفبلا و الدي في دي
:d

كان فيهم حتى راجل طالع من السجن و بتاع :)
كانت قعدة لذيذة ماشاء الله
بس كلهم مشتركين في نفس المشكلة
و كلهم جايين يشوفولها حل

المهم انى قعدت اسمعهم و اشوفهم بيعملوا ايه و بيقولوا ايه
بابا كان ماسك الحوار ف بيتكلم شوية يبينلهم حاجات مش واضحة ليهم و بعدين يشركهم في الحديث... يسألهم و يسيبلهم فرصة يردوا
و منهم اللي كل ما يحس انه نفسه يقول حاجة يطلب اذن بالكلام و يتكلم
و كنت قاعدة بتفرج و بسمع و بحاول اجمع افكار مسبقة للناس دي... او احاول افهم شخصيتهم و حياتهم باللي اقدر عليه

كان فيهم راجل مابطلش كلام من ساعة ما قعد
:d
كل شوية يقول عاوز اتكلم اضيف حاجة... و يقعد يتكلم كتير كتير

لدرجة ان في اخر القعدة بابا كان بيسألني على السلبيات و الاجابيات
قلتله عمو ده كان بيتكلم كتير قوى

:d
و منهم اللي كان قاعد ساكت خالص... بس فاهم كل اللي بيحصل حواليه
و لما يتسأل يرد باجابات واعية و واضحة
و منهم بردو اللي قاعد زهقان نفسه يمشى و يخلص مش مهم دول بيقولوا ولا بيعملوا ايه :)

القعدة دي بالذات استفدت منها قوى قوى... لأني حسيت انى مش فاهمة اي حاجة في اي حاجة
:d

القعدة دي استمرت ساعة كاملة... كنت لحد اخر ربع ساعة مكونة فكرة في مخي لكل شخص من اللي قاعدين و خلاص على كده
اخر شوية من القعدة بدأت فكرة او اتنين منهم تتغير بشكل صغير

و بعد ما هما مشيو و بابا بيتناقش مع بقية الخبراء حستني فعلأً بطيخة اوى و مش فاهمة اي حاجة :d
ولا حاجة من اللي في مخي صحيحة ولا سليمة

:d
الراجل اللي كان بيتكلم كتير ده... بابا كان بيسألني تفتكري ليه بيتكلم كتير؟؟
قلتله عشان عنده كلام كويس و عاوز
يوصلهولكم!!
سهلة دي
:d
قاللي لأ، هوا ماعندوش كلام كويس ولا حاجة هوا بس عاوز يورينا انه بيعرف يتكلم كلام كويس!

الراجل ده فعلاً في الاول خالص كنت بقول عليه شكله عاقل و كويس... ربنا يكرمه و يباركله
بعد ما اتكلم فترة بدات احس بفراغ في كلامه... كلام بسيط و يفتقر لكتير اوى اوى من انه شخص يكون عنده عقل
في الاخر خالص بان الموضوع كله!
و فعلأً لو كان اتساب شوية يتكلم اكتر اي كلام كويس عنده هيخلص هيخلص!!

الراجل اللي كان قاعد ساكت طول القعدة بس مركز! فعلأً اتكلم جملة واحدة بس.... بكل القعدة دي كلها
فيها فايدة عظيمة و كبيرة جدا للي قاعدين
سواء من زمايله اللي عاوزين يلاقو حل لمشكلتهم...
او للخبراء اللي قاعدين بيسمعوا!

حتى بابا كان بيعلق عليه انه اكتر حد فيهم مخه نضيف و ذكى...
و ممكن اذكى من كل الخبراء حتى اللي موجودين!

كان فيهم شخص لسه جديد... و متحمس جدا من جواه انه يبطل المشكلة اللي عنده دي و يبقى احسن و يقدر يواصل حياته بشكل كويس بعد كده...
هما معلقوش عليه كتير و قالوا ان الايام هتبين بعد كده ايه اللي هيحصل معاه.. و دلوقتي صعب نحكم على شخصيته!

كان فيهم حد شكله هادي جدا... و مش بيعمل مشاكل ولا اي حاجة!
و اما اتكلم قال كلام عجبني اوى اوى
كنت مبسوطة جدا بيه و قلت اكيد ده فهم الدنيا صح و هيقدر يكمل كويس
كنت فراحنه اوى بنفسي اما وصلت للنتيجة دي
:d


اما كانوا بيتناقشو عليه فهمت انه ده هوا هوا اللي كان في السجن
:s

و لسه قبليها القعدة دي بفترة صغيرة عمل مشاكل كتيرة قوى قوى
لدرجة انهم زهقانين منه
حتى كلامه الكويس اللي عجبني اوى
بابا كان بيعلق عليه بعد كده انه بيقول كلام من غير مشاعر
بيقولهم كلام عشان يضحك عليهم
بس الخبير في الحاجات دي يعرف بشكل واضح و قوى انه الكلام ده اللي بيقولوه مش صادق فيه

رجعت من يوميها و انا شبه بضرب نفسي
بقول لاختي كل احتكاكي بالناس قبل كده و معرفتي بيهم إلى حد ما خلاني النهاردة فعلأً احس انى لا افقه شئ عن
الناس :d

كنت عمالة اقولها ده مش عارفة مين عمل ايه و قال ايه!!
و هيا نفسها تستغرب و تقولي مش شكله يعني
:d


البوست طويل بشكل طويييل انا عارفة:d

و ممكن هوا بس عبارة عن رغي للموضوع


بس فعلأً الناس مش زي ما بيبان
و
و مش تقدر في وقت يسير و في مكان كده تحدد شخصيات الناس انك تفهم شخصية
دي محتاجة وقت و محتاجة انك تشوف ناس في مواقف معينة و تشوف تصرفاتهم ازاي

قعدت مع ناس اصحابي في المدرسة فترة طويلة اوى
منهم اللي قعدت معاهم ست سنين و منهم اللي قعدت معاهم اقل من كده شوية سنة او سنتين او تلات
ة
بس فعلأ فيه مجموعة مافهمتهمش و عرفتهم فعلأ غير في اربعة ايام بس!!

اربع ايام عدينا فيهم بمواقف كتيرة فهمتني فعلأً مين فيهم اللي كويسة و مين لأ!

مش معنى انى بقعد مع ناس كل يوم في الشغل او الدراسة انى خلاص عرفتهم!
و مش معنى بردو انى اعرف حد من يومين تلاتة اني لسه ماعرفوش
المهم انى ماطلعش احكام كده و خلاص
من غير اي اصل او دليل!

من غير ما اعدي على مواقف فعلأً تبينلي

و ماحكمش على شخص من مجرد طريقة لبسه او طريقه كلامه

ااه بتبين جزء من الشخصية!

بس مش كلها!!



عسى تكونوا استفدتو من اي حاجة هنا :)

جزاكم الله خيراً و ربنا يكرمكم على القراية دي كلها
:d

Thursday, August 16, 2007

كل إناء ينضح بما فيه

من فترة كنت في مكان مع اخواتي بره البيت... و فجأة فيه نحلة جات وقفت قدامي
بصراحة خفت في الاول و عاوزة افتكر ذكر يقيني...
و انا كنت خايفة من النحلة عشان قريبة قوى و عمالة بحاول اجيب اي ذكر!
مافيش حاجة راضية تيجي!!
لا عارفة اقول بسم الله الذى لا يضر مع اسمه شئ في الارض ولا في السماء
ولا عارفة اقول اعوذ بكلمات الله التامات من شر ما خلق
ولا حتى عارفة اقول اللهم احفظني

الحاجة الوحيدة اللي طلعت مني بعد فترة طويلة اوى بسم الله الرحمن الرحيم
عشان اللي بستخدمه فيهم كلهم اكتر حاجة

النحلة الحمد لله مشيت و راحت لسبيلها بدون اصابات :)
بس قعدت افكر مع نفسي كتير بعديها
انى لو الذكر ده ماليني فعلاً... لو بقوله كل يوم صباحاً و مساءً
لو مالي قلبي تماما ان ماحدش هينقذنى و يحفظني غير ربنا
و ان الرسول عليه الصلاة و السلام وصانا بكلمات هم افضل كلمات في المواقف دي تتقال

ماكنتش هتعب كتير انى اقول الاذكار دي
!!

بعديها بفترة بردو كان فيه نحلة!! :d
مش عارفة ايه قصة النحل معانا وقتها
و كانت قريبة و بتحوم كتير قوى

وقتها كنت مستعدية الحمد لله بالاذكار
و الحمد لله بعدت
و سبحان الله حتى و هيا قريبة كان قلبي مطمأن انها مش هتأذيني خاالص
لأني تحصنت بالقرب من الله و بالذكر


موقف تاني من فترة حصل بردو... انى اختلفت مع اخت لي في الله في مسألة
و اياً كان اللي غلط مين و مين اللي صح... انا حسيت انها ضايقتني
و سولت لي نفسي انى انا اللي صح اياً كان ايه اللي بيحصل
بس قفلت الموضوع و همشى خلاص
هيا كل شوية تيجي تقولي يا مجاهدة الاخوة في الله!
اقولها طيب ماشى ربنا يكرمك :)
تيجي بعديهخا بشوية كمان تقولي احنا لسه اخوة في الله!
اقولها و ماله ماشى :)
كنت غلسة اوى و مش عارفة اتقبل كتير :s
و هيا كل شوية تيجي تذكرني اننا اخوة في الله بغض النظر ايه حصل

مافهمتش انى غلط غير بعديها بيومين بالظبط!
انا اللي غلطت في اخت ليا في الله ربنا يعلم مدى حبي ليها
و هيا بالذات ليها افضال كتير قوى قوى عليا
و مع انى انا الغلطانة... و بقولها انا اللي غلطانة و نفسي انها تسامحني
لاقيتها هيا اللي عمالة تكلمني انها هيا اللي غلطانة!
و تقولي المفروض احنا اخوات في الله و انتى حبيبتي في الله مايصحش اسمح اتن حاجة تضايقني منك
و بتقولي انها متضايقة من نفسها عشان اتضايقت مني!!!

انا كنت قاعدة هعض في نفسي منها :d

بس لاقيتها انها كده عشان معاني الاخوة في الله مالية نفسها بشدة
قعدت كل شوية تذكر نفسها ان مافيش حاجة تستاهل اتنين اخوات في الله يتضايقو من بعض
و ماينفعش اننا نزعل من بعض مهما حصل
و تقولي انها متضايقة من نفسها انها زعلت مني!!!

هيا كان ليها حق تزعل مني والله :(


بس سبحان الله!
من كتر ماهيا ماليها حاجة واحدة و ماليها قوى
بتتصرف على اساسها

و انا ماتصرفتش على الاساس ده مع البنت الاولانية لأن معنى انى انا و هيا اخوات في الله مش قوية عندي زي البنت التانية بالنسبة لي
.....

الموقفين او التلاتة دول فعلأً نبهوني اد ايه ان ايا كان اللي عندك زمان هوا ده اللي بيطلع وقت العوزة و وقت الازمات!
عامل زي ما تيجي تسوق عربية مثلاً .... لو انتا كده كده متمكن منها... لو حصل في اي موقف تاني حاجة مفاجأة هتعرف تتصرف
لأنك اتأسست صح!
((معلش العربيات مأثرة معايا اليويمن دول :d ))

دكتور عمر عبد الكافي كان دايماً بيقول انك كأنك بتسحب رصيدك من الايمانيات من عند ربنا

انتا دايماً تزود ايمانك و صلتك بالله
لو حصل اي كرب... الايمانيات اللي انتا عمال تزود بيها نفسك دايماً دي هيا اللي بتطلع وقت العوزة
لأن المخ مش بيبقى مساعد اوى على التفكير السليم
ف بيطلع اقرب حاجة عنده

لو اقرب حاجة عنده ايماين و صلة بالله و حسن توكل عليه
لو اكتر حاجة قريبة هيا انك مسلم تماما لله رب العالمين و عارف انك مش هيصيبك غير اللي ربنا كتبه ليك
و انك مش هيصيبك غير الخير

اياً كان اللي هيحصلك هتعرف تثبت و تفضل صامد


ـــــــــــ

حاجة ممكن تكون قصة جانبية .... بس افتكرتها وسط مانا بكتب
تفسير ليه يوم القيامة الرسول عليه الصلاة و السلام بس اللي هيدعي ربنا
يعني ماحدش من الانبياء تاني راح يكلم ربنا


بيقولوا ان سيدنا محمد في رحلة الاسراء و المعراج كان بيكلم ربنا ليه بينه و بين الله حجاب

ف اطمأن قلبه برؤية الله و ثبت

يوم القيامة عند بقية الخلق حتى من الانبياء رهبة قوية و خوف من هذا الموقف
عدا رسول الله عليه الصلاة و السلام
لأنه اطمأن قلبه و كان فيه قبل كده

عشان كده هوا اللي كلم ربنا عز و جل




لو احنا في مواقفنا الطبيعية قلبنا ملئ بحاجة
الحاجة دي اللي هتطلع وقت ما نحتاجها :)

بس كده خلاويص:):)

جزاكم الله خيراً
ــــــــــــــــــــــــــــــــ

اعتذر عن عدم الرد و عن عدم المتابعة لبقية المدونات
الوقت مكربس اوى الفترة دي و الفترة الجاية!


Saturday, August 11, 2007

كن سفيراً للإسلام




الموضوع ده كنت اتكلمت عليه من فترة في البوست ده... بش بشكل كبير و ملخبط

:d

بس المرة دي ان شاء الله يبقى منظم اكتر :)

هيا جملة في مخي بقالها فترة... جزاهم الله خيرأً اللي بينبهوني ليها

اننا نكون سفير للاسلام في كل مكان نروحه

لما اي حد فينا يروح اي مكان بيحترم فيه الزباين بتوعه
فندق او مطعم او مستشفي فيها مكان استقبال او شركة بردو في الاستقبال
لو مكان بيحترم العملاء بتوعه
هتلاقيهمن على طول مبتسمين
مستعدين دايماً يردوا على اي سؤال عندك
و لو انتا غلطان... هما يبقو هاديين
لو المعلومة مش واصله ليك
يشرحوها مرة و اتنين و تلاتة برحابة صدر

بيعودوهم على كده و يعلموهم كده

كذا مرة شفتها ان ناس تسألهم اسألة غريبة و تطلب طلبات مستحيلة
و هما بيعرفوا يحتوو الموقف و يكسبوا عميل

لو ناس بتزهق بسرعة هيخسروا كل العملاء :d

حتى لو العملاء هما اللي غلط

االناس دي بتعمل كده في شيفتات الشغل بتاعتها
يعني عدد ساعات معين و للزباين هناك
و بعد كده لو ماكنتش دي اصلاً صفة موجودة فيه هيمشى و يخلص كده حاجة و تخلص بقى رحابة الصدر دي و تختفي لمكان تاني



لما نيجي نشوفنا احنا كمسلمين
انا مسلمة اربعة و عشرين ساعة
سبع ايام في الاسبوع
طول ايام السنة

اي حد هيبص عليا في اي وقت ... انا لسه في الشيفت بتاعتي :)
لسه في شغلتي ماخلصتش

شفت من كام اسبوع عائلة مسلمة... حبيتهم اوى من شكلهم
ماعرفش اي حد فيهم بس كانوا قاعدين قريب مننا
غالباً كانوا اب و زوجته.. و ولادهم
و كل حد من ولاده معاه زوجته
محترمين جدا و شكلهم يوحي بالادب الشديد
الام منتقبة و الاب ملتحي
و الاولاد لابسين لبس محترم جدا و تعاملاتهم راقية جدا جدا

بعد شوية لاقيت فيه دخان سجاير طالع من ناحية الاب... في الاول قلت لأ مش هوا اكيد ده دخان من حد تاني و طلع عنده!! مش عارفة ازاي يعني بس هوا كده :)

بس لاحظت بعديها ان عمو نفسه هوا اللي بيشرب سجاير
اسال الله ان يعافيه و يتوب عليه و يبطل الحكاية دي

بس قعدت افكر في نقطة... انهم شكلهم ملتزمين و محترمين و كويسين
لو حد شاف انكل بيعمل كده ممكن حد يفتكر ان السجاير حلال
ممكن حد يقول انه مرائى
ممكن حد يقول انها كانت عادة قديمة و ماعرفش يتخلص منها
ممكن ناس ماتفرقش معاها اصلاً


التفكير خلاني اوصل في الاخر ليا انا.. انى انا نفسي ممكن اكون بعمل حاجة و تكون معصية
و حد يشوفني يقول عليا ملتزمة عشان لبسي
و اكون انا في نفس موقف عمو اللي شفته ده

التفكير ده خلاني احاول اشوف في خطوات كتيرة قوى بعملها حتى اقل حاجة
مش نفاق ولا رياء للناس... عشان ماحدش يقولي اننا هنرائي الناس و نضحك عليهم :)

لو حاجة محتاجة تتصلح هتتصلح من جوانا
ف هتبان من بره كويسة
:)


بس بقت اشوف حاجات صغيرة قوى ماكنتش باخد بالي منها اوى

لما اجى اخرج اللبس يبقى منمق و شيك و مكوى
عشان ابقى سفيرة للاسلام صح

لو حد شافني بعمل حاجة غلط مايرميهوش زور و ظلم على الاسلام

و لو كان فيا خير في التعاملات الناس يقولوا ااه هوا ده الدين

حتى على النت... او طريقة كلامي في اي مكان
احب الناس يشوفوني باي شكل و اي اسلوب؟؟


اشوف حاجات صغيرة كده بتفرق
اشوف لو فيه معصية بعملها... الاسلام برئ مني و برئ منها

و انا خارجة
اشوف اتأكد كل مرة الايشارب كويس و اللبس كويس مافيهش حاجة غلط!

اورى الناس اثر نعمة ربنا عليا

ده كله بيخلي الناس تاخد صورة افضل عن الدين

لأنهم لما بيلاقو حد تعاملاته وحشة
او حد تصرفاته غريبة
او حد لبسه مش مرتب و مش منظم

و يكون الشخص ده متدين
بيحطوا ده كله في الاسلام

و لو احنا احسننا التعاملات
هننقل الاسلام بطريقة اكثر قوة من لو اتكلمنا مع الناس ندعوهم للدين

زي الاسلام لما دخل افريقيا بتعاملات التجار بس
لما شافوهم بيتعاملوا بطريقة حسنة الناس حبت الدين و دخلت فيه كتير قوى
لأنهم شايفين اثر الدين في تصرفات الناس



هي دعوة اننا نبقى سفراء للاسلام
في كل موقف صغير و كل موقف كبير

بس كده :)



ــــــــــــــــــــــ
الصور اللي في البلوج رجعت تبان تاني الحمد لله :d

ناقص بس الصورة بتاعت موقع افحت و البلوج يبقى راضى عني تاني مش متضايق زي قبل كده :d

Monday, August 6, 2007

المودة و الرحمة



وقفت من كام اتأمل حال ناس كتير اعرفهم متزوجين
سواء من فترة او لسه من قريب اوى لسه متزوجين
فيه منهم ناس كبيرة اوى في السن و فيه منهم لسه شباب

و كنت بتابع بعض التصرفات لشئ في عقلي عاوزة اعرف بيحصل ازاي و بيتم ازاي :)

لاقيت ان فيه عامل مشترك بين اغلبهم... او نقول كلهم :)
المرأة بيجيلها لحظات كتيرة بتبقى بتدلع... هيا نفسها بتبقى عارفة انها بتدلع
و ممكن تكون بتعمل حاجة مش صح انها تعملها و هيا عارفة انها مش صح انها تعملها

بس هيا بتعمل كده عشان تشوف قدرها عند زوجها!

كنت بشوف زوجين قريبين مننا لسه شباب و باين عليهم الحب الشديد و الارتباط الشديد ببعضهم
و هيا عمالة تعمل حركات بتضايق زوجها
و هيا عارفة انه متضايق
و هوا فعلأً متضايق
بس بيحكم نفسه و بيحكم تصرفاته... مش عاوز يقولها كلمة تهينها
ولا عاوز يقولها كلمة تقلل من شأنها
كان بيلفت نظرها انها تبطل بطريقة رقيقة جدا

و هيا بطلت
و كملوا قعدتهم مع بعض و تحسهم فعلاً الوصف اللي بيتقال كل فترة انهم "عصفورتين " :d
و مبسوطين مع بعض

راقبت عن بعد عائلة اخرى و شفت فعلاً يعني ايه ان الزوجة اول ما تعمل حاجة واحدة بسيطة يظهر على وجه زوجها كل مظاهر الاشمئزاز و القرف و الزهق منها
مالهاش اي نصيب عنده
لا من ود ولا من حسن معاملة ولا من احترام

و لما تشوف القصة بتاعت ان السيدة عائشة رضى الله عنها كانت بتتفرج على اطفال في يوم العيد و الروسل عليه الصلاة و السلام قاعد معاها و هيا سانده على كتفه
و كل شوية يسألها اشبعتي؟
و تقوله لا
و يفضل قاعد شوية كمان مش بيتحرك و يقولها اشبعتي؟
تقوله لا
لحد تالت مرة سألها اشبعتي قالتله نعم
و تقول انها شبعت من اول مرة و لكن لتعرف قدرها عنده
:)


يقول الله عز و جل
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لآيَاتٍ لِقَوْمٍ يَتَفَكَّرُونَ

الاية دي جميلة اوى :)
و منتشرة جدا دي بالذات دايماً بيكتبوها في اي كارت دعوة لفرح او عقد قران

سمعت تفسير قبل كده انهم ليه جايين المودة و بعديها الرحمة؟

عشان المودة و المشاعر ممكن تروح بعد فترة
لأنهم على طول مع بعض صبح و ليل في الكويس و الوحش
و ال
spark
بتاعت المشاعر دي بتروح
ف بتبقى الرحمة
بتبقى المعاملة الحسنة
بتبقى انه لو شاف منها سيئة يفتكر حسناتها كلها
و يعوض السيئة بالحسنات اللي عندها

واحنا في ثانوي صاحبتي كانت بتعمل مشروع كده عشان تشوف اد ايه بعد ازواج ممكن ناس تفضل متعلقة ببعضها
كانت بتجمع اراءنا احنا كشباب و اراء المدرسين و بتسأل الشيوخ و المعلمين اللي تعرفهم عشان تعرف راي الدين
ف كان من ضمن اللي سألتهم جدتها

ف جدتها بتقولها ان بيفضل موجود الاحترام و الولد بينهم
عشان كده بيفضلوا هما الاتنين مستمرين

قريت قصة واقعية في بريد الجمعة اتنشرت من كام سنة ان زوجة ماقدرتش تفضل مستحملة زوجها الرائع اللي تتمناه كل زوجه
عشان هيا ماقدرتش تنسى ليه كام مشكلة صغيرة حصلت منه على مدارس ال16 سنة اللي عاشوها مع بعض و مصممة على الانفصال
لدرجة انها مستعدية تسيب ولادها بس تبعد عن الشخص ده من كتر ما هيا كارهاه

عشان ماقدرتش تسامح في الحاجات الصغيرة
ولا قدرت تكبر في عينيها الحاجات الكبيرة اللي بيعملها


مشكلة تانية قريتها بردو في بريد الجمعة
ان شخص مكنش شايف في زوجته غير انها متسلطة و انها جاحدة للجميل
و قرر انهى هيطلقها و عرفها انه هيطلقها بعد ما صبر عليها كذا سنة دون تغير منها جاد
لما عرفت بدأت تفكر جدياً و خافت على بيتها و زوجها و صلحت نفسها
و اول ما هيا بطلت سلبياتها اللي مضايقاه ده خلاه يكون في جو هادي يشوف مميزات كتير اوى ماكنش واخد باله منها
انها ام رائعة و محبة لابنائها
و انها ربة منزل ممتازة

ماكنش عنده الفرصة انه يشوف المميزات دي وسط الخناقات كل يوم

ازواج كتير مع الوقت بينسو المميزات اللي في زوجاتهم.. و العكس
و لا يروو إلا ما يّسيئهم
مع انهم ماليانين حسنات
و هيا اصلأً اللي خلتهم يرتبطوا من الاول خالص
و هيا اللي مخلياهم صامدين مع بعض كل السنين دي

و مش بس ازواج
اي اتنين يعرفوا بعض اصدقاء... رجال مع رجال و نساء مع نساء اقصد :)
كتير منهم بينسى كل حاجة كويسة بينهم و كل حاجة كويسة بياخدوها من الطرف التاني عشان عيب او اتنين

مع انهم لو اشاحو نظرهم قليلاً عن العيوب هيلاقو كمية غير طبيعية من الحسنات

و لو بردو مالقوش غير السيئات
ف بتبقى المعاملة بالحسنى
و لها وجد الطلاق...
التسريح باحسان

و يفضلوا بردو كل شخص فيهم شايل للاخر افضاله عليه

يُحكي عن احد الرجال الصالحين انه تزوج كثيراً و طلق كثيرا لما كان بيجد ان زوجته لا تصلح ليه
و مع ذلك كان لما يعدى من جمبيهم كانوا بيلقو عليه السلام و لا يحملوا من ناحيتهم ليه غير كل خير

لأن مع ان الحياة استحالت بينهم إلا انه اكرمهم و حفظهم و اطاع الله فيهم و اتقاه في معاملته معاهم


امتى احنا نوصل اننا نشوف السيئ و نتجاوز عنه لعلمنا ان فيه احسن منه
و امتى نوصل ان لو حتى السيئ كتير نعرف نكمل بردو بتعاملات ترضى ربنا؟؟

اسأل الله ان يهدينا باخلاقنا و تعاملاتنا إلى ما يحب و يرضى

جزاكم الله خيراً على القراية :)

ــــــــــــــ
عندي مشكلة تقنية في البلوج ان الصور بعد فترة تقريباً مش بتظهر
ف عندي صور كتير من بتاعت تعديل البوست او غيره واقعة
و الصور اللي بضيفها بتقع مع الوقت
و صورة افحت وقعت بردو
الحمد لله ان البلوج لسه عايش و صامد معايا
:d


Wednesday, August 1, 2007

إلى أى مدى نتعايش؟؟



الكام يوم اللي فاتو كذا واحدة تيجي تكلمني في نفس الموضوع تقريبا... او مش عارفة ممكن هما مش مرتبطين و انا اللي بربطهم ببعض :)


واحدة بتحب ربنا اوى بس من شدة المعاصى اللي بتشوفهم و قلة الحياء بقت نفسها تفضل قاعدة في البيت و تقفل على نفسها و تبعد عن كل دول!

واحدة تانية مش عارفة تتأقلم على الوضع حواليها مش عارفة لمشاكل نفسية او عضوية بس بردو قررت تقفل على نفسها البيت و ماتخرجش و مش عرافة تتكلم ولا تتعامل معغ الناس لأنها من جواها مافيهاش طاقة تعمل اي حاجة
في حالة أنتخة شديدة من الاخر :)

واحدة تانية قررت انها من شدة التعايش بينها و بين المجتمع هتنضم لحزب معروف بفساده لكام شهر!
عشان تتعايش!!

غير ان فيه كتير قوى بيقفلوا على نفسهم لأنهم مش شايفين جواهم القدرة انهم يصلحوا
او ممكن مش جواهم الهمة اللي تخليهم عاوزين يصلحوا و يشتغلوا و ينتجو و يتعلموا عشان يعلموا الناس


طيب لما نيجي نفكر! فكرة اننا نقعد في البيت و نقفل على نفسنا دي فكرة كويسة؟؟
او فكرة اننا نختلط بالناس كلها سواء كويسة او وحشة عشان نقول اننا بنتعلم! هوا ده اللي كويس؟


لما نيجي نبص في سورة الكهف الايات بتقول: وَإِذِ اعْتَزَلْتُمُوهُمْ وَمَا يَعْبُدُونَ إِلا اللَّهَ فَأْوُوا إِلَى الْكَهْفِ يَنْشُرْ لَكُمْ رَبُّكُمْ مِنْ رَحْمَتِهِ وَيُهَيِّئْ لَكُمْ
مِنْ أَمْرِكُمْ مِرْفَقًا

أصحاب الكهف كانوا مجرد "ْفِتْيَةُ" أمنوا بالله و فضلوا عباده الله عن عباده الاوثان زي بقية اهلهم

اللي عندهم من الدين بسيط و قليل للدرجة اللي تخليهم يعرفوا يعبدوا الله

هما مش نبي مرسل معاهم سيدنا جبريل يساعدهم و يعينهم بالعلم كل شوية لو وقعوا يثبتهم بعلم اكبر و انفع

و اهل القرية مجتمعين عليهم و الفتنة فعلأً شديدة في ذلك الوفت
عشان كده كان انهم يعتزلوا قومهم و يتركوا المال و الشهوات و الدنيا كلها ورائهم فاريين بدينهم إلى الله... في مكان بعيد تماما عن الفتنة عو التصرف الامثل
و لما هما فروا بدينهم تاركين متاع الدنيا، كان جزائهم عند ربنا " يَنْشُرْ لَكُمْ رَبُّكُمْ مِنْ رَحْمَتِهِ وَيُهَيِّئْ لَكُمْ
مِنْ أَمْرِكُمْ مِرْفَقً"



قريت قريب قوى ان بعد مقتل سيدنا عثمان فيه صحابة من اللي حضروا غزوة بدر اعتزلوا الناس و اغلقوا عليهم بيوتهم حتى خرجوا منها إلى القبور
من شدة الفتنة اللي كانت موجودة وقتها و هما خايفين على نفسهم من الفتنة دي... عشان كده اعتزلوا الناس


بس فيه نقطة شايقاها... قد تكون سليمة و ممكن اكون بخرف

انا شايفة اننا ااه في زمن كثر في الفتن
و ااه احنا بردو مش انبياء ولا بيننا نبي
بس احنا معانا من الدين ما يحفظنا و يعصمنا
معانا الكتاب و السنة
معانا قصص الصحابة
و قصص القرأن
معانا العلم بتاعهم كله واصلنا دون تعب مننا
ف فكرة اننا دلوقتي نبتدي نفكر اننا هنأوى إلى كهف و نعتزل الناس!
انا شخصياً مش شايفاها اوى فكرة مناسبة!

و قيل قديماً: إذا كانت الفتنة فأخف في مكانك، و كُف لسانك

جاء رجل إلى وهب بن منبه فقال: إن الناس وقعوا فيما وقعوا!! و حدثت نفسي ألا اخالطهم. فقال لا تفعل! إنه لا بد لك من الناس ، ولا بد لهم منك، و لك إليهم حوائج، و لهم إليك حوائج. و لكن كن فيهم أصم سميعاً، أعمى بصيراً، سكوتا نطوقاً.

احنا مطالبين بإعمار الارض... و عباده الله
و جزء من عبادتنا لربنا اننا بردو و احنا بنعامل الناس نعامل الله
و اننا نعبّد الكون كله لله

لو كل حد قال لأ مش قادر على المعاصى بره و الناس وحشة و زي البطيخ!
امال مين اللي هيشتغل؟؟
ولا مين اللي هينتج؟؟

و ممكن حد يقول ان الفتنة فعلأً شديدة و بالنسبة له لا يقوى عليها
ساعتها اقوله ااه هوا محتاج يبعد
بس مش بالدرجة دي كلها

فيه ناس بره محتاجة ان حد ياخد بايديها
شكلهم ضايعين و بعاد اوى عن ربنا
بس نفسهم من جوا حد يجي يقولهم اللي بتعملوه ده غلط و الطريق للصح كذا و كذا
و فيه منهم اللي بيدور على ناس كويسة تيجي تشده

يوم ما يجي يدور على حد ياخد بايده
هيلاقي بعيد و معتزل الناس كلها و قافل على نفسه بيته؟؟؟

امال مين اللي هيوصل الرسالة اللي الرسول عليه الصلاة و السلام تعب فيها و بذل فيها كل غالي و رخيص و كل كبير و صغير عشان توصلنا

احنا ممكن من مشهد او اتنين نتخيل ان دي فتنة و نقول هنفضل قاعدين في بيتنا و نترك اعمار الكون كله مش مهم!

و بننسى بقثية المسؤوليات اللي علينا

انا مع ان لو الواحد لقى نفسه في مكان كله فتن لازم يمشى طبعاً

بس مايعتزلش الحياة كلها
و فيه نقطة قلتها لصاحبتي امبارح انها هيا غصباً عنها موجودة في مكان فيه ناس مش كويسة اوى
و كده هيأثروا عليها سلباً مع الوقت
لو مانزلتش هيا ليهم... يبقى اقلها هيا مش هتعرف تعلي لربنا زي الاول

ف لو في مكان غصباً عنها مع ناس كده
مكان شغل او دراسة و هما دول اللي موجودين
لازم مرة او مرتين في الاسبوع تقعد مع ناس كويسين اوى اوى ... عشان يعني تشحن نفسها و ترجع تاني بايمانيات عالية و يكون عندها علم تقدر تثبت بيه نفسها و تعرف الصح من الغلط من اللي بتشوفه و تحتك بيه


يقول الرسول عليه الصلاة و السلام: المرمن الذى يخالط الناس و يصبر على اذاهم، خير و أحب إلى الله من المؤمن الذى لا يخالط الناس ولا يصبر على اذاهم


و لو في الاخر الشخص يخشى على نفسه من ضياع إيمانه و دينه بمخالطه الناس... أأمنله انه يبعد عنهم و يعتزلهم

قال عقبة بن عامر لرسول الله عليه الصلاة و السلام: ما النجاة يا رسول الله؟ فقال: يا عقبة امسك عليك لساك و ليسعك بيتُك و ابك على خطيئتك

مش معنى بردو اننا منفتحين اوى على الدنيا اننا نروح نرمى بنفسنا في مكان عارفين تماما انه غلط
و احنا اصلاً لسه تفكيرنا بسيط و مش احنا اللي لسه هنصلح هناك

يعني اخت لي قالتلي هتروح مكان كده و هيا صغيرة في السن و علمها مش قوى لدرجة انها عالمة و هتروح مكان غريب

لا هيا في مأمن انها الافكار دي ماتدخلش مخها سواء ارادت او لا
ولا هيا بردو هتعرف تجادلهم لأن علمها بسيط اوى

اللي يروح اماكن فيها فتنة شديدة ممكن يكون عالم عشان يحاجج الناس بالادلة و البراهين
و يخلص مهمته و يمشى مايفضلش قاعد لأنه بردو لا يأمن على نفسه من الفتنة

لكن اننا نروح عشان نستكشف و احنا لسه مش عارفين حاجة ولا عندنا اللي يثبتنا بقوة على الاصل
يبقى بلاها اختلاط بالناس خالص :)

Monday, July 23, 2007

يا رب

يا رب ... إنقطع الأمل إلا منك
و إنقطع الرجاء إلا إليك



ــــــــــــــــــــــــــــــــــــــــــــــــــــــــ

الواحد ساعات بيلاقي في قلبه شوية حاجات بتدخل عليه لما دعوة بيدعيها ماتتحققش...
ف بيحتاج كل فترة تذكرة!


ربنا بيجيبلنا كل حاجة محتاجنها من غير دعاء
من هوا و اكل و إيواء
و مش بندعي يا رب اعرف اتنفس كل نفس بشكل صحيح
و مع ذلك ربنا بييسرلنا دي

سبحان الله...
اكيد يوم ما ارفع ايدي للحيّ الكريم هيستجيب دعائى
و هيحققلي اللي انا عاوزاه!


كلام احد العلماء في قوله




أَمَّنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الأَرْضِ أَإِلَهٌ مَعَ اللَّهِ قَلِيلا مَا تَذَكَّرُونَ
فإذا كان سبحانه يجيب دعاء المضطرين ، حتى و لو كانوا كافرين، فكيف يكون الأمر مع المسلمين؟؟


و مقولة لسيدنا عمر بن الخطاب رضى الله عنه و ارضاه
إنى لا أحمل هم الإجابة، و لكن أحمل هم الدعاء
:)

كتير بقعد اقول انى نفسي في حاجة معينة.... ف دي محتاجة دعاء مخصوص
و سبحان الله ان الشيطان بيجي يوسوس في الاوقات دي ... و يقعد يوهملي انى بلاش ادعي دلوقتي و استنى لحد بالليل مثلاً اقيم الليل بعديها ابقى ادعي
او يوسوسلي انى ابقى استنى لحظة من لحظات الاجابة... و يمنعني دلوقتي من انى ادعي
ال يعني مستنية لحظة من لحظات الاجابة

و الواحد ينسى ان ربنا اصلأً قريب لأي حد بيدعيه
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

يعني بمجرد ما الواحد يبتدي يدعي ربنا هوا قريب خلاص....
و سبحان الله ان الاية بعديها : أجيب" مافيهاش اي حرف حتى قبل الكلمة
بيحسسنى ان الاجابة بتبقى فورية... مافيهاش قبليها اي حاجة تعطلها :)


مقولة سيدنا عمر بحسها بتنطبق اوى على وقت التفكير ده...
اننا نشيل هم الدعاء اصلاً
و انه يكون دعاء باللي ربنا يرضاه
و نتخير اوقات صادقة في القلب و اوقات قال عنها الرسول عليه الصلاة و السلام انها اوقات استجابة دعاء

بس المهم ان القلب يكون صادق فعلاً في اي وقت وقت الدعاء!


و ماندعيش غير بالخير!


لسه قريب قارية عن شخص اسمه "بلعام بن باعوراء"... الرجل ده كان رجل صالح في قوم بنى اسرائل
و كان بيعبد ربنا كتير و بيقرب منه قوى... الناس كلها عارفة عنه الصلاح و التقوى
و الرجل ده من كتر قربه لله كان عارف اسم الله الاعظم... الذى إذا دُعى به ربنا يستجيب

سبحان الله الراجل ده زُين له بعض الاعمال و استخدم اسم الله الاعظم انه يدعي بالسوء على اهل الخير
و كانت النتيجة انه اياً كان الدعاء بالخير اللي بيدعيه على اهل الخير الدعاء بالسوء يرد على اهل الشر
و لو بيدعي بالخير لاهل الشر... الدعاء يرد لأهل الخير


استغل قربه من ربنا و فهمه في الدين لشئ يبعده عنه الله!
و كانت النتيجة هلاكه فيما بعد!



و اخيراً... قول العلماء: لا يمتنعن أحدكم من الدعاء لما يعلمه من نفسه، فإن الله أجاب دعاء شر الخلق - أى إبليس- حين قال: قَالَ رَبِّ فَأَنْظِرْنِي إِلَى يَوْمِ يُبْعَثُونَ .... فقال سبحانه: قَالَ فَإِنَّكَ مِنَ الْمُنْظَرِينَ.

بردو ساعات الواحد كان بيقعد يقول ازاى ربنا ممكن يستجيب لي و قد فعلت كذا و كذا!
و بيتعظم ذنبه على مغفرة ربنا
و يقول مش هعرف ادعيه باللي عاوزه دلوقتي!

:)
ف تيجي الايام دي و يشوف ان ربنا لبى دعوة إبليس ... و هوا أعتى خلقه.. بس استجاب دعوته :)


لما الرسول عليه الصلاة و السلام قال عن شخص من الصحابه : صدق الله فصدقه الله

المعنى ده في مخي اوى بقالي فترة...

انه هوا صدق الله الاول
و بعديها ربنا صدقه لصدقه ده!

يعني مثلاً اللي عاوز يموت شهيد... بيدعي ربنا... و بيقدم حاجات فعلأً بيبن فيها لربنا مدى صدقه في الدعوة دي
عشان كده ربنا بيصدقه و بيرزقه الشهادة في سبيله

اللي عاوز يكون مربي لأجيال يعلمهم دين الله... بيصدق الله الاول... انه يتعلم و ياخد بالاسباب... و يقرى و يفهم و يعمل كتير قوى
و وسط ده كله بيكون بيدعي... و اول ما تجيله الوسيلة دي بيصدق الله في عمله
و ربنا بيصدقه في الرزق اللي بيجيبهوله


ماينفعش واحد يفضل يعيش متواكل على الله.... انه بس بيدعي بس هوا مش بياخد اي موقف
ما ربنا مش هيستجيب دعائه لأنه وقت ما يتحط في المكان ده مش هيكون اهل ليه!
مش هيعرف يفيد الناس ولا هيفيد نفسه بأحسن طريقة ممكن


عشان كده حاسة... اننا لو احنا اللي صدقنا ربنا الاول
ربنا هيصدقنا
لو بناخد بالاسباب فعلاً
لو بنتعلم و بنأدي كل ما نملك في سبيل الله
لو صادقين في النية و العمل

ربنا هيصدقنا
و يجيلنا اللي احنا عاوزينه
ده ممكن حتى احسن مما نتخيل