Saturday, June 23, 2007

ربنا يثبتهم

شفت نموذج امبارح حبيت احكيلكم عليه... عسى تستفيدو منه زي مانا استفدت :)

أول إمبارح بالليل توفى والد اختي في الله كاتروز...أسأل الله ان يتغمده برحمته و عفوه و مغفرته
كانت بتجيب سيرته كتير لما بتحكي... و هوا كان بدأ يتعب من فترة و حالته في الاخر تحسنت جدا ثم توفاه الله و هوا بين اهله كلهم في البيت

بكلمها امبارح لاقيتها ثابتة و متماسكة بجد بطريقة اغبطها عليها
بقولها انا مبسوطة بيكي انك قوية كده
بتقولي ماهوا لازم ابقى كده... عشان امى محتاجة حد يقف جمبها و يصبرها
لو البيت كله منهار و بيعيط ماحدش هيعرف يطلع التاني


كلامها عجبني اوى :)
و أسأل الله انها فعلاً تكون متماسكة من جوا و تفضل كده.... ماتبقاش بس من الصدمة عاملة كده



كلامها امبارح فكرني بموقفين شفتهم و عاصرتهم

واحدة صاحبتي كانت مامتها بالنسبة ليها كل حاجة في حياتها
و مامتها كان عندها كانسر - ربنا يعافيكم جميعاً منه يا رب
و البنت دي هيا اصغر واحدة في العيلة
و مامتها فعلاً كانت اساس العيلة كلها ... فعلأً ينطبق عليها قول انها قرة عين لزوجها و ام صالحة لاولادها و كل الناس بتحبها اوى

يوم ما والدتها اتوفت صاحبتي دي كانت في ثانوية عامة... ناقصلها كام اسبوع و تبدأ امتحانات
بكلمها و انا متوقعة الاقى واحدة منهارة..
سبحان الله لاقيتها كويسة اوى اوى

قعدت تقولي مامتى دي الي كنت ببقى قوية بيها
و معنى انها مشيت دلوقتي انى لازم ابقى قوية لوحدي
و انها ماكنتش هتحب ابداً تشوفني متضايقة او ضعيفة

و البنت الصغيرة دي هيا الي كانت بتصبر باباها و تثبته
كل ما يتعب شوية هيا الي تروح تكلمه

:):)


وقتها كنت انا متضايقة من حاجة كنت حاسة انى خسرت ناس مهمة في حياتي عشان مواقف شد بيننا ... مش وفاة حد او كده
و كنت حاسة انى تعبانة شوية بفرقاهم
سبحان الله بكلامها عن مامتها و صبرها و قوتها دي خليتني انا نفسي اقول لأ انا بهرج كده.. انا لازم ابقى اقوى من كده!

سبحان الله بجد
:):)


اخر نموذج لبنت بحبها جدا جداا في الله
صاحبة اختي
البنت دي والدها متوفى من كام سنة

و السنة دي قبل رمضان بيومين والدتها كانت بتعمل عمرة و بعد ما خلصت توفت بعد صلاة الفجر هناك

الخبر طبعأً كلنا بنسمعه و احنا مصدومين... البنت دي و اختها هيعملوا ايه!
كل اخواتها اكبر منها متجوزين و مخلفين... و ناقص بس بنتين لسه في اكلية
و عارفين ظروفهم


ما روحتلها بردو إلى حد ما متوقعة هلاقيها تعبانة

لاقيتها بجد ماشاء الله متماسكة جداا جدااا
قعدت تحكلنا على الرسول عليه الصلاة و السلام يوم وفاة ابنه ابراهيم
و قعد يردد ان القلب ليحزن و ان القلب ليدمع....


اصلأً كلامها كان بيصبرنا احنا :d

احنا مالناش دعوة احنا بنتعاطف وجدانياً بس :d
بس ماشاء الله فعلًأ ربنا يكرمها


سبحان الله بجد:)
فيه مقولة مش متذكراها كويس فيما معناها ان الصبر هوا بتاع الوهلة الاولى دي
لو عرفت تصبؤر كويس فيه يبقى فعلأً صبرت

سبحان الله الي بيقذف في قلوب عباده الصبر و القوة و الطمأنينة دي الي تهون عليهم اي مصيبة تحصلهم و يعرفوا ان فيه احسن من كده مستنينهم
لأن رب العباد هوا الي وعدهم مش حد تاني


و بفتكر هنا بردو كلمة ان المؤمن وقت المصايب بيسحب من رصيد ايمانه الي موجود اصلاً
يعني انتا كأنك كل شوية تزود ايمان جوا قلبك
وقت المصائب لما تعوز ايمان يثبتك كأنك بتاخد من رصيدك الي انتا عاملة بالوقت الي فات
:):)

سبحان الله

ربنا يكرمنا بكرمه
و يثبت كل عبيده


اللهم ثبت اقدامنا و ارضى عننا
اللهم فك كرب المكروبين و اكشف هم المهمومين و اجعل لهم من كل ضيقاً مخرجاً
و اجعل لهم امرهم من بعد عسراً يسراً
و ادخل البسمة على قلوبهم و انزل سكينتك عليهم و ارضى عنهم
يا رب استجب



آمين آمين آمين

40 comments:

.:.-=- ELGaZaLy-=-.:. said...

لا اله الا الله والله قلبى وجعنى وافتكرت موت والدى ربنا يرحمة


اللهم ماامين...هازور مدونتها..

ربنا يرحمنا ويرحمة

عمرو غريب said...

ان لله وان الية راجعون وعلي فكرة ربنا سبحانة وتعالي لما بيحب عبد بيخلي يثبت عند الشدائد و الابتلأت وانشاء الله يسكنة فسيح جناتة

المجاهدة said...

اخي الغزالي

اعتذر ان سببت لحضرتك اي ضيق... فعلاً ماكنش قصدي خالص اعمل كده :s

بالعكس... انا كان هدفي الناس تشوف نماذج للصبر و الثبات و نتعلم منهم..

يا اخي اي شخص مننا بيفضل موجود في الدنيا عشان عنده مهمة معينة ينفذها... اول ما بتخلص مهمته خلاص مافيش فايدة يفضل في الدنيا
بيروح في مكان افضل من الدنيا ألاف المرات

ربنا يرحم والدك و يتقبله من عباده الصالحين
و يصبركم و يثبتكم اخي الكريم و يجعلكم خير ذرية تركها من بعده
:)

المجاهدة said...

اخي عمرو غريب

كلام حضرتك سليم يا اخي
:)
فعلأً الثبات ده بيد الله وحده... اما يصب علينا من الصبر و القوة و الثبات... او يسيبنا تائهين و احنا كمان نسيب نفسنا تائهيين و نتخبط في الحياة من غير هدف معين

اسأل الله ان يثبتنا جميعاً و يقوينا و يتولانا برحمته

ربنا يكرمك يا اخي و اهلأً بحضرتك في المدونة :)

عصفور المدينة said...

المقولة التي تقصديها هي حديث
إنما الصبر عند الصدمة الأولى
وفعلا هو ده الاختبار الحقيقي الصبر عند أول الخبر وحبس النفس عن التسخط وحبس اللسان عن الشكوى وحبس الجوارح عن فعل ما يغضب الله من شق أو لطم

وفيه قاعدة جميلة جدا برضة
انه ما من شر إلا ووقوعه أهون من انتظاره بس دي من أقوال بن تيمية وعندنا مثل
بيقول وقوع البلا.........
جزاك الله خيرا
وفعلا الإنسان إذا كان في الظروف العادية متمرسا ومهيأ نفسه على الرضا بيثبت وقت الشدائد

لا والأقوى من كدة أنه بيثبت عند الشدائد التي تحل به هو شخصيا وأعلاها محن الموت وسكراته
اللهم ارزقنا الثبات

Alaa said...

أن نجد هذا الأمر لدى الرجال فهذا كثير

أما نجد الأمر عند النساء و خصوصا السابات منهن فذلك فعلا فضل من الله و نعمة

سبحان من أعطاهن تلك القوة الغير معهودة لدى النساء

ربنا يصبرهم جميعا على فقدان أحبابهو
و لكن الصبر ان دل فانما يدل على نفس شديدة الثقة في الله

ربنا يبارك فيكي و يحفظك

المجاهدة said...

أستاذى عصفور المدينة

جزاك الله خيرأً على المقولة.. دي الي كنت اقصدها فعلأً ربنا يكرمك عليها
:)

الإنسان إذا كان في الظروف العادية متمرسا ومهيأ نفسه على الرضا بيثبت وقت الشدائد


اتفق مع كلام حضرتك تماما
:)

جزاك الله خيراً كثيرأً و ثبتك الله دوماً على مرضاته
:)

المجاهدة said...

أخى علاء

ربنا يكرمك يا اخي:)
معنى جميل اوى الي حضرتك جبته
:)
و فعلأً المعنى ده هوا للي بيخليني اقدر البنات دول بشكل اكبر
:)

هما بيانوا ضعفاء عشان صغيرين في السن و عشان بنات
بس هما اقوى بكتير و بيستحملوا مواقف فعلأً لا يقدر عليها كثير من الرجال..

جزاك الله خيراً :)

mo'men mohamed said...

أختى مجاهده
يقول رب العزه
" و أستعينوا بالصبر والصلاهو إنها لكبيره إلا على الخاشعين "
وكذلك يقول " و الذين إذا أصابتهم مصيبة قالوا إنا لله و إنا إليه راجعون "
فعلا أنت ضربت نماذج ممتازه للصمود
جزاك الله كل خير
السلام عليكم ورحمه الله و بركاته

المجاهدة said...

أخي نسر الشرق

جزاك الله خيراً كثيراً
:)
يا ريتنا فعلأً نتعلم من النماذج دي:)
و نقوى ايماننا و ندعي نكون من الصابرين و الثابتين في المحن

ربنا يكرمك يا اخي
:)
و اهلًأ بحضرتك في المدونة :)

Maha said...

ما شاء الله

ربنا يثبتنا يا رب

:)

المجاهدة said...

يا رب
:)

ربنا يكرمك يا جميلة :flow:

cleopatra said...

السلام عليكم

حسيت اني ضعيفه اوي وانا بقرا البوست ده .. بجد .. من أقل حاجه مش بقدر .. ساحان الله .. نماذج قوية جدا

وربنا يرحم أمواتنا وأموات المسلمين يا رب
اللــهم أرحم والد كاتروز وأغفر له

ياسر سليم said...

يارب آمين ..

على فكرة انا زرت مدونتها وسيبتلها تعليق ..

ويارب احنا كمان ربنا يصبرنا على كل مكروه ..

بن توفيق said...

هو فعلا انما الصبر عند الصدمة الاولى

وهو ده اللى اتعلمناه من النبى صلى الله عليه وسلم لما مات ابنه ابراهيم
قال : ان العين لتدمع وان القلب ليحزن وانا على فراقك يا ابراهيم لمحزونون ولا نقول الا ما يرضى ربنا .. انا لله وانا اليه راجعون

ربنا يثبتنا زى ما ثبتهم .. ويصبرنا ويصبرهم
اللهم آمين

Dr.khaled said...

نسألأ الله ان يغفر له يورحمه

BinO said...

أنما الصبر عند الصدمة الأولي
ولكن الأمر يختلف حتماً من أنسان لأخر
والعاقل من يؤمن بقضاء الله
والحزن والبكاء ليس عيباً
ولكن القوة بالأيمان وتقبل قدر الله هو لب الأمر
كلمات رسول الله صلي الله عليه وسلم عند وفاة ابنه ابراهيم دائماً ما تدمع العين


جزاكم الله خيراً

خطــاب said...

ما شاء الله

نماذج مشرفة

Sally said...

سبحان الله ربنا بينزل المصيبه ومعها الرحمه بعباده
الصبر دا فعلا رزق

ربنا يارب يثبتهم ويقوي ايمانهم ويجورهم في مصائبهم ويجزيهم خير الجزاء عن صبرهم

ويعفر للمسلمين والملسلمات والمؤمنين والمومنات الأحياء منهم والاموات

Unknown said...

إنا لله وإنا إليه راجعون

ربنا يغفر ويرحم ويصبر اللهم امييييييين

-----------
مجاهدة انا محتاجة منك الدعاء اوى بالله عليكى تدعيلى
ربنا يكرمك يارب

سلام عليكم

Anonymous said...

سألت سؤال فى المدونه عندى ويهمنى جدا اعرف رأى المدونين و ازاى هيجوبوه
عسى ان تعم الافاده
.
.
.
الدعوه عامه

safa7_karmooz said...

هوا بس احنا بنشوف ناس ممكن نحس باى موقف صعب انهم هينهاروا ...لكن بنفاجىء بالعكس....

ده عيب اننا نحكم عليهم من برا...ومنعرفش بالظبط ايه جوا...وكله من عند ربنا ...

هوا اللى بيلهمنا الصبر ...ونفضل صامدين كده ...حتى لو الموقف وحش جدا ...

بمناسبة الكلام عن روز....افتكرت وصية اب لولاده...كنت موجود يوم مكان بيموت ...قالهم ...مش عاوز حد يعيط عليا ولا حد يصوت ولا يصرخ...

انا عاوزكم بس تدعولى ...وتدعوا كويس اوى ان ربنا يجمعنا ان شاء الله فى الجنه...فلازم وانتوا بتدعوا...وانتوا فى حياتكم وبتعملوا خير ...يبقى عندكم لهفة وفرح انكم هتشفونى قريب فى الجنه ...لكن طول ما الحزن جواكم...مش هتستفيدوا حاجه

سبحان الله ...اتوفى بعدها بكام ساعه

ربنا يرحم موتى المسلبمين اجمعين..:)

المجاهدة said...

كليوباترا

و عليكم السلام و رحمة الله
:):)
هوا فعلأً بيجيلنا ساعات احساس اننا اي كلام اما بنشوف ناس كده :d

ربنا يثبتنا و يثبت الجميع وقت المحن و الشدائد...

:)
ربنا يكرمك يا كليوباترا
:)

المجاهدة said...

اخي ياسر

ربنا يكرمك يا اخي
:)

اتبسطت جدا اما لاقيت منكم الي راح المدونة عندها و بيقف جمبها و كده

ربنا يباركلكم و يكرمكم
:):)

عمرو المصري said...

صديقتك الاولي فكرتني بام الاستشهادية ايات الاخرس لما سالوها ماذا فعلت حين جاءك خبر استشهادها فقالت استقبلته بالزغاريد والافراح

فعلا لما ربنا بيحب بني ادم بيثبته ودي مش بتحصل لاي حد

ولن كان برضه الحزن علي الميت مش غلط لان النبي صلي الله عليه وسلم نفسه بكي لما توفي ابنه بس رغم كده كان ثابت مقالش كلمة غلط تغضب ربنا ولا فعل اي فعل حرام

اللهم ثبت قلوب المؤمنين

تحياتي
من
ارض الحرب

FloNa said...

ربنا يصبرنا احنا اللي عايشين في الدنيا لحد دلوقتي


دنيا بالشكل ده طبعا !!

عمرو المصري said...

الي اولئك الذين المهم صور اقتتال الاخوة الاشقاء في فلسطين


الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها


الي كل من انجر وراء حملة التضليل الاعلامي التي ساقوها علينا

الي كل ساع الي الحقيقة

الي كل هؤلاء اهدي

التبيان في اقتتال الاخوان

تجدونه فقط

في

ارض الحرب

جهاد خالد said...

إذا كنتِ ممن يرون للفتاة المسملة
دورا هاما في الحياة
إذا كنتِ ممن يحلمون بفتاة تصلح لتربية الاجيال
شاركينا آراءكِ ومقترحاتك
في مدونة
بـنـاتـيـت
www.banateet.blogspot.com

لكِ من القلب أعذب التحايا

Anonymous said...

بسم الله الرحمن الرحيم
السلام عليكم ورحمه الله وبركاته،

الصبر ده أحلى نوع صبر..
"الصبر الجميل" بوصفه سبحانه وتعالى

(فَاصْبِرْ صَبْرًا جَمِيلًا)

أي صبراً لا جزع فيه ولا عتاب معه :).
حلو جداً.
زي "الهجر الجميل" وهو الذي لا جزع فيه ويكون في ذات الله ولا عتاب معه.

sharkawoo said...

ألثبات هذا نعمة من عند الله ... يهبها لمن يشاء وقت ما يشاء ...

لا يعتقد تماما أن سوف يثبت في تلك المواقف ... فالوقت حينها يكون الأمر مختلفاً للغاية ...

ربنا يرحمنا برحمته .. ويميتنا علي لا إله إلا الله :)

Alaa said...

المجاهدة أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

سمـــر مــاهر said...

ربنا يكرمك يا حبيبتى على المشاعر الرقيقه دى


اجمل شىء فيكى انك مبتخليش اى حاجه تعدى عليكى الا وتستفادى منها وتحاولى تفيدى غيرك

جزاكى الله خيرا

سلام عليكم

Anonymous said...

مجاهدة

ربنا يكرمك عاجبني اوي الحس الديني اللي في كتاباتك

رائعة

بالنسبة للصبر و الثبات

سبحان الله هتلاقي في كل موقف وفاه

في واحد متماسك

مفيش موقف هتلاقي الناس كلها منهارة و بتموت لا لا لا

لازم يبقى في حد هوا اللي بيقوي المجموعة كلها

ممكن يتقال عليه انه مبيحسش

او مش متاثر اوي

بس الناس دي من جواها .. بتبقى تعبانة اوي

و مكسورة اوي اوي

خليكي جنبهم

المجاهدة said...

اعتذر عن التأخير ده كله في الردود :$

أخي بن توفيق

جزاك الله خيراً على الاضافة :)
و ربنا يتقبل دعائك
:)
ربنا فعلاً يرزقنا الصبر في المحن و الشدائد و يجعلنا دوماً من الصابرين الثابتين
:)



أخي دكتور خالد

ربنا يتقبل منك و يكرمك :)
جزاك الله خيرأً على المرور الكريم
:)





أخي بينو

بالظبط زي ما حضرتك قلت
:)
هوا اصلأً مش معنى البكاء ان شخص ضعيف... الي بيفرق بس طريقة تعبيره
و ممكن حد يكون قدام الناس ثابت و صامد و هوا اصلأً مش كده
و يبقى من جواه مهزوز و مكسور اكتر بكتير من الي بيبكو
المهم الايمان بربنا و القلب عامل ازاي من جوا
:)

اسأل الله الثبات لي و للجميع

جزاك الله خيراً
:)

المجاهدة said...

أخي خطاب

ربنا يكرمك و يباركلك
:)
ربنا يجعلنا مثلهم في الثبات و القوة :)



بالله المستعان

ربنا يكرمك :)
هوا فعلأً ربنا مش بينزل على حد مصيبة او يصيبه بكرب و ابتلاء غير لما يبعت معاه حاجة تثبته بيها
ربنا يكرمنا و يرحمنا :)



إنسانة

ربنا يكرمك يا رب و يباركلك
:)
يا رب تكوني احسن دلوقتي
:)



حراس الحقيقة

معلش للتأخير...
هبقى اجي ان شاء الله اعدي عليكي هناك
:)

المجاهدة said...

أخي سفاح كرموز

معاك حق يا اخي
كان عندي واحدة صاحبتي مفترض انها متماسكة... غير ان انكل تعبان بقاله تلات سنين و اخر سنة كان كتير بيروح للمستشفي... و بعد وفاته البنت فعلاً كانت منهارة
انا كنت بفكر كتير انى مستغربة اوى من حاالها
اصلها من الناس الي كنت فاكراهم هيعرفوا يثبتوا
و لو ظاهرياً حتى قدام الناس
بس للاسف حالها اتشقلب خالص و كنت بستغرب اوى من كده

بس قعدت افتكر اد ايه كانت متعلقة بانكل الله يرحمه و اد ايه بتحبه
مش معنى انه كبير في السن او انه مريض من فتره انها تتقبل الامر الواقع و تبقى عامله كده و كأن شيئاً لم يكن

احنا الي مش بنبقى واخدين بالنا عشان بنشوف الامور من بره

ربنا يثبتنا و يرحمنا..


ربنا يكرمك على الموقف الي حكيته:)
فعلاً جميل اوى ماشاء الله

ربنا يرحمهم جميعاً يا رب
:)

جزاك الله خيرأً :)

المجاهدة said...

أخي عمرو المصرى

ربنا يكرمك
:)
امهات الاستشهاديين دول ليهم وضع خاص :d و ليهم قصص كتيرة قوى تانية
بجد ربنا يرضى عنهم و يكرمهم و يباركلهم في حياتهم
:):)


و اتفق مع حضرتك... احنا ااه ممكن نحزن و نبكى
بس نفضل بردو محتفظين برباطة الجأش زي ما بيقولوا :)
المهم الايمان في القلب يفضل ثابت
و يزيد كل شوية لو قدرنا

:)
ربنا يباركلك يا اخي
:)

المجاهدة said...

فلونا

على رأيك
ربنا يصبرنا احنا و يتولانا برحمته
:)


النجمة الصاعدة

ان شاء الله ابقى اجي قريباً
:):)


سلمى

و عليكي السلام و رحمة الله
:):)
ربنا يكرمك يا رب على اضافتك
:)
مش لاقية حاجة اقوها بعد كده
ربنا يتقبل منك
:)

ربنا يجعلنا من الصابرين دون جزع او هم
:):)

المجاهدة said...

اخي شارقاوو

جزاك الله خيرأً كثيرأً على اضافتك
:)
لا املك عليها تعقيب كافي...
ربنا يكرمك :):)
هيا فعلأً بتبقى في وقت ما ربنا يريد لمن يريد
:)
جزاك الله خيراً



أخي علاء

ان شاء الله ابقى اروح اعدي هناك
:)

المجاهدة said...

سمر

ربنا يكرمك يا رب و يباركلك
:)
ااه بحاول اهو ماسيبش حاجة تعدي غير و اتفكر فيها
ربنا يكرمك يا رب و يجعلك و إيانا من الثابتين دوماً
:)
جزاني و إياكي
:):)
اتبسطت جدا بردك بجد
:)



منة

ربنا يكرمك :):)

مبسوطة جداا بردك هنا
:)

عندك حق ااه
ربنا بينزل سكينته على شخص واحد عشان يثبت البقية
و الناس الي بتثبت الباقيين دي ممكن تبقى من جواها اكتر ناس محتاجة ناس تقف جمبها و تساعدها
عشان كده بيساعدو غيرهم و يقوهم

ربنا يكرمهم يا رب و ينزل سكينته عليهم و يحيطهم برحمته
:)


ربنا يكرمك يا رب
:)