Wednesday, May 30, 2007

إتباع الهوى

بقالي فترة طويلة عمالة افكر في كذا حاجة نفسي اكتبها هنا.. بس لضيق الوقت مع شوية حاجات تانية وحشة مش كنت بكتب..

قررت اكتب الفكرة دي..
عسى تفيد اي حد فيكم...


كنت بقعد انا و صاحبتي كذا مرة نتكلم عن الصحابي الجليل سيدنا عبد الله بن مسعود
و نقعد نحكي قصص عنه

قصة فيهم... هحكيهالكم زي ما سمعتها من صاحبتي بالظبط.. واحدة صاحبتي تالتة غيرها smile.gif

عمالة تحكيلنا عن همم الصحابة و قد ايه كل حد فيهم بيعمل
ف بتحكلنا ان سيدنا عبد الله بن مسعود كان اقل الصحابة صياماً
كان اقلهم... لدرجة انه يتكتب عنه في كتب التاريخ
يعني ماحدش كان بيصوم قد الي بيصومه... هوا بس اقل حد فيهم... لدرجة تخلي المؤرخين يكتبوا عنه انه اقل الصحابة صياماً


ليه كان بيصوم قليل ده اولاً!!!
لأنه كان ضعيف الجسد...
ف لما كان بيصوم كتير... صومه ده و قلة اكله كانت بتخليه مش بيعرف يتلذذ بالعبادة زي ما هوا عاوز!
مش بيقوم الليل زي ماهوا عاوز.. لأنه ضعيف الجسد محتاج اكل يقويه
مش بيصلي العبادات بتاعت طول اليوم زي ما هوا عاوز بتلذذ ... عشان محتاج اكل


نقطة جانبية هنا... احنا فيه ناس فينا مش بتصوم فضى... او حاسة ان اليوم هيبقى طويل شوية.. او بتستصعب الحكاية... هوا كان سببه بردو سبب ربّاني
smile.gif




نرجع للقصة
سيدنا عبد الله بن مسعود كان بيصوم قد ايه؟؟؟
smile.gif


كان بيصوم رمضان كله طبعاً smile.gif

و كان بيصوم اتنين و خميس من كل اسبوع
و كان بيصوم 13، 14، 15 من كل شهر هجرى

smile.gif smile.gif


و ده اقل الصحابة صياماً ماشاء الله
smile.gif


يعني احنا اعلى حد فينا صياماً... يا دوب جايب اقل الصحابة صياماً
smile.gif


ربنا يتولانا برحمته
smile.gif





قعدت في يوم انا و صاحبتي بردو... بنتكلم على العبادات
بحكلها انك اكيد فيه عبادة بتلاقي فيها قلبك قوى
اللي بيجد قلبه في القيام
الي بيجد قلبه في حفظ القرأن
الي بيجد قلبه في الصيام
الي بيجد قلبه في الصدقات
و هكذا

ف بقولها... و دي كانت حقيقة.. إني مش بجد قلبي في الصيام.. بجد قلبي في عبادات تانية

وقتها... انا متأكده ان دي لعبة شيطان .. نعوذ بالله منه
كنت بتلكك بالمعلومتين دول
عشان ماصومش الاتنين و الخميسsad.gif

بقولها ده حتى سيدنا عبد الله بن مسعود كان عشان جسمه ضعيف مش بيصوم كتير زي بقية الصحابة
:(
و بقولها انا مش بجد قلبي في الصيام
:(
و بقولها انى لما بصوم مش بحس انى عارفة بردو اكمل كويس بقية العبادات
:(:(

دي كلها وزة شيطان انا متأكده ان ده كلام مش صحيح!!


المهم
سيبت البنت دي
و رجعت بتنا... بعد ما عرفت اقنعها بتبريري ليه مش بصوم كل اتنين و خميس
:s



رجعت بيتنا... و قعدت افتكر سيدنا عبد الله بن مسعود

و قعدت افكر... انه جسمه ضعيف ااه... و الصيام الكتير بيخليه مش بيتلذذ بالعبادة ااه
بس مع ذلك.. كان بيصوم السنن المؤكده

ماحدش قاله زود! لأنه مش عنده القدرة يزود
بس بيصوم السنن المؤكده
و انا بعمل كده و ببرر لنفسي عشان اعرف افلفص من سنة
:(

اصلأً ... مين الي محتاج السنة!
انا ولا اليوم هوا الي هيزيد شرفاً لو انا صمت فيه
:(


مين الي محتاج يتبع الرسول!!
انا؟؟؟ ولا الرسول هيتبسط لما العدد يزيد بواحد!!!


مين الي الجنة محتجاله ؟ ولا مين الي محتاج للجنة!!


وصلت للنقطة دي... و اكتشفت الهبل الي كنت بفكر فيه

اول ما شفت صاحبتي تاني مرة جريت عليها و قلتلها ماتصدقيش كلامي
كلامي غلط
اوعي تقتنعي بيه!!

تقولي ليه؟
حكتلها الي قلتهولكم



هيا اصلأً تبارك الله بتصوم كل اتنين و خميس دوماً

بس انا خفت افتنها بكلامي او اقنعها بحاجة غلط

قعدت اضرب نفسي كتير قوى لما وصلت لنقطة انى بهرج!

ده اسمه اتباع هوى!!


مش بقول ان كل الناس تصوم اتنين و خميس و التلات ايام من كل شهر و الي مش هيعمل كده هيأثم
دول فعلأً سنن

انا بتكلم على نقطة التفكير نفسها

ازاي بحاول اقنع نفسي و ابرر لنفسي حاجة... بحاجات اصلأً دينية بريئة من الي بعمله ده
:(


قعدت افكر بعيدها كتير في نقطة اتباع الهوى

و قعدت افكر في دعوة بدعيها كتير للشخص الي هتزوجه... انه لازم صفة مهمة فيه .. انه يكون بيتبع اوامر ربنا و الرسول ولا يتبع الهوى

و الاقيني انا الي بعمل كده
:s


حتى يعني لو مش بجد قلبي في الصيام!!
مش ممكن بعد شوية ربنا يحببني فيه و اجد قلبي و تلذذى بالعبادات فيه!!


مش ممكن هوا كده عشان اعود نفسي... انها مش الحاجة الي انا عاوزاها
دي الحاجة الي مأمورين بيها... و المفروض نعملها... او سنة لينا اننا نعملها
و لو عملناها احنا الي كسبانين
لو ماعملنهاش احنا الي خسرانين!!




من كام يوم كان فيه برناامج لدكتور عمر عبد الكافي
بيقول فيه ان الشيطان استيأس من امة سيدنا محمد
لأنه كل ما يوسوسلهم بشئ
مايسمعوش الكلام...


ف سلط عليهم ما هوا اقوى من مجرد وسوسته
ألا و هيا الهوى!

هواهم
هما عاوزين ايه

و ربنا بيبتلينا.. يشوف مين فينا هينفذ كلامه... و مين مش هيقدر يصبر عشان يتبع هواه و يعمل الي نفسه فيه

و ذكر في الاخر الاية دي

وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى

smile.gif

لو خايفين فقعلاً من ربنا ... مش بس كده
خايفين من مقام ربنا
هننسي الهوى فعلا smile.gif

النقطة التانية.... ان كتير اوى بتحصل
ان الشيطان يعرف يدخلنا بمدخل ديني..

حصلتلي كذا مرة قبل كده
و حصل لكذا حد اعرفه قبل كده



حبيت اشراككم بالمعنى ده... عسى ينفع اي شخص بأي حاجة
smile.gif


سلام عليكم

Friday, May 25, 2007

And the show Must go on


إمبارح كنت في حالة غريبة من الزعل.. و حاسة انى بقالي فترة عايشة في نفس الحالة.. كل ما اخرج منها ارجع تاني
حالة من الاستسلام غريبة... حتى لو ماقلتش لحد باللي جوايا... على الاقل جوايا كذا تفكير انى امشى و اسيب اياً كان الي بعمله... بمعنى تاني اصح.. انى استسلم...
و كل ما افكر في الفكرة دي تيجي افكار تانية ايجابية تطردها...
و ساعات مش بتبقى افكار ايجابية.. ساعات بتبقى مجرد افكار انى ماينفعش امشى دلوقتي.. و افضل قاعدة حتى لو متضايقة و مهمومة و مش عارفة اكمل... بس بتفضل نفس فكرة التعب و الزهق محوطاني...

كل ما اجي ابص لحاجة معينة امبارح.. اقول لأ مش قادرة
ماعنديش الطاقة انى اكمل دلوقتي.. و ماعنديش الهمة اعمل اي حاجة

افكر تاني.. انى امشى و اسيب المكان... اقول لأ .. مايصحش استسلم.. مش دي صفات المسلم اصلاً

اقول خلاص هقعد.. بس بجد ماعنديش الهمة اعمل اي حاجة...

اول ما وصلت للفكرة دي لاقتني داخلة الاوضة و بكيت شوية... دخلت في الصلاة و قعدت ابكي كتير بين يدي الله
مش عارفة اقول ايه ولا عارفة اعمل ايه... بس بستغفر
و كل مرة استغفر فيها... افتكر ذنب قديم... ابكى اكتر
استغفر تاني افتكر ذنب غيره... ابكى اكتر و اكتر..
خلصت الصلاة و فضلت على الارض فترة لحد ما غلبني النوم...

و صحيت مافيش في مخي غير الجملة دي عشان لسه سامعاها قريب
the show must go on, no matter what happened


مممم

فيه حاجة بنبقى مسؤولين عنها و مسؤولين اننا نكملها
و لو مشينا في النص و سيبناها... نبقى كده اتخلينا عن مسؤولية كبيرة ناس أمنونوا عليها
لو مشينا في النص ممكن حد يجي بعدينا يبوظ كل الي تعبنا فيه قبل كده

لو مشينا في النص ممكن مانخدش الثواب اننا تعبنا قبل كده.. لأننا مش خلصنا الموضوع لأخره


قعدت افتكر المهرج في السيرك... و قصة سمعتها قبل كده من مهرج حقيقي بيشتغل في السيرك انه في يوم ابنه الصغير كان تعبان اوى.. و مات قبل معاد العرض بتاع المهرج...
المهرج واقف على خشبة المسرح لسه الستارة مافتحتش... عمال يفكر في موت ابنه و اد ايه بيحب ابنه الصغير
و عمال يفكر انه عاوز يمشى... لأنه مش عنده المقدرة يفضل يكمل العرض النهاردة
بعديها بشوية سمع ضحكة الاطفال الصغيرين ورا الستارة...
و حس انه ابنه لو كان موجود كان هيبقى قاعد بيضحك معاهم

طلع قدم العرض كويس اوى و عمله بأحسن شكل ممكن... عشان حاطط في مخه انه ابنه قاعد بيتفرج عليه...
و انه ماينفعش اطفال جايين يضحكوا يمشى و يسيبهم .. حتى عشان خاطر متاعبه هوا الشخصية


قعدت افكر فيه كتير ... و ازاي انه اقوى مني... اياً كان الي بيحصلي ف هوا اكيد اقل من فقدان ابني الصغير في غفلة.. و مع ذلك كمل
عشان فيه ناس جايين يضحكو... و هوا شغلته يضحكهم و يسبطهم

و انا الي مش قادرة اكمل عشان خاطر شوية هم مالهمش اي لازمة ولا هيفيدوني في اي شئ انى متضايقة


كان فيه جملة بتقول
it doesn't matter to the world whether you smile or cry
so you'd better smile for your own sake




ماينفعش اوقف حاجة عشان تعب شخصي
ماينفعش احط مصالحي الشخصية على حساب مصالح ناس و مسؤولية وُكِلَت لي من ناس.. و اسيبهم في النص عشان خاطر شوية ضيق سواء كتر او قل..



هوا كلام مبعكك.. بس هيا الافكار الي في مخي الفترة دي مبعككة شوية :)

لا تنسوني من صالح الدعاء

فيه كلام في الصورة... بس مش عارفة هيبان ولا لأ
الكلام اهو...






لا تحزن

إذا ارهقتك هموم الحياة
و مسك منها عظيم الضرر
و ذقت الامرين حتى بكيت
و ضج فؤادك حتى انفجر
و سدت بوجهك كل الدروب
و أوشكت تسقط بين الحفر
فيمم إلى الله في لهفة
و بث الشكاة لرب البشر

Sunday, May 20, 2007

constantly changing

هيا خاطرة فضفضة شوية عشان اطلع الي جوايا... ماحدش يتوقع حاجة كبيرة يعني smile.gif


ــــــــــــــــــــــــــــــــــــــــــــ


من كام يوم جات صاحبتي تقعد معايا شوية... صاحبتي دي من ايام المدرسة
ايام زمان يعني إلى حد ما بالنسبة لي

البنت دي كل مرة اقعد معاها... تحسسني اد ايه اتغيرت... و هيا الي دايماً تخليني اخد بالي من الحالة الي انا بقيت فيها افترة دي

بقالي بتاع تلات سنين او ممكن اربعة كمان دلوقتي... بدون مبالغة بجد.. كل ست شهور مثلاً اتغير.. و اتغير تغيير كبير قوى قوى

كتير اوى من اهتماماتي بتتغير... و من الحاجات الي بعملها.. و الحاجات الي بحبها... و الحاجات الي بتابعها


الي يقعد معايا من تلات سنين.. و يقعد معايا دلوقتي.. هيحس بفرق كبيير قوى ...


اعتقد ان الاصل هوا هوا... و التفكير إلى حد ما الاصل بتاعه واحد (ماحدش يسأل يعني ايه الاصل بتاعه واحد انا بحاول افهمني بردو)


يعني مثلأً زمان كنت رافضة تماما قصة المصاحبة دي... لأسباب عقلانية بعيداً عن موضوع التدين و الالتزام

دلوقتي رافضاها بردو تماماً... بس باختلاف الاسباب... يعني حاجات عقلانية و اتضافت عليها حاجات دينية و حاجات اجتماعية و حاجات كده



المهم...
انى انا نفسي مش ببقى واخدة بالي من التغير الي بيحصلي ده غير لما بيخلص
بس طول مانا تغيري بتغير.. مش ببقى واخدة بالي اوى
مش باخد بالي غير لما باجي اقارن بين موقف زمان و موقف دلوقتي


و باخد بالي اكتر بالذات لما بقعد مع الناس الي كانوا معايا في المدرسة


و بتسغرب جداا من حجم التغيير الي حصل في تفكيري و اسلوبى و اهتماماتي..


لدرجة ساعات بتخوفني انا شخصياً
لما بقعد افكر ان الي بيحصلي ده طبيعي عشان يعني لسه سنى صغير و لسه بتعرض لمواقف في الحياة كل فترة.. ف اكيد هتغير
النقطة بقى... انى لو فضلت اتغير كده كتير بغض النظر عن المرحلة العمرية
و بقولكم بتغير كل ست سبع شهور مثلاً... و ساعات التغير بيبقى تغيير 360 درجة في الاهتمامات و التعاملات


بخاف لما بوصل للنقطة دي.. للي ربنا هيبتليه بواحدة بتتحول كل شوية كده


ممكن الي هتجوزه في يوم يتفاجئ هوا نفسه بالتغيير الي بيحصلي ده.. و يجي يتخانق معايا و يقولي مش دي اللي انا اتفقت عليها


و يقولي اننا ضحكنا عليه بقى و كده







بعيداً عن كل دهsmile.gif


سبب التغيير نفسه... بيحصل من كتر الحاجات الي بتعرض ليها و بشوفها

كنت و انا عندي 16 سنة.. كنت ببقى مخنوقة جداا
و اقعد اقول ده انا يا دوب حتة بتاعة عندها 16 سنة... و كان بيحصلي كمية حاحات اكتر من الي بتحصل للي قدي..


يعني ممكن حد فيهم يكون عنده مشكلة واحدة كبيرة...
انا كان بيبقى بيحصلي عشر حاجة مختلفين في الحجم.. و ان كان فيه منهم صغير و فيه منهم كبير اوى... بس كانوا بيبقو كلهم مع بعض
ف كنت بقعد اقول كفاية كده عليا
و بجد دلوقتي مش فاكرة اي حاجة فيهم
و اللي فاكراهم فيهم ببقى مستغرباني اوى ازاي كنت ببص للحاجات دي زمان على أنها مشاكل و ازمات عندي


بعد فترة... كنت مبسوطة... و اقعد اقول الحمد لله
لولا الي كان بيحصصلي بالظروف دي كلها.. ماكنتش انا هبقى انا

كنت هبقى واحدة مختلفة جدا عن الانسانة الي انا عليها دلوقتي


لما تيجيلي واحدة تشكيلي على مشكلة معينة بتواجهها في حياتها
و المشكلة دي اكون عديت بيها و خلصتها و حلتها من سنتين مثلاً... بحس انى مبسوطة

و ساعات بحس انى عاوزة اقولها : ياااااه... ده انتي قديمة خالص
انتو لسه بيحصلكم الحاجات دي!!

تعديت مرحلة المشكلة دي و وصلت للمرحلة بتاعت المشكلة الاعلي منها

غير أنبساطي بفكرة ان ممكن ربنا يكون خلاني اعدى بموقف معيّن عشان اعرف اطلع منه و لما واحدة تتعرض لنفس الموقف تلاقي الحل جاهز... يعني ربنا سبّبني انا كسبب عشانها هيا
smile.gifsmile.gif



والله بجد ببقى مبسوطة

و مبسوطة انى اخدت كمية ضربات محترمة من ناس كتيرة مختلفة في حياتي.. سواء اهل او اصحاب او احباب او زمايل او او او
و كل انواع الخبطات تقريباً

و حاجات على المستوى الشخصي و المستوى الدعوى و المستوى العائلي و المستوى البطيخي حتى smile.gif


ااه لسه فيه خبطات تانية.. و ان شاء الله هبقى مستعدة و انا بتلقاهم... و ربنا ييسر و اعرف افهمهم و استوعبهم و استفيد منهم فعلأً


بس بصدق... مبسوطة و مستريحة اوى smile.gif



كنت زمان واحدة صاحبتي كانت بتقولي انها بتتعرض لحاجات كتيرة قوى..
و انها كل ما تخلص من حاجة يجيلها حاجة اكبر


كنت اقعد اقولها يبقى تحمدي ربنا ... لأنه بيحضّرك لحاجة كبيرة قوى في حياتك
و عشان تستقبليها صح.. لازم تكوني مستعدة ليها اصلأً صح من الاول
فربنا بيحضّرك ليها دلوقتي





عسى يكون ده الي بيحصل فعلاً smile.gif




بس يا رب عقبال ما الكابتن يجي اكون بطلت اتحول كده كل شوية
عشان مايجيش في يوم يقعد يدور على الي كان جايلها اول مرة اصلأً و مش لاقيها دلوقتي




الحمد لله smile.gif





جزاكم الله خيرا الي كمل قرائة الكعبوشة دي لحد اخرها

Friday, May 18, 2007

صناعة ربّانية



زمان كنت ببقى معجبة جدا بأي فيلم أمريكي...
لأني بحسهم عمرهم ما بيذكروا تفصيلاية واحدة.. إلا و كانت ليها اهمية في الفيلم
من بداية الفيلم خالص خالص... حد يجي يقول كلمة... الجملة دي بتفيد في اخر الفيلم
حد يذكر في النص ان البطل في صغره لعب لعبة كذا... و اخر الفيلم لقدراته الجسمانية اللي اكتسبها من اللعبة دي يعرف يخلصهم من الخطر المحيط بيهم blink.gif
سيبكم من قصة الفيلم اصلاً و من الافتكاسات الي بيعملوها... هما بيصنعوا ابطال من ورق و بيبوظوا كتير من المفاهيم و الاسس الي عندنا...

بس نقطة التفاصيل المهمة دي... هيا اكتر حاجة كانت بشتد تفكيري...


حاولت قريب اقارن بين اتقانهم في التفاصيل.. و بين الاتقان الربّاني..

ربنا مالك الكون...
ربنا الي بيسّير الكون كله عشان هدف واحد...

كل تفصيلة فيه تبقى مهمة...
كل تفصيلة بنتعرض ليهم.,.. مهمة جدا بالنسبة لينا

الحكاية مش بتيجي كده بالصدفة
ولا هيا حاجات مالهاش لازمة بنتعرض ليها طول حياتنا

لو هيا فعلاً حاجات مش مهمة... ماكنش ربنا يسّرلنا الكون و سبّب لينا الاسباب عشان نشوفها

كام حد فينا في يوم ماشى جمب مكان معين و سمع كلمة من اتنين بيتكلموا... الكلام ده أثر فيه بعد كده!!

بتحصل كتير قوى..
و انتا ماعدتش هناك صدفة!
ولا الناس دول كانوا بيتكلموا بصوت يوصلك كده و خلاص!
ربنا هوا الي خلاك تمشى و سيّر الكون كله عشانك انتا!

كام مرة تقول الحمد لله و تلاقي بعديها حد معدي من جمبك مبتسملك اوى..
هيا دي صدفة!
ربنا بيقول وَإِذْ تَأَذَّنَ رَبُّكُمْ لَئِنْ شَكَرْتُمْ لأَزِيدَنَّكُمْ

و ربنا بسابق علمه عرف انك هتقول في اليوم الفلاني في الوقت ده بالذات... هتقول الحمد لله طالعة بصدق من قلبك
ف يسّرليك الكون ان نعمة جديدة تيجي قدام حمدك ده و تبسطك...

ربنا بيقول لسيدنا موسى في سورة طه وَاصْطَنَعْتُكَ لِنَفْسِي

متخيلين كام حاجة مرت علينا في حياتنا.. و ماستفدناش بيها ولا استغلناها زي ما المفروض نعمل

ربنا ان كان عالم الحاجة دي مش مفيدة ليك عمره ما كان هيبعتها... الكون منظم و مسيّر تبع حكمة ربنا بس الي يعرفها..

ربنا ان كان عالم انها فعلاً هتفيدك.. عشان كده باعتهالك
الدور بقى علينا احنا نعرف نستغلها صح... و نعرف نمشى بيها صح

كام مرة فتحت التلفزيون و لاقيت قناة عليها شيوخ افاضل بيقولوا الكلام الي انتا محتاج تسمعه دلوقتي!

كام مرة كنت بتقلب في التلفزيون ممكن اتفرجت على حاجة مش دينية.. بس سبحان الله تلاقيهم بيقولوا كلام انتا مستنيه يفيدك في حاجة في حياتك...


دي المعاني الي في مخي بقالي كام يوم
بحاول من ساعة ما فهمت كده على قد ما اقدر انى اتفكر في كل موقف صغير حصل
حتى الحاجات اي بشوفها و انا ماشية... بحاول اطلع منها معني... و احاول افهم سبب ليه شفتها..

مجرد احساس انك في الكون بتاع ربنا... و ان مافيش اي حاجة بتحصل هباء.. مخليني احس براحة و طمـأنينة شديدة بجد

الكون معمول عشاني... و متيسّرلي انى اتعلم الحاجات الي هتفيديني بس
و متيّسّرلي الاوقات و الناس الي ممكن اعلمهم الي اتعلمته...


الحمد لله على كل شئsmile.gif

حبيت اشرككم معايا بالمعاني دي
و اعتذر ان كان كلامي ملخبط و متخبط شوية...


smile.gif
سلام عليكم

Monday, May 14, 2007

أول تاج

السلام عليكم و رحمة الله

اول تاج يوصلني على المدونة اهو ... من أخونا وضاح
أعتذر عن الـتأخير ده

من هو:أحب شخص لقلبك فى الدنيا؟

ابنى الي هيبقى شهيد ان شاء الله و زوجي اما يجي بالسلامة بإذن الله
smile.gif
غير كده... ادعولي اعرف اوصل فعلأً لنقطة ان الرسول عليه الصلاة و السلام يبقى أحب إلى من نفسي و حتى أحب إلى من الناس الي فوق دول الي مستنياهم و لسه مش جم

و اي مسلم بيشتغل في سبيل الله بحبه جدا و بحسه فعلأً احب شخص إلى قلبي...

smile.gif

ــــــــــــــــــــــ
انسان مستعد تضحي بحياتك –ركز فى كلمة حياتك- عشانه؟
اي شخص مسلم مستعد هوا يبذل في سبيل الله و في سبيل الدين
يستاهل مني انى اعمل اي شئ عشانه... حتى و إن كانت انى اقدم روحي دفاعأً عن الشخص ده...

و اكيد اعلى منهم كلهم الرسول عليه الصلاة و السلام
و اسأل الله بصدق ان يرزقني الاخلاص في الجملة دي بالذات

ـــــــــــــــــــ
اسم أول حب؟
laugh.gif
ايام الضياع دي بقى
laugh.gif
الحاجات وانا صغيرة و هبلة و مش فاهمة دي

بس كنت ببقى عارفة ان كلهم ولا حاجة.. و مجرد اعجاب عابر ولا عمره هيتعدى اعجاب عابر لطبيعة السن و المرحلة العمرية دي
ف ماكنتش بدي للموضوع اي اهمية ولا بفكر فيه ولا اي حاجة
smile.gif
ــــــــــــــــــــــــ

اسم اخر حب(حتى الان)؟
ما قلنا مش بديهم اي اهمية
smile.gif
انا قاعدة مستنية الكابتن rolleyes.gif
ربنا يوصله بالسلامةcool.gif

ـــــــــــــــــــ
نسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

laugh.gif
ايه التشبيه ده كله
فيه ناس ااه وصلت انى ابغضهم في الله
بس مش لدرجة امسك سكينة و بتاع

سايباهم لله ربنا يرجعلي حقى منهم في الوقت المناسب او يوم القيامة بقى و خلاص
smile.gif

ــــــــــــــــــــــ
ما هو :اسم أجمل كتاب كتبه بشر قرأته ومحتفظ به حتى الان ؟
للاسف قرايتي مش كتيرة اوى... بالله عليكم ادعولي الحكاية دي تتصلح و اقرى احسن من كده

بس فيه كام كتاب قريتهم حلوين.. فيه منهم للاسف مش خلصتهم

الرحيق المختوم للمبار كافورى
جدد حياتك للشيخ الغزالى
لا تحزن لعائض القرني... و بأمانة انا مش قريته كله لسه قريت شوية و سمعت الشريط بتاعه بس لسه هوا نفسه مش قريته كله blush.gif

و اي كتاب للكاتب عبد الوهاب مطاوع رحمه الله بحب اقراهم بردو القصص الحقيقة الي كان بيجيبها و نصايجه عليهم

ـــــــــــــــــــــــ
اسم كتاب-كتبه بشر برضة- انت متعلق بيه وبتقرأه كل فترة؟
مانا لسه قايلة مش بقرى كتير اصلأً... كمان هعيد عليهم sad.gif
بس الي فيهم بجد.. الرحيق المختوم كل فترة ارجع لحتة قديمة فيه عشان افتكرها اكتر او يعني ساعات اكون ناسية اسم معين ف ارجع اأكد عليها و كده


ـــــــــــــــــ
اهم جهاز منزلى انت متعلق بيه او بتستخدمه كتير ؟
الكمبيوتر بلا منازع تقريبا happy.gif
و ساعات بحب الغسالة والله ممتعة بالنسبة لي جداcool.gif

ـــــــــــــــــ
شىء تحس بالراحة النفسية عندما تنظر اليه ؟
اي منظر طبيعي...
خاصة المية و الموجة في البحر.. او اشجار بتتمايل مع الهوا... و السحاب ليه معزة خاااصة عندي happy.giflaugh.gif


ــــــــــــــــــــــــ
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
وانا قاعدة قدام البحر بتابع الامواج
smile.gif

ـــــــــــــــــــ
مكان تحس بالراحة عندما تدخله ؟
اي جامع.. بحس براحة شديدة فيه


ـــــــــــــــــــــ

اجمل مدينة زرتها داخل مصر ؟


ممم
شرم الشيخ فيها مناطق شكلها حلو اوى..
و بحب اسكندرية اوى اوى

و بحب الجو في العين السخنة و راس سدر.. لو دول يعتبروا مدن يعني smile.gif

ـــــــــــــــــــــ

أجمل مكان طبيعي رأيته داخل مصر؟
البحر في اسكندرية ... او اكتر البحر في الساحل (عشان بيبقى انضف يعني من شوية اماكن في اسكندرية)... بالنسبة لي احلى حتة خالص
smile.gif

ـــــــــــــــــــــــ
نوع هاتفك المحمول؟
نوكيا36_13_1[1].gif
ـــــــــــــــــــــــ
سرعة بروسيسور جهازك ؟

ولا اعرفcool.gif
بس ده سؤال عندي في مادة لازم اعرفه الحقيقة عشان اجاوبه في واجب للدكتور

ابقى اسأل اخويا ان شاء اللهcool.gif


ـــــــــــــــــــــــــــ
حجم ذاكرة –هارد- جهازك ؟
نفس الرد الي فوقrolleyes.gif

ـــــــــــــــــــــــ
المساحة التى تشغلها المواد الاسلامية على جهازك ؟
كتير... ماعرفش كام بالظبط...

الي عندي على الكمبيوتر شوية صور لاصحابي و عيلتي دول يعتبروا مش اسلامي...
و فيه المذاكرة بقى او اي شغل بنجزه
و شوية لعب كده بلعب بيهم وقت الفراغ rolleyes.gif


ـــــــــــــــــــــــ
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
ربنا يعيننا


ـــــــــــــــــــــــ

أهم هدف انت واضعه لحياتك دلوقتى ؟


في حياتي العملية... أتفوق في مجال التنمية البشرية و اكون قادرة ادى كورسات مميزة فيها
و ابقى ام الشهيد ان شاء الله

ــــــــــــــــــــــ

مواصفات فتاة –أو فتى للبنات- الأحلام بالنسبة لك ؟
smile.gif
الدين هوا مركز حياته... يعني كل حياته و كل وقته و كل هوياته و كل شغله عشان خاطر الدين و المسلمين
خلوق و طيب... اهم صفة انه يعرف يحتويني.. ويقدر يفهمني من غير ما اتكلم
لأنى من الناس الي ساعات بتبقى صعب عندي اعبر عن الي جوايا في مواقف معينة
ف يبقى يفهم هوا يعني لوحده مش لازم يتعبني كتير cool.gif
و يتقبلني زي مانا... زي مانا هتقبله زي ماهوا من غير اي تغيير

و حاجات تانية نخليها على جمب دلوقتي
smile.gif



ـــــــــــــــــــــــــ
صف ما يأتى :شعورك لما بتسمع كلمة مصر؟
والله بحبها اوى البلد ديsmile.gif
بفتكر الطيبة بتاعت شعبها و حدعنتهم في مواقف معينة

بس ساعات بفتكر بردو انهم شعب غلبان و اتضحك عليه كتير و هما بقى زهقانين مابقاش جواهم حتى قدرة على انهم يكملوا...


بس حديث الرسول عليه الصلاة و السلام ان مصر فيها خير اجناد الارض...

هيجيلهم وقت يقوموا و يسيبو كل التعب و الهم ده وراهم و يكملوا في الطريق الصحيح

ـــــــــــــــــــــــ

شعورك لما بتسمع كلام عن اليهود ؟

جبناء
ــــــــــــــــــــــــــ
شعورك لما بتشوف ظابط شرطة ؟
للاسف بفتكر شوية مواقف شفتها او سمعت عنها...
و بقعد ادعي الشخص ده مايكونش منهم.. و ربنا يهديه يعرف يستغل منصبه في شئ مفيد
و ان كان منهم... ربنا يهديهم و يرجعهم ليه...
ــــــــــــــــــــــــــ

شعورك لما بتشوف الكناس العجوز فى الطريق ؟
طيبين اوى الناس ديsmile.gif
بدعي ربنا كتير يهديهم انهم يخلوا شغلهم بنية لله..
لأنها ان كانت لله هياخدوا حسنات كتيرة بجد..
و بحسني عاوزة اروح اتبسم في وجههم و اخلي كل الناس تروج تتبسم في وجههم كده...
ربنا يكرمهم من كرمه
ـــــــــــــــــــــــ

لون البطانية اللى بتتغطى بيها فى الشتاء ؟

ممم
هيا واحدة وشها لون و ضهرها لون تاني cool.gif
حاجة كده عشان نزود احساس الزهايمر عندي و يلخبطوني زيادة laugh.gif

واحدة حمرا و الضهر بتاعها اخضرsmile.gif

مالهمش اي علاقة ببعضيتهم rolleyes.gif


ـــــــــــــــــــــــــــــ
لون الجورب-الشراب- المفضل لديك ؟

cool.gif
عندي كتير اوى و الوانتهم كتييير
بحبهم كلهم الحقيقة
و بحب اقعد اطقمهم على اللبس cool.gif
كل يوم تقريباً وقت الصلاة ليا صاحبة في الكلية تقعد تبص على شرابي و تشوفه ماشى مع لبسي ولا لأ .... من كتر ما هيا بتحب انى بلبسهم لايقين على بعض cool.gif


ـــــــــــــــــــــــــــــــ
ا
حساسك اذا داست قدمك فى الطريق على مخلفات اخراج حيوان- *** ولا مؤاخذة- ؟

بقول أيّا laugh.gif
و بعدين بقول الحمد لله لعله خير
و يااا رب اعرف اشيلهم و ماتفضلش عالقة في رجلي كتير كده
laugh.gif
و بفتكر انها من ذنب ليا... او انها بتكفر ذنب
ف اقول الحمد لله... و في مخي بردو انها يا رب مش تفضل عالقة كتير
ــــــــــــــــــــــــــ

ا
فكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
ا
دعو الله له كثيراً يكون فاهم الدين صح و بيطبقه صح و يكرمه في حياته و دنيته و مع اهله و ينشأ جيل فاهم دينه صح


ـــــــــــــــــــــــــــ

احساس يراودك فى اشارة مرور مغلقة بسبب مسئول كبير؟

بيصعبوا عليا والله...
متاع الدنيا زائل..
و هما كده لا بيفيدو ولا بيستفيدوا ولا بيعملوا اي حاجة غير شوية بطيخ و خلاص sleep.gif







كفاية كده!!
unsure.gif

knight.gif



لمن ترسل هذا التاج ؟؟


مممم
هوا اتبعت لكتييير غيري...
ف مش عارفة مين لسه مش وصله
g.gif



ابعته
لمسلمة روزاليندا


لأخونا عمرو في
Hyper Minds
smile.gif