أول تاج
السلام عليكم و رحمة اللهاول تاج يوصلني على المدونة اهو ... من أخونا وضاح
أعتذر عن الـتأخير ده
من هو:أحب شخص لقلبك فى الدنيا؟
ابنى الي هيبقى شهيد ان شاء الله و زوجي اما يجي بالسلامة بإذن الله
غير كده... ادعولي اعرف اوصل فعلأً لنقطة ان الرسول عليه الصلاة و السلام يبقى أحب إلى من نفسي و حتى أحب إلى من الناس الي فوق دول الي مستنياهم و لسه مش جم
و اي مسلم بيشتغل في سبيل الله بحبه جدا و بحسه فعلأً احب شخص إلى قلبي...
ــــــــــــــــــــــ
انسان مستعد تضحي بحياتك –ركز فى كلمة حياتك- عشانه؟
اي شخص مسلم مستعد هوا يبذل في سبيل الله و في سبيل الدين
يستاهل مني انى اعمل اي شئ عشانه... حتى و إن كانت انى اقدم روحي دفاعأً عن الشخص ده...
و اكيد اعلى منهم كلهم الرسول عليه الصلاة و السلام
و اسأل الله بصدق ان يرزقني الاخلاص في الجملة دي بالذات
ـــــــــــــــــــ
اسم أول حب؟
ايام الضياع دي بقى
الحاجات وانا صغيرة و هبلة و مش فاهمة دي
بس كنت ببقى عارفة ان كلهم ولا حاجة.. و مجرد اعجاب عابر ولا عمره هيتعدى اعجاب عابر لطبيعة السن و المرحلة العمرية دي
ف ماكنتش بدي للموضوع اي اهمية ولا بفكر فيه ولا اي حاجة
ــــــــــــــــــــــــ
اسم اخر حب(حتى الان)؟
ما قلنا مش بديهم اي اهمية
انا قاعدة مستنية الكابتن
ربنا يوصله بالسلامة
ـــــــــــــــــــ
نسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
ايه التشبيه ده كله
فيه ناس ااه وصلت انى ابغضهم في الله
بس مش لدرجة امسك سكينة و بتاع
سايباهم لله ربنا يرجعلي حقى منهم في الوقت المناسب او يوم القيامة بقى و خلاص
ــــــــــــــــــــــ
ما هو :اسم أجمل كتاب كتبه بشر قرأته ومحتفظ به حتى الان ؟
للاسف قرايتي مش كتيرة اوى... بالله عليكم ادعولي الحكاية دي تتصلح و اقرى احسن من كده
بس فيه كام كتاب قريتهم حلوين.. فيه منهم للاسف مش خلصتهم
الرحيق المختوم للمبار كافورى
جدد حياتك للشيخ الغزالى
لا تحزن لعائض القرني... و بأمانة انا مش قريته كله لسه قريت شوية و سمعت الشريط بتاعه بس لسه هوا نفسه مش قريته كله
و اي كتاب للكاتب عبد الوهاب مطاوع رحمه الله بحب اقراهم بردو القصص الحقيقة الي كان بيجيبها و نصايجه عليهم
ـــــــــــــــــــــــ
اسم كتاب-كتبه بشر برضة- انت متعلق بيه وبتقرأه كل فترة؟
مانا لسه قايلة مش بقرى كتير اصلأً... كمان هعيد عليهم
بس الي فيهم بجد.. الرحيق المختوم كل فترة ارجع لحتة قديمة فيه عشان افتكرها اكتر او يعني ساعات اكون ناسية اسم معين ف ارجع اأكد عليها و كده
ـــــــــــــــــ
اهم جهاز منزلى انت متعلق بيه او بتستخدمه كتير ؟
الكمبيوتر بلا منازع تقريبا
و ساعات بحب الغسالة والله ممتعة بالنسبة لي جدا
ـــــــــــــــــ
شىء تحس بالراحة النفسية عندما تنظر اليه ؟
اي منظر طبيعي...
خاصة المية و الموجة في البحر.. او اشجار بتتمايل مع الهوا... و السحاب ليه معزة خاااصة عندي
ــــــــــــــــــــــــ
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
وانا قاعدة قدام البحر بتابع الامواج
ـــــــــــــــــــ
مكان تحس بالراحة عندما تدخله ؟
اي جامع.. بحس براحة شديدة فيه
ـــــــــــــــــــــ
اجمل مدينة زرتها داخل مصر ؟
ممم
شرم الشيخ فيها مناطق شكلها حلو اوى..
و بحب اسكندرية اوى اوى
و بحب الجو في العين السخنة و راس سدر.. لو دول يعتبروا مدن يعني
ـــــــــــــــــــــ
أجمل مكان طبيعي رأيته داخل مصر؟
البحر في اسكندرية ... او اكتر البحر في الساحل (عشان بيبقى انضف يعني من شوية اماكن في اسكندرية)... بالنسبة لي احلى حتة خالص
ـــــــــــــــــــــــ
نوع هاتفك المحمول؟
نوكيا
![36_13_1[1].gif](http://www.alltalaba.com/board/style_emoticons/default/36_13_1%5B1%5D.gif)
ـــــــــــــــــــــــ
سرعة بروسيسور جهازك ؟
ولا اعرف
بس ده سؤال عندي في مادة لازم اعرفه الحقيقة عشان اجاوبه في واجب للدكتور
ابقى اسأل اخويا ان شاء الله
ـــــــــــــــــــــــــــ
حجم ذاكرة –هارد- جهازك ؟
نفس الرد الي فوق
ـــــــــــــــــــــــ
المساحة التى تشغلها المواد الاسلامية على جهازك ؟
كتير... ماعرفش كام بالظبط...
الي عندي على الكمبيوتر شوية صور لاصحابي و عيلتي دول يعتبروا مش اسلامي...
و فيه المذاكرة بقى او اي شغل بنجزه
و شوية لعب كده بلعب بيهم وقت الفراغ
ـــــــــــــــــــــــ
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
ربنا يعيننا
ـــــــــــــــــــــــ
أهم هدف انت واضعه لحياتك دلوقتى ؟
في حياتي العملية... أتفوق في مجال التنمية البشرية و اكون قادرة ادى كورسات مميزة فيها
و ابقى ام الشهيد ان شاء الله
ــــــــــــــــــــــ
مواصفات فتاة –أو فتى للبنات- الأحلام بالنسبة لك ؟
الدين هوا مركز حياته... يعني كل حياته و كل وقته و كل هوياته و كل شغله عشان خاطر الدين و المسلمين
خلوق و طيب... اهم صفة انه يعرف يحتويني.. ويقدر يفهمني من غير ما اتكلم
لأنى من الناس الي ساعات بتبقى صعب عندي اعبر عن الي جوايا في مواقف معينة
ف يبقى يفهم هوا يعني لوحده مش لازم يتعبني كتير
و يتقبلني زي مانا... زي مانا هتقبله زي ماهوا من غير اي تغيير
و حاجات تانية نخليها على جمب دلوقتي
ـــــــــــــــــــــــــ
صف ما يأتى :شعورك لما بتسمع كلمة مصر؟
والله بحبها اوى البلد دي
بفتكر الطيبة بتاعت شعبها و حدعنتهم في مواقف معينة
بس ساعات بفتكر بردو انهم شعب غلبان و اتضحك عليه كتير و هما بقى زهقانين مابقاش جواهم حتى قدرة على انهم يكملوا...
بس حديث الرسول عليه الصلاة و السلام ان مصر فيها خير اجناد الارض...
هيجيلهم وقت يقوموا و يسيبو كل التعب و الهم ده وراهم و يكملوا في الطريق الصحيح
ـــــــــــــــــــــــ
شعورك لما بتسمع كلام عن اليهود ؟
جبناء
ــــــــــــــــــــــــــ
شعورك لما بتشوف ظابط شرطة ؟
للاسف بفتكر شوية مواقف شفتها او سمعت عنها...
و بقعد ادعي الشخص ده مايكونش منهم.. و ربنا يهديه يعرف يستغل منصبه في شئ مفيد
و ان كان منهم... ربنا يهديهم و يرجعهم ليه...
ــــــــــــــــــــــــــ
شعورك لما بتشوف الكناس العجوز فى الطريق ؟
طيبين اوى الناس دي
بدعي ربنا كتير يهديهم انهم يخلوا شغلهم بنية لله..
لأنها ان كانت لله هياخدوا حسنات كتيرة بجد..
و بحسني عاوزة اروح اتبسم في وجههم و اخلي كل الناس تروج تتبسم في وجههم كده...
ربنا يكرمهم من كرمه
ـــــــــــــــــــــــ
لون البطانية اللى بتتغطى بيها فى الشتاء ؟
ممم
هيا واحدة وشها لون و ضهرها لون تاني
حاجة كده عشان نزود احساس الزهايمر عندي و يلخبطوني زيادة
واحدة حمرا و الضهر بتاعها اخضر
مالهمش اي علاقة ببعضيتهم
ـــــــــــــــــــــــــــــ
لون الجورب-الشراب- المفضل لديك ؟
عندي كتير اوى و الوانتهم كتييير
بحبهم كلهم الحقيقة
و بحب اقعد اطقمهم على اللبس
كل يوم تقريباً وقت الصلاة ليا صاحبة في الكلية تقعد تبص على شرابي و تشوفه ماشى مع لبسي ولا لأ .... من كتر ما هيا بتحب انى بلبسهم لايقين على بعض
ـــــــــــــــــــــــــــــــ
احساسك اذا داست قدمك فى الطريق على مخلفات اخراج حيوان- *** ولا مؤاخذة- ؟
بقول أيّا
و بعدين بقول الحمد لله لعله خير
و يااا رب اعرف اشيلهم و ماتفضلش عالقة في رجلي كتير كده
و بفتكر انها من ذنب ليا... او انها بتكفر ذنب
ف اقول الحمد لله... و في مخي بردو انها يا رب مش تفضل عالقة كتير
ــــــــــــــــــــــــــ
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
ادعو الله له كثيراً يكون فاهم الدين صح و بيطبقه صح و يكرمه في حياته و دنيته و مع اهله و ينشأ جيل فاهم دينه صح
ـــــــــــــــــــــــــــ
احساس يراودك فى اشارة مرور مغلقة بسبب مسئول كبير؟
بيصعبوا عليا والله...
متاع الدنيا زائل..
و هما كده لا بيفيدو ولا بيستفيدوا ولا بيعملوا اي حاجة غير شوية بطيخ و خلاص
كفاية كده!!
لمن ترسل هذا التاج ؟؟
مممم
هوا اتبعت لكتييير غيري...
ف مش عارفة مين لسه مش وصله
ابعته
لمسلمة روزاليندا
لأخونا عمرو في
Hyper Minds
9 comments:
أخت مجاهدة
:)
ما شاء الله .. حقيقي إجاباتك على التاج جميلة جدا
أشعر فيها بكثير من الصدق
بارك الله فيكي ورزقك ما تتمني
:)
بالماسبة حضرتك لم تتأخري في التاج
:)
أعانك الله ووفقك
جزاك الله خيرا
فيه إجابات ضحكت عليها أوي ..
الغسالة :D
والكابتن لما يجي بالسلامة
hehehe
بس ماشاء الله طبعاً إجابات تدل على شخصية... همم .. ربنا يكرمها ..
:)
استمعت كتيير وأنا بقرا التاج
ولما أخد رست من العقاقير :(
هجاوبه على طوول
دعوات حضرتك بقى
علشان ميخللش شوية
اخ وضاح
:)
جزاك الله خيراً كثيراً
:)
التاج قعد بتاع عشر ايام بس
:d
ربنا يكرمك يا اخي
اخي عمرو
:d
مش عارفة ليه كل ما حد يجي على الغسالة يضحك بردو
:d
ربنا يكرمك يا اخي و يعينك على العقاقير
:)
شدنى جدا احب شخص الى قلبكم انه ابنكم الشهيد
جميل فعلا ان الواحد يكون عايش عشان هدف واحد .. وان شاء الله يحققه :)
ماشاء الله ربنا يجعلك
من جند الاسلام يا اخت مجاهده
مجاهدة
جميل جدا
خليط من الحكمة و العفوية
اتمنى لك التوفيق
:)
اخي بن توفيق
جزاك الله خيراً على التعقيب يا اخي
حاساها حاجة عادية.. :)
كتير مننا فعلاً مرتبطين بحب قوى مع اولادهم.. و ممكن مع ازواجهم
و هما لسه لا عرفوهم ولا شافوهم... بتبقى حاجات في علم الغيب
بس من كتر اليقين انهم موجودين... اعرف ناس بيدعولهم حتى من قبل ما يجو :) و شخصياً انا من الناس دي :)
اعرف بنت ساعات كتير بتترفع انها تعمل اي صغيرة او تعمل حاجة هتقلل من شأنها.. عشان خاطر ولادها
عشان لما تيحي تقولهم ده صح يتعمل و ده غلط مش يتعمل.. يبقى كلامها سليم فعلأً مش بتضحك عليهم ولا على نفسها
و عشان تفضل دايماً الصورة في راسهم ان والدتهم كويسة و قدوة في نظرهم
:)
البنت دي اصغر مني بكام سنة كده
:)
اخي الكريم عبد العزيز مجاهد
جزاك الله خيراً كثيراً على المرور الكريم و الدعوة الطيبة
:)
ربنا يتقبلها منك اخي الكريم و يجعلي نصيب منها
:)
منة
ربنا يعزك يا رب:):)
حكمة ايه بس يا عم ماتقوليش كده
:)
ربنا يكرمك :)
جزاكى الله خيراً كثيراً
بصراحة الاجابات عجبتني
لكن اكتر حتة علقت معايا
حتة
ابني اللي هيبقي شهيد ان شاء الله
فكرتيني بحوار قريته علي اسلام اون لاين مع اسرة الطفل محمد الدرة لما المراسل سئل اخوه الصغير فين محمد دلوقتي وكانت الاجابة محمد عند ربنا
وان شاء الله نحصله كلنا
جميل جدا
ان نربي الاستشهادين من الان
لا ننتظر ان يكبروا وينشغلوا بقول اولئك الذين مازالوا يعتقدون ان تحرير ارض الحرب سيكون بالمفاوضات والسلام
اسف لو كنت طولت
ربنا يكرمك
ويعينك علي طاعته
وصيتي ليكي انك تلتزمي بكلامك
ابني اللي هيبقي شهيد ان شاء الله
ان شاء الله
اخي عمرو المصرى
جزاك الله خيراً على تعقيبك الطيب
:)
انا كمان... اوصي نفسي انى افضل اشتغل للنية دي و اعمل بيها في يوم من الايام
ربنا يعزك اخي الكريم
:)
Post a Comment