ربِ إشرح لي صدرى

امبارح في وسط اليوم لاقيت كل حاجة قدامي مشجعة جدا على الزعل...
و طبعاً ما ادتش لنفسي فرصة اطلع من الزعل ده و عشت في الدور و اكتأبت شوية:d

و سبحان الله... فضلت اشوف كل حاجة بعديها تضايق..
كنت متضايقة من احداث معينة حصلت...
و تخيلت ان الاحداث دي هتقفل كل حاجة كويسة قدامي في المستقبل... و هتقفل قدامي طرق كنت عاوزاها
قعدت ابص للدنيا بنظرة واقعية بس متشائمة اوى :d
و لاقيت كل حاجة بايظة
لا انا نافعة.. ولا الاحداث الي بتحصل دلوقتي نافعة
يبقى اكيد المستقبل هيبقى بايظ بايظ
و خلص اليوم انى افتكرت حاجة وحشة حصلتلي قبل كده ف دخلت انام و انا في قمة همى
:d

كان يوم لذيذ من الاخر يعني :d


صحيت الصبح و سبحان الله على السعادة الي كانت مالياني:d

و الي بسطني اكتر... انى لما صحيت عملت حاجة ادخلت السرور على قلب امى :) ف اتبسطت اكتر و اكتر

شوية و قعدت افكر في احداث امبارح
لاقتني كنت بستهبل امبارح :)
و لاقيت ان حاجات كتيرة قوى حلوة و جميلة اوى... انا الي عينيا قافلة و مش شايفه غير الحلو

my life is perfectly fine
and my future is bright
and whatever happened in the past, are experiences in my favor

الحمد لله بجد :)

بعد شوية بجيب البرنامج بتاع الدكتور عمر عبد الكافي.. بيتعاد كل جمعة على قناة دبي الساعة 11 الصبح..

سبحان الله النهاردة كان بيتكلم عن الهم عند المسلم...
:):)

قعد يشرح الاول مراحل الهم و الزعل.. قعد يحكي كتير و مين اقوى مرحلة و مين الي بعد كده.

و بعديها قال على الدواء بتاعه.. و ايه الاساليب الي ممكن نعملها تفرج لينا الهم..


كلام عارفينه.. بس بنبقى عاوزين حد يذكرنا بيه كل فترة

الدنيا ساعات بتاخدنا... او من الكروب نحس ان الدنيا ضاقت اوى اوى

بس ماهوا ربنا الي بيجبلنا النعم... هوا هوا ربنا الي بيجبلنا الكروب

النعم بيجبها لينا اختبار
و الكروب لينا اختبار

النعم لينا زيادة حسنات ان احسنا استخدمها
و الكروب زيادة حسنات لو احسنا الصبر عليها و احتساب اجرنا عند الله


امبارح ما كنتش شايفه قدامي غير الحاجات الوحشة الي بتحصل دلوقتي... و برتب عليها مع مزاجي ان قدام هيبقى كله وحش

لأني انا علمي لسه على قدي... و عملى على قدى اوى اوى
تفكيري لسه مش ناضج بالدرجة الكافية
انا لا رحت ولا جيت...

عاوزة حاجات مش هتيجي غير لواحدة عندها علم و عندها صبر و عندها قوة

عاوزة حاجات مش هتيجي غير بظوف معينة (حسب تفكيري المتواضع)

بس الي بيحصل في الكون مش بيبقى تبع تفكيرنا احنا البسيط القليل

واحدة صاحبتي في يوم ربنا يعزها كنت متضايقة من حاجة
قعدت تقولي ربنا مش بشر - استغفر الله العظيم
بتقولي ربنا إله
بيسيّر الكون بقوانين إلاهية
مش قوانين بشرية

انا و انا في الدنيا انسانة بسيطة بفكر بطريقة و بعمل حاجة معينة

ربنا قوانينة إلاهية اعلى مني و من خمستاشر مليون زيي و اعلي منا

احنا ما علينا إلا التسليم له مية في المية

التسليم له فيما فات
يقبله منا او يغفره لنا

التسليم له في الي بيحصل دلوقتي
انى متوكله عليه و عارفة انى لو احسنت العمل مش هيضيع اجرى ولا هيضيع امرى

التسليم له فيما قادم
ربنا رب الكون ولا يعجزه شئ في الارض ولا في السماء

امره إن اراد شيئاً أن يقول له كن فيكون

كلمة بسيطة جدا...


ما علينا إلا الدعاء
قول احد الصالحين
المسافة بين الأرض و السماء دعوة مستجابة


و اننا يكون صدرنا رحب و عندنا رصيد إيماني يكفينا و يقينا كل الي بيحصلنا في حياتنا

عشان كده كانت اول دعوة لسيدنا موسى و هوا مكلف بحمل الرسالة ... و مكلف بتوصيلها لأعتي خلق الله في ارضه
قاله "رب إشرح لي صدرى"

اول دعوة قالها... لأن لو صدره ضيق مش هيعرف يحمل الرسالة
مش هيعرف يوصلها زي ماهيا مطلوبة منه
مش هيعرف يتقبل اي كرب يحصله بعديها
مش هيعرف يستوعب اي نعمة جاياله وقتها و يشكر ربنا عليها..


و لو فعلأً عندنا كرب
و فعلاً عندنا ابتلاء دائم...

علينا الصبر على هذا

قول الإمام علىّ بن أبي طالب

سأصبر حتى يعجز الصبر عن صبري
و أصبر حتى يأذن الله في أمرى
و أصبر حتى يعلم الصبر أني صابر
على شئ أمر من الصبر

:)
و كما قالوا قديماً
إنما الصبر بالتصبر


:)

الحمد لله
:)

رب اشرح لنا صدورنا جميعاً
:)