Monday, July 23, 2007

يا رب

يا رب ... إنقطع الأمل إلا منك
و إنقطع الرجاء إلا إليك



ــــــــــــــــــــــــــــــــــــــــــــــــــــــــ

الواحد ساعات بيلاقي في قلبه شوية حاجات بتدخل عليه لما دعوة بيدعيها ماتتحققش...
ف بيحتاج كل فترة تذكرة!


ربنا بيجيبلنا كل حاجة محتاجنها من غير دعاء
من هوا و اكل و إيواء
و مش بندعي يا رب اعرف اتنفس كل نفس بشكل صحيح
و مع ذلك ربنا بييسرلنا دي

سبحان الله...
اكيد يوم ما ارفع ايدي للحيّ الكريم هيستجيب دعائى
و هيحققلي اللي انا عاوزاه!


كلام احد العلماء في قوله




أَمَّنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الأَرْضِ أَإِلَهٌ مَعَ اللَّهِ قَلِيلا مَا تَذَكَّرُونَ
فإذا كان سبحانه يجيب دعاء المضطرين ، حتى و لو كانوا كافرين، فكيف يكون الأمر مع المسلمين؟؟


و مقولة لسيدنا عمر بن الخطاب رضى الله عنه و ارضاه
إنى لا أحمل هم الإجابة، و لكن أحمل هم الدعاء
:)

كتير بقعد اقول انى نفسي في حاجة معينة.... ف دي محتاجة دعاء مخصوص
و سبحان الله ان الشيطان بيجي يوسوس في الاوقات دي ... و يقعد يوهملي انى بلاش ادعي دلوقتي و استنى لحد بالليل مثلاً اقيم الليل بعديها ابقى ادعي
او يوسوسلي انى ابقى استنى لحظة من لحظات الاجابة... و يمنعني دلوقتي من انى ادعي
ال يعني مستنية لحظة من لحظات الاجابة

و الواحد ينسى ان ربنا اصلأً قريب لأي حد بيدعيه
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

يعني بمجرد ما الواحد يبتدي يدعي ربنا هوا قريب خلاص....
و سبحان الله ان الاية بعديها : أجيب" مافيهاش اي حرف حتى قبل الكلمة
بيحسسنى ان الاجابة بتبقى فورية... مافيهاش قبليها اي حاجة تعطلها :)


مقولة سيدنا عمر بحسها بتنطبق اوى على وقت التفكير ده...
اننا نشيل هم الدعاء اصلاً
و انه يكون دعاء باللي ربنا يرضاه
و نتخير اوقات صادقة في القلب و اوقات قال عنها الرسول عليه الصلاة و السلام انها اوقات استجابة دعاء

بس المهم ان القلب يكون صادق فعلاً في اي وقت وقت الدعاء!


و ماندعيش غير بالخير!


لسه قريب قارية عن شخص اسمه "بلعام بن باعوراء"... الرجل ده كان رجل صالح في قوم بنى اسرائل
و كان بيعبد ربنا كتير و بيقرب منه قوى... الناس كلها عارفة عنه الصلاح و التقوى
و الرجل ده من كتر قربه لله كان عارف اسم الله الاعظم... الذى إذا دُعى به ربنا يستجيب

سبحان الله الراجل ده زُين له بعض الاعمال و استخدم اسم الله الاعظم انه يدعي بالسوء على اهل الخير
و كانت النتيجة انه اياً كان الدعاء بالخير اللي بيدعيه على اهل الخير الدعاء بالسوء يرد على اهل الشر
و لو بيدعي بالخير لاهل الشر... الدعاء يرد لأهل الخير


استغل قربه من ربنا و فهمه في الدين لشئ يبعده عنه الله!
و كانت النتيجة هلاكه فيما بعد!



و اخيراً... قول العلماء: لا يمتنعن أحدكم من الدعاء لما يعلمه من نفسه، فإن الله أجاب دعاء شر الخلق - أى إبليس- حين قال: قَالَ رَبِّ فَأَنْظِرْنِي إِلَى يَوْمِ يُبْعَثُونَ .... فقال سبحانه: قَالَ فَإِنَّكَ مِنَ الْمُنْظَرِينَ.

بردو ساعات الواحد كان بيقعد يقول ازاى ربنا ممكن يستجيب لي و قد فعلت كذا و كذا!
و بيتعظم ذنبه على مغفرة ربنا
و يقول مش هعرف ادعيه باللي عاوزه دلوقتي!

:)
ف تيجي الايام دي و يشوف ان ربنا لبى دعوة إبليس ... و هوا أعتى خلقه.. بس استجاب دعوته :)


لما الرسول عليه الصلاة و السلام قال عن شخص من الصحابه : صدق الله فصدقه الله

المعنى ده في مخي اوى بقالي فترة...

انه هوا صدق الله الاول
و بعديها ربنا صدقه لصدقه ده!

يعني مثلاً اللي عاوز يموت شهيد... بيدعي ربنا... و بيقدم حاجات فعلأً بيبن فيها لربنا مدى صدقه في الدعوة دي
عشان كده ربنا بيصدقه و بيرزقه الشهادة في سبيله

اللي عاوز يكون مربي لأجيال يعلمهم دين الله... بيصدق الله الاول... انه يتعلم و ياخد بالاسباب... و يقرى و يفهم و يعمل كتير قوى
و وسط ده كله بيكون بيدعي... و اول ما تجيله الوسيلة دي بيصدق الله في عمله
و ربنا بيصدقه في الرزق اللي بيجيبهوله


ماينفعش واحد يفضل يعيش متواكل على الله.... انه بس بيدعي بس هوا مش بياخد اي موقف
ما ربنا مش هيستجيب دعائه لأنه وقت ما يتحط في المكان ده مش هيكون اهل ليه!
مش هيعرف يفيد الناس ولا هيفيد نفسه بأحسن طريقة ممكن


عشان كده حاسة... اننا لو احنا اللي صدقنا ربنا الاول
ربنا هيصدقنا
لو بناخد بالاسباب فعلاً
لو بنتعلم و بنأدي كل ما نملك في سبيل الله
لو صادقين في النية و العمل

ربنا هيصدقنا
و يجيلنا اللي احنا عاوزينه
ده ممكن حتى احسن مما نتخيل

21 comments:

عصفور المدينة said...

جزاك الله خيرا
قطع أسباب الامتناع عن الدعاء بالثقة في الله وسرعة اللجوء إلى الله
أن يكون الدعاء من قلب صادق موقن بالإجابة صادق في الرغبة والرهبة
أن تكون الأفعال صادقة في السعي بالأخذ بالأسباب

BinO said...

كلمات تقطر صدقاً
وكأنك تحدثيني
جزاكم الله خيراً
مقولة سيدنا عمر بن الخطاب من الجمل الخطيرة جداً
هم الدعاء
والصلاة دعاء
اللهم تقبل منا

عمرو المصري said...

اذكر كلاما لاستاذي

واعلم انه ماالهمك الدعاء الا لانه يريد ان يعطيك

فن الدعاء في حد ذاته مهم جدا
مش ناس كتير بيكون عندها انه بيعرف يدعي بس زي ماقلت مش موضوع فن انما الهام من ربنا


ممكن تلاقي واحد رفع ايده قعد ساعة ونص يدعي وواحد تاني هما كلمتين مش عارف غيرهم وخلاص


اخيرا
الدعاء بظهر الغيب ثوابه كبير
فتذكرينا من دعائك بالغيب


جزاكي الله خيرا



سلامي
من
ارض الحرب

بن توفيق said...

ربنا يخليكى اختنا المجاهدة على هذة التذكرة الطيبة

The Islamic Spirit said...

جزاكى الله خيرا يا جوجو

عارفه أنا لسه كنت بقرأ كتاب
للدكتور مصطفى محمود أسمه (القرآن
محاولة لفهم عصرى

فإتكلم فيه عن حتة الإنسان مخير أو مسير

لن أتطرق لهذه القضايا الآن

بس قال فى النص كده حتة عجبتنى

أن الإنسان حر طليق فى منطقة ضميره اللى أحنا بنسميها النية

يعنى كل واحد حسب ضميره فى العمل اللى هيعمله لو خير ربنا بييسر له السبيل لذلك وهو ده القدر

أصل ناس كتير بتقول أحنا ندعى ليه ما دام ربنا قدر لنا اللى هيحصل

أولا الدعاء يرد القدر

وثانيا الله عز وجل أعطانا الحرية الكاملة فى الضمير نضمر خير أو شر نؤمن أو لا نؤمن

يستطيع أى إنسان أن يجبرنا على الهتاف بأسمه

أو يعذبنا لكن لن يستطيع أن يجبرنا على حبه لأنها منطقة حرة أنت وحدك تستطيع أن تفعل ما تشاء بها

وبعد ذلك نحن نعمل لنسير القدر

يعنى ربنا بيقدر لنا اللى إحنا أصلا أخترناه بهذه المنطقة الحرة اللى هى الضمير أو النية
اللى بيضمر خير ربنا بييسر له سبل الخير واللى بيضمر شر ربنا بييسر له سبل الشر

وهذا تفسير الآية
"فأما من أعطى وأتقى وصدق بالحسنى، فسنيسره لليسرى، وأما من بخل واستغنى،وكذب بالحسنى، فسنيسره للعسرى "

أسفة للإطالة يا جوجو

وربنا يوفقك

المجاهدة said...

اخي عصفور المدينة

جزاني و إياك استاذى الكريم :)
و جزاك الله خيراً على اضافتك القيمة :)

خاصة "سرعة اللجوء إلى الله"

ربنا يكرمك :)



اخي بينو

ربنا يعزك يا اخي :)
جزاني و إياكم
ربنا يكرمك و يتقبل منك و منا

ســـارة said...

تذكرة طيبة جت في وقتها .. جزاكِ الله خيراً

Monzer said...

آسف على أن تعليقى خارج الموضوع ، وأرجو ان تغفر لى ذلك

ولكن ما يعوض ذلك

ثقتنا الكاملة فى وطنيتكم وحرصكم على سلامة شباب الامة
ندعوكم للانضمام فى حملة افضح تجار الكيف
وهي تهدف إلى تقديم كل ما تعرفه من معلومات عن من يقومون ببيع هذه السموم سواء كانوا فى منطقة إقامتك أوعملك أودراستك أو ناديك

http://elbawaba.blogspot.com/

والتفاصيل والبانارات على هذا الرابط

وجزاكم الله كل خير

Amr Ibrahim said...

ما شاء الله

مواضيعك بأسلوبها البسيط و عمق قيمتها كأن الواحد سمع درس أو شاهد برنامج نافع

استمري و جزاكي الله عنا خيرا

خالد أبوالفضل said...

مع زحمة الحياة وكثرة المشاغل يكون المرء أحوج ما يكون لمن يذكره بالله وينمي الجانب التربوي الروحاني في حياته
جزاكم الله خيرا علي التذكرة

أخوكم
خالد أبوالفضل
el-aseef.blogspot.com

الفاروق said...

اللهم أرزقنا الدعاء فندعوك

جزاكم الله خيرا

كرم مسلم said...

قال يحيى بن معاذ الرازي : إلهي أسألك تذللا، فأعطني تفضلا.

وقال : كيف أمتنع بالذنب من الدعاء، ولا أراك تمتنع بالذنب من العطاء.

جزاكم الله خيرا

فن الحياة said...


جزاكم الله كل خير .. اختي الفاضلة .. تذكرة اكثر من رائعة.. واعجبتني جدا مقولة سيدنا عمر بن الخطاب رضى الله عنه
وذكرتني اختي الكريمة بحديثين

قال صلى الله عليه وسلم: "إن ربكم تبارك وتعالى حييُّ كريمٌ يستحيي من عبده إذا رفع يديه إليه أن يردهما صفراً".

قال عليه الصلاة والسلام: "ما من مسلم يدعو الله بدعوةٍ ليس فيها إثمٌ ولا قطيعة رحم إلا أعطاه الله بها إحدى ثلاثٍ: إما أن يعجل له دعوته، وإما أن يدخرها له في الآخرة، وإما أن يصرف عنه من السوء مثلها" قالوا: إذاً نكثر. قال: "الله أكثر".

فالحمد الله رب العالمين

ملك said...

اكرمك الله حبيبتى المجاهدة

دائما تذكرينى

انى احبك فى الله

ورد الاسلام

عمرو المصري said...

تابعونا الان في

الواقفون علي الاعراف بين نار الغربة وجنة العودة

فقط علي مدونة

صوت فلسطين

FloNa said...

جميل اوي ربنا يكرمك يارب :)

ياسر سليم said...

يا رب ... إنقطع الأمل إلا منك
و إنقطع الرجاء إلا إليك

على فكرة دى تانى مرة تتكلمى عن الدعاء

عشان تعرفى انى واخد بالى

كان قبل كده كنتى بتتكلمى ازاى اننا ندعى لحد ما بيحبناش او احنا ما بنحبهوش

ربنا يكرمك .. ويتقبل ديما دعائك

امنية said...

انا عند ظن عبدى بى ان خيرا فخيرا وان شرا فشرا

برددها كتير لما اخاف من المستقبل
مش عارفه تنفع فى تقبل الدعاء
اظن اه
لو ظنيت ان الله سيتقبل دعائى ويكتب لى الخير سيكون..

موضوعات تلامس القلوب يا مجاهده
ربى يعزك

علاء عارفين said...

ربنا يكرمك على التذكره دي

المجاهدة said...

انا ماردتش على الناس للاسف لضيق الوقت شوية...

جزاكم الله خيراً كثيراً على الردود دي
:)
بجد ادخلتم السرور على قلبي جدا

جزاكم الله خيرأً
و نفعنا الله و إياكم بما علمنا

روح said...

السلام عليكم
انا اول مرة ازورك
مدونتك جميلة
كلها بساطة وصدق
ربنا يجعلك من مستجابي الدعاء
ولا تنسيني من صالح الدعاء
واتمني انك تشرفيني قريب
بحبك في الله
تحياتي