يا رب

يا رب ... إنقطع الأمل إلا منك
و إنقطع الرجاء إلا إليك



ــــــــــــــــــــــــــــــــــــــــــــــــــــــــ

الواحد ساعات بيلاقي في قلبه شوية حاجات بتدخل عليه لما دعوة بيدعيها ماتتحققش...
ف بيحتاج كل فترة تذكرة!


ربنا بيجيبلنا كل حاجة محتاجنها من غير دعاء
من هوا و اكل و إيواء
و مش بندعي يا رب اعرف اتنفس كل نفس بشكل صحيح
و مع ذلك ربنا بييسرلنا دي

سبحان الله...
اكيد يوم ما ارفع ايدي للحيّ الكريم هيستجيب دعائى
و هيحققلي اللي انا عاوزاه!


كلام احد العلماء في قوله




أَمَّنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الأَرْضِ أَإِلَهٌ مَعَ اللَّهِ قَلِيلا مَا تَذَكَّرُونَ
فإذا كان سبحانه يجيب دعاء المضطرين ، حتى و لو كانوا كافرين، فكيف يكون الأمر مع المسلمين؟؟


و مقولة لسيدنا عمر بن الخطاب رضى الله عنه و ارضاه
إنى لا أحمل هم الإجابة، و لكن أحمل هم الدعاء
:)

كتير بقعد اقول انى نفسي في حاجة معينة.... ف دي محتاجة دعاء مخصوص
و سبحان الله ان الشيطان بيجي يوسوس في الاوقات دي ... و يقعد يوهملي انى بلاش ادعي دلوقتي و استنى لحد بالليل مثلاً اقيم الليل بعديها ابقى ادعي
او يوسوسلي انى ابقى استنى لحظة من لحظات الاجابة... و يمنعني دلوقتي من انى ادعي
ال يعني مستنية لحظة من لحظات الاجابة

و الواحد ينسى ان ربنا اصلأً قريب لأي حد بيدعيه
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

يعني بمجرد ما الواحد يبتدي يدعي ربنا هوا قريب خلاص....
و سبحان الله ان الاية بعديها : أجيب" مافيهاش اي حرف حتى قبل الكلمة
بيحسسنى ان الاجابة بتبقى فورية... مافيهاش قبليها اي حاجة تعطلها :)


مقولة سيدنا عمر بحسها بتنطبق اوى على وقت التفكير ده...
اننا نشيل هم الدعاء اصلاً
و انه يكون دعاء باللي ربنا يرضاه
و نتخير اوقات صادقة في القلب و اوقات قال عنها الرسول عليه الصلاة و السلام انها اوقات استجابة دعاء

بس المهم ان القلب يكون صادق فعلاً في اي وقت وقت الدعاء!


و ماندعيش غير بالخير!


لسه قريب قارية عن شخص اسمه "بلعام بن باعوراء"... الرجل ده كان رجل صالح في قوم بنى اسرائل
و كان بيعبد ربنا كتير و بيقرب منه قوى... الناس كلها عارفة عنه الصلاح و التقوى
و الرجل ده من كتر قربه لله كان عارف اسم الله الاعظم... الذى إذا دُعى به ربنا يستجيب

سبحان الله الراجل ده زُين له بعض الاعمال و استخدم اسم الله الاعظم انه يدعي بالسوء على اهل الخير
و كانت النتيجة انه اياً كان الدعاء بالخير اللي بيدعيه على اهل الخير الدعاء بالسوء يرد على اهل الشر
و لو بيدعي بالخير لاهل الشر... الدعاء يرد لأهل الخير


استغل قربه من ربنا و فهمه في الدين لشئ يبعده عنه الله!
و كانت النتيجة هلاكه فيما بعد!



و اخيراً... قول العلماء: لا يمتنعن أحدكم من الدعاء لما يعلمه من نفسه، فإن الله أجاب دعاء شر الخلق - أى إبليس- حين قال: قَالَ رَبِّ فَأَنْظِرْنِي إِلَى يَوْمِ يُبْعَثُونَ .... فقال سبحانه: قَالَ فَإِنَّكَ مِنَ الْمُنْظَرِينَ.

بردو ساعات الواحد كان بيقعد يقول ازاى ربنا ممكن يستجيب لي و قد فعلت كذا و كذا!
و بيتعظم ذنبه على مغفرة ربنا
و يقول مش هعرف ادعيه باللي عاوزه دلوقتي!

:)
ف تيجي الايام دي و يشوف ان ربنا لبى دعوة إبليس ... و هوا أعتى خلقه.. بس استجاب دعوته :)


لما الرسول عليه الصلاة و السلام قال عن شخص من الصحابه : صدق الله فصدقه الله

المعنى ده في مخي اوى بقالي فترة...

انه هوا صدق الله الاول
و بعديها ربنا صدقه لصدقه ده!

يعني مثلاً اللي عاوز يموت شهيد... بيدعي ربنا... و بيقدم حاجات فعلأً بيبن فيها لربنا مدى صدقه في الدعوة دي
عشان كده ربنا بيصدقه و بيرزقه الشهادة في سبيله

اللي عاوز يكون مربي لأجيال يعلمهم دين الله... بيصدق الله الاول... انه يتعلم و ياخد بالاسباب... و يقرى و يفهم و يعمل كتير قوى
و وسط ده كله بيكون بيدعي... و اول ما تجيله الوسيلة دي بيصدق الله في عمله
و ربنا بيصدقه في الرزق اللي بيجيبهوله


ماينفعش واحد يفضل يعيش متواكل على الله.... انه بس بيدعي بس هوا مش بياخد اي موقف
ما ربنا مش هيستجيب دعائه لأنه وقت ما يتحط في المكان ده مش هيكون اهل ليه!
مش هيعرف يفيد الناس ولا هيفيد نفسه بأحسن طريقة ممكن


عشان كده حاسة... اننا لو احنا اللي صدقنا ربنا الاول
ربنا هيصدقنا
لو بناخد بالاسباب فعلاً
لو بنتعلم و بنأدي كل ما نملك في سبيل الله
لو صادقين في النية و العمل

ربنا هيصدقنا
و يجيلنا اللي احنا عاوزينه
ده ممكن حتى احسن مما نتخيل

فتنة

من المساوئ الي موجودة عندنا في الوقت ده... لغبطة شديدة جدا جدا في فهم الدين
اللي واخدين الدين بسطحية شديدة جدا... انه مجرد مظهر خارجى

و اللي واخدين الدين بردو بسطحية و يقولوا الشكل من بره مش مهم... و ربنا رب قلوب و بتاع


او ان يكون تانيين شايفين ان القرب من ربنا حتة قماشة مغطية بيها حتة من شعرها... و الحمد لله انا كده اتحجبت و قربت من ربنا و عملت كل اللي عليا

ماحدش ليه عندي حاجة بعد كده!!

و تلاقى الفئتين بيفتنوا الناس اللي حواليهم
و تلاقي الفئتين ينتقدوا بعض!

المنظر ده شفته كتير قوى قوى...
كذا مرة اشوف ان اللي بينتقددوا بنت مش محجبة هما نفسهم ناقصهم حجاب

مش بقوول ان اللي مش محجبة دي مش غلط... هيا كمان بتفتن الناس كتير و غلط كده
بس اللي بحسه غلط اكتر البنات اللي ناقصهم حجاب و ناقصهم اخلاق و ناقصهم كتير قوى... و بيقولوا على نفسهم خلاص محجبات

و يعملوا حاجات لا تمت للدين بصلة... بس للاسف بيفتنوا بقية الناس
فتنة حقيقة لسه حاسة بيها من كام يوم بس... لكذا موقف شفته و اتعرضتله

تطلع بنوتة سكرة في التلفزيون كمذيعة او ممثلة و تقول على نفسها محجبة و حجاب عصري و شيك
و حجابها كله ماليان مكياج و تنمص و لبس غريب لا يمت لللبس المحترم حتى بصلة....
و يجي بقية الناس يعملوا زيها و لو حد فكر يقولهم كده غلط يقولوا ازا كان حتى اسمها ايه طلعت في التلفزيون كده
و كمان قالت شروط الحجاب الشرعغي يبقى هيا اكيد لابسة الحجاب الشرعي و احنا لابسين زيها -_-


و اي بنت عاوزة تتمسك باللبس الشرعي فعلأً تقعد تحارب بقى ....
مع الناس اللي حواليها
مع اصحابها
مع اهلها
و مع نفسها!


اللي فعلًأ بقى فتنة قوية ان بنت تكون لابسة حجاب و لابسة عليه كارينا ... ربنا يهديهم بتوع كارينا دول :(
او لابسة بنطلون ضيق
او لابسة الوان مفرقعة

بس البنت فعلأً اخلاقها كويسة
و بتصلي الخمس صلوات...

الناس تقول اهي بنت متدينة و عارفة ربنا
و هيا بتلبس كده يبقى لبسها مش غلط


يبقى مالهاش لازمة ابداً بعد كده ان بنت تلبس ايشارب واسع و طويل زي ما ربنا امرها... ﻷن بقى النموذج اللي الناس بتقارن عليه كويس في الاخلاق و العمل و القرب من ربنا ... و كمان لبسها اهو كويس

و لا ليها لازمة انك تصلي بعد كده السنن.. ﻷن اهي دي بنت متدينة و بتصلي الفروض و كويسة خالص!!

ولا ليها لازمة تصلي في اول وقتها... اهي بنت كويسة و بتصلي كمان الفروض
بقيتي متشددة اوى انك بتصلي في اول الوقت ايه التعنت ده !!!!

ولا ليها لازمة تبقى مش بتلبسي لبس احمر و اصفر و اخضر.... المهم مش يبقى ملفت بزيادة
((بيبقى نفسي اعرف يعني ايه مش ملفت بزيادة دي!! ))

ولا ليها لازمة انك تبقى مش بتكلمي ولاد...
ماهيا بتقعد معاهم باحترام اهي!!

و تلاقي منهم البنت عادي تفتقر كتير اوى من اسس التربية... مش هقول حتى الدين... لا..حتى الحلال و الحرام
و تلاقي بنت عادي قاعدة مع بنات



عايشين في زمن فعلأً فيه فتن شديدة و كثيرة!

كانت صاحبتي امبارح بتحاول تقنعنا اننا لسه مش الزمن بتاع اننا نبقى كالقابضين على الجمر
ف واحدة ردت عليها ان القبض على الجمر ده مش لازم يكون فيه اذية مادية
يعني مش بنتعذب زي ما الصحابة كانوا بيتعذبوا مثلاً !!
((مع ان فيه فئة بيلاقو من العذاب المادى كثير))
بس اغلبنا لسه
بس هيا اذية معنوية
هتفضلي متمسكة بدينك ولا ﻷ!!

هتسمعي كلام ربنا ولا هتسمعي كلام الشيطان!!

الشيطان لو لقى شخص مداوم على حاجة و ثابت عليها عمره ما هيروح عنده يوسوسله...
ﻷننا اما بنثبت دام وسوسة الشيطان هناخد ثواب
و هوا هييأس... ف هيمشى

يقول الحسن رحمه الله: إذا نظر إليك الشيطان فرآك مداوماً في طاعة الله، فبغاك و بغاك - أي طلبك مرة بعد أخرى- فرآك مجاوماً، ملّك و رفضك، و إذا كنت مرة هكذا و مرة هكذا طمع فيك.


و يقول الله عز و جل:
إِنَّ عِبَادِي لَيْسَ لَكَ عَلَيْهِمْ سُلْطَانٌ


كيد الشيطان هين و ضعيف جدا جدا!

اعجبني وصف الشيخ محمد اسماعيل المقدم في مرة في كلامه عن الحجاب حين قال:
هلا تدبرت قول رسول الله عليه الصلاة و السلام : نحّ الأذى عن طريق المسلمين؟
فإذا كانت إماطة الأذى عن الطريق من شُعب الإيمان التى أمر بها رسول الله صلى الله عليه و سلم/ فأيهما أشد أذى؟
شوكة او حجر في الطريق، ام فتنة تُفسد القلوب، و تعصف بالعقول، و تُشيع الفاحشة في الذين أمنوا؟



و لما بنت تقول ان خلاص الولاد مش بقو بيحسو و انها مش هيا يعني اللي هتفتنهم و تبوظ حاجة
او تقول مش هيا اللي هتفتن البنات عن طريقهم
مش لاقية احسن من رد الشاعر حين قال:
تّظُنين الرجال بلا شعور... ﻷنك ربما لا تشعرينا

كلام كتير اوى و فتنة فعلأً عظيمة
و للأسف منتشرة جدا في الوقت ده...



اختم قولي بكلام سيدنا عمرو بن العاص حين وفاته.. أثّر في\ كثيراً حين قرأته

عن أبي نوفل بن أبي عقرب قال: جزع عمرو بن العاص عند الموت جزعاً شديداً، فقال ابنه عبد الله: ما هذا الجزع، و قد كان رسول الله يدنيك و يستعملك!
قال: أي بُنى! قد كان ذلك، و سأخبرك، إى والله ما أدرى احُباً كان أم تألُفاً، و لكن أشهد على رجلين أنه فارق الدنيا و هو يحبهما، ابن سمية (عمار) و ابن أم عبد (عبد الله بن مسعود). فلما جدّ به وضع يده موضع الأغلال من ذقنه، و قال : اللهم أمرتنا فتركنا، و نهيتنا فركبنا، ولا يسعنا إلا مغفرتك.

فكانت تلك هجيراه حتى مات

وقفات جميلة :)

السلام عليكم و رحمة الله

هما شوية حاجات مالهاش دعوة ببعضيتها كده :)


من كام يوم نفسي اكتب بوست بس مستنية لحد ما اغير الثيم بتاع البلوج... عشان نفسي الخلفية تبقى ابيضة... عشان اعرف الون براحتي :d


ربنا يباركلها مها... جزاها الله خيراً كثيراً :):)
بتتعب معايا بجد كل مرة اجي العب في المدونة
:)
ربنا يباركلك يا رب:)


ويسبر
جزاها الله خيراً كثيراً جدا اوى خالص :d
هيا الي عملت البتاعة الي فوق دي ^_^
ربنا يباركلك يااا رب
:)
ــــــــــــــــــــــــــــــــــــــــــــ

تاني حاجة
اختي الصغيرة امبارح ربنا يباركلها يااا رب و يرضى عنها طلعت نتيجتها في الثانوية العامة
في تانية ثانوي نتيجتها عالية ماشاء الله :)
ربنا يكرمها يا رب و يباركلها :)

قولولها مبروووك بقى :d



الي عجبني بقى امبارح و خلاني احس فعلأً بمدى نعم ربنا عليا :)

امبارح ألاء صاحبتي ربنا يكرمها كلمتني بالليل خالص عشان تاخد رقم جلوس اختي تحاول تطلعلهالها على النت
:)
و بعديها بشوية لاقيت رحاب بتكلمني... مع انها هيا الي عندها اخوها في ثانوية عامة بردو... بتكلمني تطمن على اختي عملت ايه
اخوها ماشاء الله بردو جاب نمرة عالية اوىىى ربنا يباركله يا ر ب:):)
و بعد شوية إيمان و هديل ربنا يباركلهم بجددددد فضلوا معايا على المسنجر و بيحاولو هما كمان يطلعوا درجات اختي
:)
الذ حاجة ان إيمان طلعت درجات... و رحاب مطلعة درجات تانية خااااااالص
و هديل تقولي اصلأً رقم الجلوس ده غلط :d
:):)
صاحبتي التانية سلمى كلمتني من و هيا مسافرة عشان تشوف اختي تتطمن عليها


بجد ربنا يكرمهم يا رب و يجازيهم خيراً كثيراً
:)
حلو اوى  الناس دي
:)
بتحس بجد اد ايه هما جمال و طيبين

مع ان مش فيهم كتير يعرفوا اختي شخصياً... بس هما حلوين فعلأً ربنا يباركلهم يا رب
:):)



ـــــــــــــــــــــــــــــــ


اخر حاجة بقى ... هيا وقفة معايا انا مش تبع الوقفات الجميلة :)

النهاردة لاقتيني عمالة افكر في حاجات كتيرة قوى ايه الي بيحصل و مين عمل ايه
لاقيتني عمالة افكر في الحاجات اللي اكتسبتها و الحاجات اللي خسرتها على الكام سنة اللى فاتو

و لاقيتني في تفكيري بلوم الناس اللي حواليا!

يعني اقول مثلاً ان اهلي هما السبب في كذا و كذا عندي
و اصحابي السبب في كذا
و انا بقيت كده لما حصللي كذا و كذا من فلان و  فلانة

اتضايقت من طريقة التفكير دي

اللي وصلتله في الاخر
don't blame others for what you don't have


اي حاجة ربنا هوا اللي بيعتهالنا.... الناس دي مجرد الوسيلة و السبب ازاي اللي ربنا عاوزهولي بيوصلي
لو مهارة اكتسبتها ده خير و نعمة من ربنا

لو خلق نقص فيا او انا بقيت اوحش
ده لعيب فيا انا في استقبالي اللي بيحصلي
ماينفعش افضل الوم اللي حواليا و اقول انهم السبب انى لسه ماكتسبتش كذا او كذا


انا بس الي مسؤولة عن حياتي و استقبالي لأي شئ هوا اللي بيصحله او اللي بيبوظه
بس كده :)

القرب من الله

كان بقالي فترة متوقفة عن التدوين... عشان الظاهر من كتر الافكار مابقتش عارفة اجمع اي فكرة فيهم و امسكها... الاسبوع الي فات كان غريب شوية في احداثه و كده مش لاقية كتير اكتبه :)
بس فجأة من امبارح اول ما نزلت البوست و حاجات كتيرة بتجرى في مخي نفسي انزلها :d


اللي شجعني دلوقتي ابتدي اكتب عن ده... كلام قريته في مدونة مها...و بوست جميل اوى كتبته من فترة بس لسه قارياه داوقتي... تدوينتها تدفق لبعض الخواطر

ممكن ماحدش يعرف يجيب بسهولة الرابط بين كلامها و كلامي... بس عادي اتعودوا بقى :):)
احتمال انا نفسي ماعرفش اجيب الصلة بين الاتنين... بس اهو بعملك دعاية يا عم
:d

ساعات اقعد افكر.... امتى الواحد بيقرب اوى اوى من ربنا... و امتى يقعد يكتر اوى في الطاعات  لهدف معين عنده

يعني سيدنا عمر بن الخطاب كان بعد صلح الحديبية ... ماكنش فاهم لسه الحمة من الصلح و ليه ماعتمروش زي ماهما كانوا عاوزين و ليه وافقو على بنود المعاهدة دي و كان شايف وقتها انها بتقلل من شأن المسلمين و تخليهم يرضوا بأقل مما يستحقوا
و بعد ما تبينت له الحكمة و عرف الفتح العظيم الي ربنا يسره ليهم من بعد صلح الحدبيبية...و نزلت ايات (إنا فتحنا لك فتحاً مبينا ) فهم سيدنا عمر و ندم على ما قال ، و كان فيما قاله :فعملت لذلك أعمالاً مازلت أتصدق و أصوم و أعتق من الذى صنعت يومئد، مخافة كلامي الذى تكلمت بهـ حتى رجوت أن يكون خيراً..


كتير مننا مش بيلجأ لله غير بعد المعصية... و اما بتكون معصية شديدة و نفسه الامور تنصلح... ساعتها يبتدي يقرب لربنا اوى... لحد ما يبعد مع الوقت و يرجع تاني بعد معصية شديدة

او ساعات يقربوا لربنا اوى وقت ما يكونوا عاوزين حاجة... عاوزينها بشدة ف بيفضلوا مقربين اوى لربنا... و بعدين يمشوا

او يقربوا لربنا بعد ما امنيتهم تتحقق.. ف يشكروا الله و يرجوا الخير من الي جالهم و بعدين ينسو و يبعدوا

و بننسى مفهوم قربنا لربنا و نسينا مفهوم اننا المفروض نبقى مع ربنا في اي وقت.. سواء حاجات كويسة او حاجات وحشة

و مش هوا ده الي مطلوب مننا! ولا هوا ده اللي يخلي ربنا راضى عنا!

وَإِذَا مَسَّ الإِنسَانَ الضُّرُّ دَعَانَا لِجَنبِهِ أَوْ قَاعِدًا أَوْ قَآئِمًا فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَى ضُرٍّ مَّسَّهُ كَذَلِكَ زُيِّنَ لِلْمُسْرِفِينَ مَا كَانُواْ يَعْمَلُونَ


القرب من الله مش محتاج وقت ولا محتاج زمن معين
ولا القرب من اللله متوقف عند حادثة معينة... اول ما تخلص يمشو!


مش محتاج ان واحدة تقول هقعد ادعي ربنا لحد ما يكرمني بالزوج الصالح و اتهجد و اقوم الليل كل ليلة لحد ما يجي و بعدين اقول خلاص الخير جه ف تقلل من صلاتها او تنساها خالص للاسف

ولا محتاج ان واحدة تقول هبقى اعمل الحاجات دي من بعد ما اتزوج ابقى اقوم الليل انا و هوا مع بعض.. بس قبل كده مش هعمل حاجة


القرب من الله مش محتاج واحد يقول هبقى اتهجد بعد ما اخلف عشان اعلم ولادي ازاي يتهجدو... قبل كده مش محتاج تهجد!
ولا القرب من الله انه يفضل يتهجد كل يوم و بعد الزواج ينشغل بكل شئ و فيه منهم اللي للاسف حتى بيبطلوا ينزلوا للجامع في الصلوات العادية


مش محتاج في يوم تبقى عيان ف تدعي ربنا قوى يذهب عنك البأس
ولا هوا انك يوم ما تتعب تقول انك منشغل بالتعب و المرض ف مش قادر تقوم تصلي ولا قادر تقوم تعبده

القرب من الله مش محتاج نتيجة خايف منها عشان ابتدي ادعي ربنا
ولا محتاج امتحانات عشان اروح ادعي ربنا يوفقني فيها و بعد كده ماعرفش طريق الدعاء!

القرب من الله مش محتاج انى استنى لحد ما كرب يحصلي عشان اروح ادعي ربنا يخفف عني...

ولا القرب لله بيقول انى بعد ما تجيلي الكرب ده انشغل بيه و انسى حتى طريق المصلية فين!


الي عاوز يقرب من ربنا بيقربله دوماً... هوا اصلأً بيكون على طول معاه
الدرجة اللي بينطبق عليها لفظة "في معية الله"

يوم ما اكون محتاج حاجة ااه القرب ده بيزيد
يوم ما يجيلي كرب ااه درجة قربي من الله بتزيد

بس الباب مش محتاج حاجة تحصلك عشان تبتدي تخبط عليه
ولا الباب تقفله بعد ما تخلص اللي انتا عاوزه

ربنا مش محتاجلنا.... احنا اللي محتاجنله
و لو احنا الي توقفنا عن الدعاء و الصلاة و الذكر... احنا الي هنتعب و احنا الي دنيتنا هتتلخبط


هيا تذكرة.. لي قبل ما تكون ليكم

تاج تاني :)

السلام عليكم و رحمة الله
بقالي كتيييير مش كتبت حاجة هنا
:)

عندي تاج بقاله عشر سنين تقريباً... من حبيبة مستنية الفرج و من اخ عمرو في هايبر مايندس



بس الاول... للي يحب يجرب :)
فيه امتحان كده صغنون بيوريك اد ايه مدمن البلوج :d
و طلعت مدمنه :)
78%How Addicted to Blogging Are You?

Mingle² - Online Dating

ابقو شوفوا كده و نشوف مدى ادمانكم انتو كمان :d

ـــــــــــــــــــــــــــــــــــ

نيجي للتاج بقى :)




انت مين؟

:)
زي ما كاتبة في البروفايل بالظبط!
فتاة... لا أزيد عن بقية الخلق في اي ميزة... إلا في مزية واحدة.. خلقها الله فيّ... و هي سبب وجودي... ولا أقل عن اي من خلقه في شئ.. إلا في بضع عيوب.. اضافتها إليّ نفسي و سوء أعمالى
:)


مين اكتر 6 اشخاص بتحبهم؟


:d
سؤال غريب جدا
ﻷني بحب كتير جدا الحمد لله... درجات حبهم عندي بتتفاوت اكيد
و اكيد فيه ناس بحبهم اكتر من التانيين.. بس انا نفسي مش مرتباهم في مخي اوى
:)

يعني فيه كمان منهم احياء... و فيه منهم توفاهم الله... و فيه منهم كانوا ايام زمان بس من كتر ما قريت عنهم حاساني عايشة معاهم و حبهم متملك في قلبي حب صادق مش تهريج...
و فيه حبهم بيزيد مع الوقت!


ايه السؤال ده :d



انت سعيد؟

ياااااه... جدااا الحمد لله :):)
الواحد كل شوية يلاقي حاجات تبسطه اكتر...
و لما بكون متضايقة... بلاقي حاجات اكتر تبسطني

غير انى فعلاً طفلة... بيتضحك عليا بمصاصة :)
يعني ممكن حاجة جامده تكون حصلتلي و انساها تماما و اقعد مبسوطة عشان حاجة تانية صغيرة حصلت
و مش بحب اسيب فرصة كبيرة حلوة تعدى غير لما انشكح منها جدا جدا :d

الحمد لله :):)


لو اجتمعت انا وحسني مبارك في غرفة واحدة؟

:)
لو ربنا قدرني يعني... هقول كلمتين سمعتهم من الشيخ الشعراوى... عجبوني اوى اوى :)
الفيديو ده كان بعتهولى من فترة اخ محمد... و كل شوية اقعد افتكر نفس الجملتين

إن كنت قدرنا... فليوفقك الله
و إن كنا قدرك... فليعنك الله على ان تتحمل

:)
الواحد بس بيخاف في المواقف دي يكون بيقول كلام كده و خلاص... و اول ما يبقى في الموقف نفسه يحصله حاجات تانية ! :s


لو معاك مليون ونص جنيه......تعمل بيهم ايه؟
:d
صيغة السؤال مبينة انه مليون جنية.. و معاهم نص جنية
:d

انا مش بعرف اتعامل مع الارقام الكبيرة اصلا... بس ساعتها نبقى نفكر :)
بس الي نفسي فيه فعلاً... مشروع ضخم عشان اطفال الشوارع
ف لو فيه امكانية و ناس و افكار.... ربنا ييسر
:)

بتحب مصر؟
ياااااااااه جداا :):)
البلد دي حلوة اوى :)
و اهلها طيبين اوى و كيوسين اوى اوى :)
و كل مرة حد اعرفه ساكن بره يقعد يقولي الشعب هنا مش عرافة عاملين ايه كده مالهم!

بس احنا عندنا كويسين :)
ااه فيه كتير باظوا و ضاعو و اخلاقهم بقت وحشة و سلبيين
بس فيهم خير بردو كويس:)
و الي كويسين ... قليلن ااه.. بس كويسين اوى اوى :)

كفاية ان مصر فيها خير اجناد الارض :) الرسول عليه الصلاة و السلام هوا الي قال كده :):)


بتحب البنات؟

السؤال ده غريب جدا جدا :d

اصلأً يعني هوا متوجه لمين بالظبط؟؟؟
و بعد ما يتوجه ايه اللي مطلوب منه؟؟؟


بس يلا ماشى :)
ااه بحب البنات :)
ماحبهمش ليه يعني هوا انا صغيرة!!
:)


انت مسلم ؟
الحمد لله :):)

ليه؟
السؤال ده لوحده فيه رغي كتير قوى
:):)

مممم
اولاً... الحمد لله اتولدت في بيت مسلم
نعمة كبيرة قوى... ﻷني ليا اصحاب مش مسلمين بجد كل ما افكر في حالهم اقول الحمد لله انى في بيت مؤمن بربنا و بابا كان بيقولنا على الصلاة من زمان اوى ... الحمد لله :)


لما كبرت و بدأت ادور بقى و افكر.. و اعرف ايه الي بيحصل و ايه الدين و ليه بنصلي
حبيت اوى اوى الاسلام
و كنت بعديها بستغرب جدااا اما اشوف حد مش مسلم
بحسهم ساذجين... اتضحك عليهم بمعنى اصح :lol:


غير كده....
وَوَصَّى بِهَا إِبْرَاهِيمُ بَنِيهِ وَيَعْقُوبُ يَا بَنِيَّ إِنَّ اللَّهَ اصْطَفَى لَكُمُ الدِّينَ فَلا تَمُوتُنَّ إِلا وَأَنْتُمْ مُسْلِمُونَ

الحمد لله على نعمة الإسلام و كفى بها نعمة


مين اكتر شخصية ما تقدرش تستغنى عنها في حياتك؟وليه؟

مممم
هوا ان من زمان كنت اتعودت ان فيه كتير قوى بيمشو في حياتي... و كل ما احس انى معتمدة على حد بشكل كبير بعديها بشوية يمشى او بيفقد الثقة عندي او كده:)
ف عودت نفسي من زمان انى ماكونش معتمده على حد بشكل كبير كده
يعني ماعنديش انى احس انى اموت لو فلان مش موجود :) حتى لو فلان ده مين
:)
بس هيا فيه نقطة...
ربنا بيبعتلنا ناس عشان يفيدونا و يساعدونا.. يا اما هما بيقدمولنا حاجة جديدة... يا اما بناخد بيهم ثواب لما احنا الي نديلهم حاجة جديدة
و طالما فيه ناس معينين دلوقتي في حياتي هما دول الي ربنا باعتهملي... يبقى هما دول الي انا محتاجاهم اوى دلوقني
ف بحاول استفيد من كل شخص منهم على قد ما اقدر...
و بعد كده يجي ناس بعديهم هستفيد منهم بردو في الجزء ده من حياتي

و كده :)


ايه اكتر موقف محرج اتعرضت ليه في حياتك؟واتصرفت ازاي؟
الناس بتحب الحاجات دي اوى مش عارفة ليه :d

والله ما فاكرة اي حاجة فيهم دلوقتي :):)

بس مؤخراً... يعني بقالي بتاع تلات اربع سنين كده... اي حاجة بتحصل محرجة بحاول اتألم عليها

يا اما بقعد اضحك مع الناس عشان ماحسسش نفسي انهم بيضحكو عليا... ﻷ ده انا كمان بضحك اهو :)
او اني اعدي الموضوع من غير ما اعمل اي حاجة لا ابين انى محرجة ولا ان الموضوع كبير

ف عادي يعني الدنيا بتمشى اهي كويسة :):)



ه الأمنية اللي بتدعي ربنا دايما انه يحققها لك؟
ييييييييي كتيييير :):)
اصل الدعوة مش بفلوس :d
غير ان الواحد كل ما دعوة تتحقق يلاقي انه عاوز اكتر
:)

مممم بس الي دايماً بدعيها ... اللهم اجعلني كما تحب
و اخلص القرأن...
و الشهيد بقى و ابوه و الناس دي :d


تمرر التاج دة لمين؟
التاج ده انا شفته عند مصر كلها تقريبا
:(
ماعرفش مين لسه ماجاش عليه!

مممم
و الي اعرفهم لسه ماجاش عليهم اصلاً ماجاوبوش على تاجات من عشر سنين فاتت ف مش هحط ده كمان عندهم!

ممم
طيب ممكن لو حد عدى هنا و لسه ماجوبش عليه يجاوبه
:)

بالشفا :d



سلام عليكم :)